រាជធានីភ្នំពេញ ៖ ប្តីប្រពន្ធ២នាក់នាំគ្នាទៅទិញក្រណាត់កាត់សំលៀកបំពាក់ដើម្បីចូលរួមមង្គលការប្អូន ស្រាប់តែដំណើរតាមផ្លូវត្រូវរថយន្តកុងតឺន័រមួយគ្រឿងបើកបុកកិនបណ្តាលឲ្យស្លាប់ទាំង២នាក់យ៉ាងអាណោចអាធ័ម ។ ហេតុការណ៍ដ៏រន្ធត់នេះបង្កឲ្យមានការភ្ញាក់ផ្អើលកាលវេលាម៉ោង៧យប់ថ្ងៃទី៣ ខែមករា ឆ្នាំ២០១៩ ស្ថិតនៅភូមិ ព្រៃកំបុត…
រាជធានីភ្នំពេញ ៖ ប្តីប្រពន្ធ២នាក់នាំគ្នាទៅទិញក្រណាត់កាត់សំលៀកបំពាក់ដើម្បីចូលរួមមង្គលការប្អូន ស្រាប់តែដំណើរតាមផ្លូវត្រូវរថយន្តកុងតឺន័រមួយគ្រឿងបើកបុកកិនបណ្តាលឲ្យស្លាប់ទាំង២នាក់យ៉ាងអាណោចអាធ័ម ។
ហេតុការណ៍ដ៏រន្ធត់នេះបង្កឲ្យមានការភ្ញាក់ផ្អើលកាលវេលាម៉ោង៧យប់ថ្ងៃទី៣ ខែមករា ឆ្នាំ២០១៩ ស្ថិតនៅភូមិ ព្រៃកំបុត សង្កាត់ចោមចៅទី២ ខណ្ឌពោធិ៍សែនជ័យ ។
ប្តីប្រពន្ធរងគ្រោះដែលស្លាប់ទាំង២នាក់ខាងលើរួមមាន ឈ្មោះ ប៉ុក ភក្តី ភេទប្រុស អាយុ៣៤ឆ្នាំ មុខរបរជាងកាត់សក់ ត្រូវជាប្តី មានស្រុកកំណើតនៅស្រុកបាទី ខេត្តតាកែវ ជាអ្នកបើកបរម៉ូតូមួយគ្រឿងម៉ាកស្គូពី ពណ៌ក្រហម ពាក់ស្លាកលេខ ភ្នំពេញ 1GV – 9379 និងអ្នករួមដំណើរម្នាក់ត្រូវជាប្រពន្ធឈ្មោះ អឹង និមល អាយុ២៥ឆ្នាំ មុខរបរកម្មកររោងចក្រទើបនឹងឈប់ មានស្រុកកំណើតនៅខេត្តកំពង់ស្ពឺ។
ចំណែករថយន្តកុងតឺន័រខាងលើម៉ាកហ៊ីយ៉ាន់ដាយ ពណ៌ស ពាក់ស្លាកលេខ ភ្នំពេញ ៣E-៣៩៨៣ បើកបរដោយបុរសម្នាក់មិនស្គាល់អត្តសញ្ញាណ បានរត់គេចខ្លួនបាត់ស្រមោល ។
តាមប្រភពព័ត៌មានពីមិត្តភក្ដិរបស់ជនរងគ្រោះឈ្មោះកឹម វណ្ណះ ភេទប្រុស អាយុ៣៤ឆ្នាំ មុខរបរកាត់
សក់ជាមួយគ្នាបានអោយដឹងថា នៅមុនពេលកើតហេតុ គាត់និងជនរងគ្រោះទាំង២នាក់បាននាំគ្នាទៅទិញក្រណាត់ដើម្បីកាត់សំលៀកបំពាក់នៅផ្សារអូរឫស្សីទុកចូលរួមមង្គលការប្អូន ដោយចេញពីផ្ទះតាំងពីម៉ោង២រសៀលមកម្ល៉េះ លុះដល់ពេលល្ងាច ក៏នាំគ្នាត្រឡប់មកវិញ ហើយជនរងគ្រោះទាំង២នាក់ខាងលើប្រញាប់ទៅមុន ដោយប្រាប់គាត់ថា «ម្តាយទូរស័ព្ទមកថាកូនយំ អោយប្រញាប់មកផ្ទះអោយលឿន» ។
ប្រភពដដែលបានបន្តទៀតថា លុះនៅពេលកើតហេតុ គាត់បានទូរស័ព្ទទៅសួរជនរងគ្រោះ ស្រាប់តែមានគេប្រាប់តាមទូរស័ព្ទថា «ម្ចាស់ទូរស័ព្ទខាងលើបានស្លាប់ទាំង២នាក់ប្តីប្រពន្ធបាត់ទៅហើយ» ទើបគាត់ ប្រញាប់ប្រញាល់មកកន្លែងកើតហេតុ ។
បើតាមប្រភពព័ត៌មានពីប្រជាពលរដ្ឋនៅកន្លែងកើតហេតុបាននិយាយប្រាប់ថា មុនពេលកើតហេតុ គេឃើញជនរងគ្រោះ២នាក់ប្តីប្រពន្ធជិះម៉ូតូមួយគ្រឿងម៉ាកស្គូពី បើកបរក្នុងល្បឿនយ៉ាងលឿន ក្នុងទិសដៅពី ជើងទៅត្បូង បើកជែងរថយន្តមិនចាំម៉ាកមួយគ្រឿងដែលជិះស្របគ្នា ហើយម៉ូតូជិះទៅកណ្តាលផ្លូវ ស្រាប់
តែឃើញរថយន្តកុងតឺន័រមួយគ្រឿងខាងលើ បើកបរក្នុងទិសដៅពីត្បូងទៅជើងបុកចំពាក់កណ្ដាលម៉ូតូ បណ្តាលឲ្យជនរងគ្រោះទាំង២នាក់ត្រូវរថយន្តកិនស្លាប់ភ្លាមៗនៅកន្លែងកើតហេតុ ចំណែកឯរថយន្តកុងតឺន័របានបើកចេញពីកន្លែងកើតហេតុប្រមាណជាង៥០ម៉ែត្រ ហើយអ្នកបើកបររថយន្តបានចុះពីរថយន្តរត់គេចខ្លួនបាត់ស្រមោល។
ក្រោយពេលកើតហេតុ ជំនាញចរាចរណ៍ខណ្ឌពោធិ៍សែនជ័យបានប្រគល់អោយជំនាញចរាចរណ៍នៃ ការិយាល័យចរាចរណ៍ផ្លូវគោករាជធានីភ្នំពេញធ្វើការវាស់វែង និងយករថយន្តកុងតឺន័រ ព្រមទាំងម៉ូតូរបស់ជនរងគ្រោះទៅរក្សាទុក ដើម្បីរង់ចាំការដោះស្រាយនៅថ្ងៃក្រោយ ។
ចំណែកសពជនរងគ្រោះទាំង២នាក់ប្តីប្រពន្ធខាងលើត្រូវបានសមត្ថកិច្ចជំនាញចរាចរណ៍រាជធានីភ្នំពេញ ធ្វើលិខិតប្រគល់សពអោយទៅក្រុមគ្រួសារដើម្បីយកទៅធ្វើបុណ្យតាមប្រពៃណីនៅឯស្រុកកំណើត ៕
ចែករំលែកព័តមាននេះ