ខេត្តតាកែវ ៖ នាយប៉ុស្តិ៍នគរបាលឃុំស្រែរនោង រងការចោទប្រកាន់ពីគ្រួសារជនរងគ្រោះថា បានដោះលែងជនសង្ស័យ ក្នុងករណីរំលោភកូនស្រីគាត់ដែលជាអនីតិជន ។ សូមរំឭកថា កាលពីពេលកន្លងទៅ មានករណីរំលោភសេពសន្ថវៈមួយកើតឡើងនៅឃុំស្រែរនោង ស្រុកត្រាំកក់ ដែលក្មេងស្រីទើបមានអាយុ១៣ឆ្នាំ ។
ករណីនេះ បានកើតឡើងយូរខែមកហើយ តែមិនទាន់បែកធ្លាយ ទើបតែពេលនេះ ដោយឃើញពោះក្មេងស្រីកាន់តែធំឡើងៗ ទើបឪពុកម្តាយនាំយកទៅគ្រូពេទ្យពិនិត្យនិងដឹងថា នាងមានកូននៅក្នុងផ្ទៃរហូត៧ខែទៅហើយ ក៏មានភ្ញាក់ផ្អើលតែម្តង ។ បន្ទាប់មក ក្រុមគ្រួសារក្មេងស្រីបានដាក់ពាក្យបណ្តឹងទៅប៉ុស្តិ៍នគរបាលឃុំស្រែរនោង រួចលោកនាយប៉ុស្តិ៍ក៏បានហៅភាគីរងគ្រោះទៅសាកសួររួចហើយដែរ ។ ចំណែកឯជនសង្ស័យដែល ធ្វើសកម្មភាពរំលោភ ឈ្មោះ ខឹម ញេប អាយុ៥០ឆ្នាំ មានមុខរបរជាដង្ខៅគោ រស់នៅក្នុងឃុំជាមួយគ្នា ។
បើតាមក្មេងស្រីនិយាយថា ជននេះរំលោភនាងបានសម្រេចចំនួន៤ដង កាលពី៦ទៅ៧ខែមុន រហូតមកដល់ពេលនេះ តែនាងមិនហ៊ានប្រាប់ម្តាយព្រោះខ្លាចគាត់វាយ ។ក្រុមគ្រួសារក្មេងស្រីនិយាយថា ក្រោយពីមាន
ការប្តឹងហើយ នាយប៉ុស្តិ៍បានហៅឈ្មោះ ខឹម ញេប ទៅសាកសួរដែរ តែក្រោយមកក៏ដោះលែងឲ្យមានសេរីភាពវិញ ដោយពួកគាត់មិនទាន់ទទួលបានពន្លឺយុត្តិធម៌នៅឡើយ ។ ឯប្រភពពីមន្ត្រីតូចតាចម្នាក់ សូមមិនបញ្ចេញឈ្មោះនិយាយថា ការដោះលែងជនសង្ស័យខាងលើនេះ ជាថ្នូរនឹងលុយ តែមិនដឹងថាចំនួនប៉ុន្មាននោះទេ ។
លោក សុខ វិជ្ជា អធិការរងនគរបាលស្រុកត្រាំកក់បានឲ្យដឹងនៅថ្ងៃទី៤ ខែមករា ថា ចំពោះការដោះលែងជនសង្ស័យ គឺដោយសារតែជននេះបានបដិសេធ ។ រឿងដោះលែងនេះ លោកក៏បានឆ្លងយោបល់ពីព្រះរាជអាជ្ញាអមសាលាដំបូងខេត្តរួចហើយ ព្រោះវាជារឿងស៊ើបអង្កេត ហើយក៏រង់ចាំលទ្ធផលចេញពីពេទ្យសិន ទើបធ្វើការស្រាវជ្រាវបន្ត មិនមែនដោះលែងជាថ្នូរនឹងលុយនោះទេ ។
នៅថ្ងៃដដែលនោះ អ្នកយកព័ត៌មានយើងមិនអាចសុំការបំភ្លឺពីលោក ប៊ុត សាត នាយប៉ុស្តិ៍ស្រែរនោងបានទេ ព្រោះទូរស័ព្ទចូលមិនលើក ។ ទាក់ទិននឹងករណីនេះ យើងក៏បានព្យាយាមទាក់ទងសុំការបំភ្លឺពីលោកព្រះរាជអាជ្ញាអមសាលាដំបូងខេត្តដែរ តែពេលទូរស័ព្ទចូលហើយលោកជាប់រវល់ នៅវេលាម៉ោង៣និង២៩នាទីរសៀល ថ្ងៃដដែលនោះ ។
ចំណែកជនសង្ស័យចាប់រំលោភក្មេងស្រីរហូតមានផ្ទៃពោះ៧ខែនោះ ពេលនេះគេចខ្លួនបាត់ស្រមោលឈឹងទៅហើយ នេះបើយោងតាមប្រភពព័ត៌មានពីភាគីជនរងគ្រោះ ។ ឪពុកម្តាយក្មេងស្រី បានអំពាវនាវឲ្យអាជ្ញាធរជួយរកយុត្តិធម៌ជូនគាត់ផង និងចាប់ជនសង្ស័យមកផ្តន្ទាទោសតាមច្បាប់ ។ មិនតែប៉ុណ្ណោះ គាត់ក៏បានអំពាវនាវសុំឲ្យសម្តេចកិត្តិព្រឹទ្ធបណ្ឌិត ប៊ុន រ៉ានី ហុន សែន មេត្តាជួយដល់កូនស្រីគាត់ផង ព្រោះមានតែសម្ដេចទេដែលជាទីពឹងដ៏កក់ក្ដៅ ។
រហូតមកដល់ថ្ងៃទី៥ ខែមករា ប្រភពព័ត៌មានច្បាស់ការណ៍មួយទៀតបានឲ្យដឹងថា លោកនាយប៉ុស្តិ៍ខាងលើបានហៅជនរងគ្រោះ មកសាកសួរម្តងទៀត ដោយយកហេតុផលថា ធ្វើឯកសារខុសដោយសាររឿងនេះទាក់ទងទៅនឹងការដោះលែងជនសង្ស័យឲ្យមានសេរីភាព ។
ចាំមើលមើល៍ រឿងអាស្រូវនេះ នឹងត្រូវចាត់ការដោយវិធីណា ?
ចែករំលែកព័តមាននេះ