ខេត្តស្ទឹងត្រែង ៖ កម្លាំងនគរបាលប្រឆាំងបទល្មើសសេដ្ឋកិច្ចខេត្តស្ទឹងត្រែងក្រោមការបញ្ជាផ្ទាល់របស់លោកវរសេនីយ៍ឯក វ៉ា សុផាន់ ប្រធានការិយាល័យប្រឆាំងបទល្មើសសេដ្ឋកិច្ច ដឹកនាំដោយលោក ហ៊ីង មច្ចុរម្យ បានចុះស្ទាក់ចាប់រថយន្តសាំយ៉ុងដឹកឈើ១គ្រឿងទ្វារបង្អួច…
ខេត្តស្ទឹងត្រែង ៖ កម្លាំងនគរបាលប្រឆាំងបទល្មើសសេដ្ឋកិច្ចខេត្តស្ទឹងត្រែងក្រោមការបញ្ជាផ្ទាល់របស់លោកវរសេនីយ៍ឯក វ៉ា សុផាន់ ប្រធានការិយាល័យប្រឆាំងបទល្មើសសេដ្ឋកិច្ច ដឹកនាំដោយលោក ហ៊ីង មច្ចុរម្យ បានចុះស្ទាក់ចាប់រថយន្តសាំយ៉ុងដឹកឈើ១គ្រឿងទ្វារបង្អួច លក្ខណៈកែច្នៃពាក់កណ្ដាលសម្រេចបាន កាលពីយប់ទៀបភ្លឺវេលាម៉ោង៣និង៣០នាទីឈានចូលថ្ងៃទី០២ ខែមករា ឆ្នាំ២០១៩ នៅលើកំណាត់ផ្លូងជាតិលេខ៧៨A ស្ថិតនៅត្រង់ចំណុចភូមិ ស្រែពកថ្មី ឃុំក្បាលរមាស ស្រុកសេសាន ខេត្តស្ទឹងត្រែង ។
បើតាមប្រភពមួយបានបង្ហើបឲ្យដឹងថា រថយន្តសាំយ៉ុងដឹកទ្វារបង្អួចដែលកម្លាំងសមត្ថកិច្ចធ្វើការបង្ក្រាបបានខាងលើនោះ គឺបានធ្វើការដឹកចេញពីភូមិស្រែគរថ្មី ឃុំស្រែគរ ស្រុកសេសានខេត្តស្ទឹងត្រែង ឆ្លងកាត់ទំនប់វារីអគ្គិសនីសេសានក្រោម២ ដែលមានបារ៉ាស់ដាក់កម្លាំងសមត្ថកិច្ចយាមត្រឹមត្រូវនៅតែថ្លោះធ្លោយអោយរថយន្តដឹកឈើឆ្លងកាត់រួច ។
ប្រភពដដែលបានបន្តទៀតថា រថយន្តសាំយ៉ុងដែលដឹកទ្វារបង្អួចចេញពីតំបន់ភូមិស្រែគរថ្មី ឃុំស្រែគរ ស្រុកសេសាន ជារៀងរាល់ថ្ងៃ យប់មិនលោះថ្ងៃសោះឡើយ គឺសមត្ថកិច្ចធ្លាប់បានបង្ក្រាបម្ដងពីរដងរួចមកហើយដែរ តែក្រុមឈ្មួញទាំងនោះនៅតែផ្គើនដដែល ។
ប្រភពដដែលបានបន្ថែមទៀតថា ទីតាំងភូមិសាស្ត្រដែលក្រុមឈ្មួញរថយន្តសាំយ៉ុងដឹកចេញជារៀងរាល់យប់ថ្ងៃនោះ គឺមានសិប្បកម្មជាច្រើនកន្លែង ។ បច្ចុប្បន្នរថយន្តសាំយ៉ុងដែលសមត្ថកិច្ចបង្ក្រាបបានត្រូវបានអូសយកមកទុកនៅក្នុងស្នងការនគរបាលខេត្តស្ទឹងត្រែង និងរង់ចាំធ្វើការប្រគល់ទៅឲ្យជំនាញរដ្ឋបាលព្រៃឈើ ដើម្បីចាត់កាបន្ត ៕
ចែករំលែកព័តមាននេះ