ខេត្តក្រចេះ៖ ក្រុមមន្ត្រីនៃមន្ទីរទេសចរខេត្តបានឲ្យដឹងថា ក្នុងអំឡុងឆ្នាំ២០១៨កន្លងទៅនេះ ខេត្តក្រចេះទទួលបានភ្ញៀវទេសចរណ៍ជាតិ និងអន្តរជាតិមកទស្សនាលេងកំសាន្តនៅតាម តំបន់ទេសចរណ៍ទាំង១៦កន្លែង ក្នុងទូទាំងខេត្តសរុបចំនួន ជិត៣៥ម៉ឺននាក់ ដែលចំនួននេះ បើធៀបទៅនឹងឆ្នាំ២០១៧ គឺមានការកើនឡើងជិត៥ម៉ឺននាក់ ស្មើនឹងជាង១២% ។ ដោយឡែកភ្ញៀវអន្តរជាតិមានចំនួនជាង២ម៉ឺនាក់ ដែលចំនួននេះបើធៀបទៅនឹងឆ្នាំ២០១៧ មានតួលេខកើនឡើង។
ក្រុមមន្ត្រីនៃមន្ទីរទេសចរណ៍ខេត្តបានលើកឡើងឱ្យដឹងថា ភ្ញៀវទេសចរដែលបាន មកខេត្តក្រចេះ ភាគច្រើនផ្តោតក្នុងទិសដៅដំណើរកំសាន្តនៅតាមតំបន់រមណីយដ្ឋាននានា ក្នុងខេត្តក្រចេះក្នុងនោះរួមមានតំបន់រមណីយដ្ឋានវប្បធម៌ប្រវត្តិសាស្ត្រ រមណីយដ្ឋានធម្ម ជាតិ និងរមណីយដ្ឋានសហគមន៍កែច្នៃសរុបមានចំនួន១៦កន្លែង។
ក្រុមមន្ត្រីបានកត់សម្គាល់ទៀតថា ក្នុងចំណោមតំបន់ទេសចរណ៍ទាំង១៦កន្លែង ដែលត្រូវបានមន្ទីរសហការជាមួយអាជ្ញាធរពាក់ព័ន្ឋរៀបចំសម្រាប់ទទួលភ្ញៀវ ក្នុងនោះ តំបន់ទេសចរណ៍ទឹកជួរទន្លេមេគង្គកាំពី តំបន់ទេសចរណ៍អន្លង់ផ្សោត ក៏ដូចជាតំបន់ទេស ចរណ៍វប្បធម៌ព្រះវិហារសសរ១០០ ជាគោលដៅលេចធ្លោរបស់ភ្ញៀវទេសចរក្នុងដំណើរកម្សាន្តទៅទស្សនាក៏ដូចជាលេងលំហែ។
បើទោះជាបែបណា ការអសណ្តាប់ធ្នាប់នៅតាមតំបន់ទេសចរណ៍ ការតម្លើងថ្លៃមុខ ទំនិញម្ហូបអារហារនៅរដូវថ្ងៃបុណ្យទាននៅតាមរមណីយដ្ឋាន ក៏ដូចជាការគ្មានអនាម័យ បរិស្ថាន គឺនៅតែជាមតិលើកឡើងរបស់ភ្ញៀវសម្រាប់វិស័យទេសចរណ៍នៅខេត្តក្រចេះ។
នៅក្នុងរបាយការណ៍ប្រចាំឆ្នាំរបស់មន្ទីរទេសចរណ៍ខេត្តក្រចេះ អនុប្រធានមន្ទីរ លោក ចាន់ សុគន្ឋី បានលើកឡើងដោយបញ្ជាក់ជំហរលើផែនការចក្ខុវិស័យដើម្បី អភិវឌ្ឍន៍លើវិស័យទេសចរណ៍នៅខេត្តក្រចេះ ក្នុងឆ្នាំ២០១៩ខាងមុខនេះថា មន្ទីរនឹងសហ ការជាមួយអាជ្ញាធរពាក់ព័ន្ឋក្នុងការរៀបចំរមណីយដ្ឋានទេស
ចរណ៍ ឲ្យមានសណ្តាប់ធ្នាប់ សោភ័ណ្ឌភាព និងឲ្យមានភាពទាក់ទាញ ដើម្បីបម្រើដល់ការកំសាន្តសប្បាយរបស់ភ្ញៀវ ទេចរជាតិ និងអន្តរាជាតិឲ្យមានភាពប្រសើរ។
ការសហការជាមួយដៃគូរអង្គការពាក់ព័ន្ឋលើការធ្វើបដិសណ្ឋារកិច្ចជូនភ្ញៀវទេចសចរ ពីសហគមន៍ទេសចរដើម្បីលើកកំពស់សេវាកម្ម គុណភាព អនាម័យបរិស្ថាន នៅតាមតំបន់គោលដៅទេសចរ ជាផែនការថ្មីបន្ថែម របស់មន្ទីរទេសចរក្នុងគោលដៅអភិវឌ្ឍន៍វិស័យទេសចរនៅខេត្តក្រចេះក្នុងឆ្នាំ២០១៩នេះ៕
ចែករំលែកព័តមាននេះ