រាជធានីភ្នំពេញ ៖ សាលាដំបូងរាជធានីភ្នំពេញបានកោះហៅលោក គង់ គាំ អតីតមន្ត្រីជាន់ខ្ពស់គណបក្សសង្គ្រោះជាតិ ដើម្បីចូលខ្លួនមកសាកសួរក្នុងសំណុំរឿងលោក កឹម សុខា ដែលជាប់ចោទពីបទសន្និដ្ឋិភាពជាមួយបរទេស ក្នុងអំពើក្បត់ជាតិ ។
ការកោះហៅនេះ បន្ទាប់ពីតុលាការបដិសេធការស្នើសុំរបស់ក្រុមមេធាវីលោក កឹម សុខា ស្ទើសុំឲ្យទម្លាក់ការចោទប្រកាន់លើលោក កឹម សុខា ។ យោងតាមដីកាកោះហៅរបស់ សាលាដំបូងរាជធានីភ្នំពេញ កាលពីថ្ងៃទី២៦ ខែធ្នូ ឆ្នាំ២០១៨ ហើយត្រូវចេញផ្សាយនៅថ្ងៃទី៦ មករា នេះ បានឲ្យដឹងថា «យើង គី ឬទ្ធី ចៅក្រមស៊ើបសួរសាលាដំបូងរាជធានីភ្នំពេញ សូមអញ្ជើញលោក គង់ គាំ ជាសាក្សី មានទីលំនៅផ្លូវសុធារស ភូមិ៣ សង្កាត់ទន្លេបាសាក់ ខណ្ឌចំការមន រាជធានីភ្នំពេញ ឲ្យចូលទៅកាន់សាលាដំបូងរាជធានីភ្នំពេញ នៅថ្ងៃទី២៣ ខែមករា ឆ្នាំ២០១៩ វេលាម៉ោង៨និង៣០នាទីព្រឹក នៅជាន់ទី៤បន្ទប់ គ » ។
ដីកាបន្តថា លោក គង់ គាំ ជួយបំភ្លឺពាក់ព័ន្ធសំណុំរឿងព្រហ្មទណ្ឌនៅថ្ងៃទី៣ ខែកញ្ញា ឆ្នាំ២០១៧ ដែលមានជនត្រូវចោទ ឈ្មោះ កឹម សុខា ជាប់ចោទពីបទសន្និដ្ឋិភាពជាមួយបរទេស។ កាលពីថ្ងៃទី២៧ ធ្នូ ចៅក្រមសាលាដំបូងរាជធានីភ្នំពេញបានឆ្លើយតបទៅក្រុមមេធាវីពាក់ព័ន្ធស្នើទំលាក់បទចោទប្រកាន់លើលោក កឹម សុខា ថាតំណាងអយ្យការបានស្នើសុំឲ្យបំពេញកិច្ចស៊ើបសួរបន្ថែម ទៅលើសាក្សីមួយចំនួនពាក់ព័ន្ធតាមដីកាស្នើសុំឲ្យបំពេញកិច្ចស៊ើបសួរ ហើយចៅក្រមស៊ើបសួរបានចាត់នីតិវិធីកោះហៅ សាក្សីបន្ថែម ដើម្បីចូលឆ្លើយបំភ្លឺនៅពេលខាងមុខ ។
នីតិវិធីស៊ើបសួរកំពុងដំណើរការទៅមុខ ដើម្បីប្រមូលភស្តុតាងបន្ថែម ។ ទាក់ទិននឹងសំណើសុំទម្លាក់ការចោទលើសំណុំរឿងលោក កឹម សុខា វិញ លោក គី ឬទ្ធី ចៅក្រមស៊ើបសួរសាលាដំបូងរាជធានីភ្នំពេញបដិសេធពាក្យស្នើសុំរបស់សហមេធាវីលោក កឹម សុខា ដែលបានស្នើឲ្យទម្លាក់បទចោទប្រកាន់មកកូនក្តីរបស់ខ្លួន ដែលបានអូសបន្លាយជាង១ឆ្នាំមកហើយ ពាក់ព័ន្ធអំពើក្បត់ជាតិ ។
កាលពីថ្ងៃទី២៧ ខែធ្នូ ឆ្នាំ២០១៨កន្លងមកនេះក្រុមមេធាវីបានដាក់ពាក្យស្នើសុំឲ្យលើកលែងការចោទប្រកាន់មកលើលោក កឹម សុខា ជាលើកទី៣ ប៉ុន្តែក្រោយពីមានការដាក់ពាក្យនៅថ្ងៃទី៤ ខែមករា ឆ្នាំ២០១៩ ចៅក្រមទើបតែឆ្លើយតបបដិសេធទៅវិញ ។ យោងតាមដីកាសម្រេចរបស់លោក គី ឬទ្ធី នៅថ្ងៃទី៤ មករា បានឲ្យដឹងថា «បដិសេធពាក្យស្នើសុំនៅថ្ងៃទី២៧ ខែធ្នូ ឆ្នាំ២០១៨ របស់សហមេធាវីការពារសិទ្ធិឲ្យជនត្រូវចោទឈ្មោះ កឹម សុខា» ។
ដីការបស់ចៅក្រមយល់ឃើញថា ជនត្រូវចោទ កឹម សុខា ត្រូវបានតំណាងអយ្យការដាក់ឲ្យស្ថិតនៅក្រោមការពិនិត្យពីបទសន្និដ្ឋិភាពជាមួយបរទេស ប្រព្រឹត្តនៅកម្ពុជា និងទីកន្លែងផ្សេងទៀត កាលពីអំឡុងឆ្នាំ១៩៩៣ រហូតដល់ថ្ងៃទី៣ ខែកញ្ញា ឆ្នាំ២០១៧ ។ ក្នុងដំណាក់កាលស៊ើបសួរ ចៅក្រមស៊ើបសួរ ត្រូវចាត់នីតិវិធី ដើម្បីស្រាវជ្រាវប្រមូលភស្តុតាងឲ្យបានពេញលេញ និងគ្រប់គ្រាន់ ស្របតាមក្រមនីតិវិធីព្រហ្មទណ្ឌមុនបិទបញ្ចប់ការស៊ើបសួរ ។
តំណាងអយ្យការបានស្នើសុំឲ្យបំពេញកិច្ចស៊ើបសួរបន្ថែមទៅលើសាក្សីមួយចំនួនពាក់ព័ន្ធតាមដីកាស្នើសុំឲ្យបំពេញកិច្ចស៊ើបសួរ ហើយចៅក្រមស៊ើបសួរ បានចាត់នីតិវិធីកោះហៅសាក្សីបន្ថែម ដើម្បីចូលឆ្លើយបំភ្លឺនៅពេលខាងមុខ ។ នីតិវិធីស៊ើបសួរកំពុងដំណើរការទៅមុខ ដើម្បីប្រមូលភស្តុតាងបន្ថែម ។
សូមបញ្ជាក់ថា លោក កឹម សុខា ត្រូវបានឃុំខ្លួននៅក្នុងពន្ធនាគារត្រពាំងផ្លុង ខេត្តត្បូងឃ្មុំ រយៈពេលជាងមួយឆ្នាំ ហើយត្រូវបានប្ដូរកន្លែង ឃុំខ្លួនពីត្រពាំងផ្លុង«ម៣» យកមកឃុំខ្លួនក្នុងផ្ទះរបស់គាត់នៅទួលគោកភ្នំពេញ នាម៉ោងជាង៣ទៀបភ្លឺ ពីថ្ងៃទី១០ ខែកញ្ញា ឆ្នាំ២០១៨ ៕
ចែករំលែកព័តមាននេះ