ដេញចាប់ដូចក្នុងរឿង ! ឃាត់ខ្លួនជនជាតិចិនម្នាក់ បន្ទាប់ពីបើកឡានដោះស្លាកលេខរត់គេចពីសមត្ថកិច្ច និងបុកយានយន្តជាច្រើននៅក្រុងព្រះសីហនុ
- ព្រះសីហនុ
ខេត្តព្រះសីហនុ ៖ ពាក់ព័ន្ធករណីរថយន្តមួយគ្រឿងដែលត្រូវបានសមត្ថកិច្ចធ្វើការដេញតាម និងឃាត់បាននៅក្រុងព្រះសីហនុ កាលពីយប់ថ្ងៃទី២៤ ខែមិថុនា ឆ្នាំ២០២៦ ស្នងការដ្ឋាននគរបាលខេត្តព្រះសីហនុ បានឱ្យដឹងថា ករណីនេះកើតឡើង បន្ទាប់ពីសមត្ថកិច្ចទទួលព័ត៌មានសុំអន្តរាគមន៍ពីម្ចាស់រថយន្ត ដោយសង្ស័យថា រថយន្តរបស់ខ្លួនត្រូវបានបុគ្គលផ្សេងយកទៅប្រើប្រាស់ ដោយបានដោះស្លាកលេខចេញ និងមិនមែនជាអ្នកជួលរថយន្តស្របច្បាប់នោះទេ ។
ក្រោយទទួលព័ត៌មាន សមត្ថកិច្ចជំនាញនៃផែនការងារព្រហ្មទណ្ឌ បានសហការជាមួយម្ចាស់រថយន្តតាមដានទីតាំង និងបានព្យាយាមឃាត់រថយន្តខាងលើ ដើម្បីត្រួតពិនិត្យ ។ ទោះជាយ៉ាងណា អ្នកបើកបរមិនព្រមសហការជាមួយសមត្ថកិច្ចទេ ថែមទាំងបានព្យាយាមបើករថយន្តគេចខ្លួនបង្កគ្រោះថ្នាក់ដល់អ្នកប្រើប្រាស់លើផ្លូវសាធារណៈ ដោយបានបុកយានយន្តរបស់ប្រជាពលរដ្ឋជាច្រើនគ្រឿង និងបើកកៀរកម្លាំងសមត្ថកិច្ចថែមទៀតផង ។
ក្នុងគោលបំណងបញ្ឈប់សកម្មភាពគ្រោះថ្នាក់ និងការពារសុវត្ថិភាពសាធារណៈ សមត្ថកិច្ចបានប្រើវិធានការចាំបាច់ ដោយផ្ទុះអាវុធឡើងសំដៅបំបែកកង់រថយន្ត ប៉ុន្តែជនសង្ស័យនៅតែបន្តបើកគេចខ្លួន រហូតដល់សមត្ថកិច្ចជំនាញអន្តរាគមន៍ឃាត់បាន នៅចំណុចលើផ្លូវបេតុង ស្ថិតក្នុងភូមិ២ សង្កាត់លេខ៤ ក្រុង-ខេត្តព្រះសីហនុ ។
ជនសង្ស័យឈ្មោះ LIN XIN ភេទប្រុស ជនជាតិចិន ត្រូវបានឃាត់ខ្លួន និងនាំមកសាកសួរនៅការិយាល័យនគរបាលព្រហ្មទណ្ឌកម្រិតធ្ងន់ ។ ការត្រួតពិនិត្យជាបឋមក្នុងរថយន្ត មិនបានរកឃើញវត្ថុសង្ស័យ ឬសម្ភារៈខុសច្បាប់ណាមួយឡើយ ។ បច្ចុប្បន្ន សមត្ថកិច្ចកំពុងបន្តស្រាវជ្រាវ និងចាត់ការតាមនីតិវិធីច្បាប់ ៕
ស្នងការដ្ឋាននគរបាលខេត្តព្រះសីហនុ សូមអំពាវនាវដល់សាធារណជនកុំមានការភាន់ច្រឡំ និងសូមទទួលយកព័ត៌មានពីប្រភពផ្លូវការច្បាស់លាស់ ៕
ចែករំលែកព័តមាននេះ