រាជធានីភ្នំពេញ ៖ រថយន្ដស៊េរីទំនើបមួយគ្រឿងម៉ាក Ferrari ទើបចេញពីខារ៉ាអូខេបើកបរក្នុងលឿនដូចហោះទៅបុករះរបាំងថ្មពុះចែកទ្រូងផ្លូវ បណ្តាលអោយបាក់ដួលរលំអស់៤កង់ ហើយរថយន្ដបង្កបានដាច់កង់ឆ្វេងអស់មួយ និងរេចង្កូតទៅបុកហាងមួយកន្លែងទៀត បណ្តាលអោយរងការខូចខាតបន្ថែមទៀត បន្ទាប់មកក៏មានរថយន្តម៉ាកកាមរីឆ្លាមមួយគ្រឿងទៀតបើកបញ្ច្រាសទិសគ្នាទៅបុកកង់របស់រថយន្តបង្ក បណ្តាលអោយរងការខូចខាតរថយន្តកាមរីយ៉ាងដំណំ ។
ហេតុការណ៍នេះបានកើតឡើងកាលពីវេលាម៉ោង២និង៤៥នាទីឈានចូលថ្ងៃទី១ ខែមករាឆ្នាំ២០១៩ នៅមុខហាងចិនយីហោបង្កងនាគ ផ្ទះលេខ៤១៤AB មហាវិថីព្រះមុនីវង្ស សង្កាត់បឹងកេងកង១ ខណ្ឌចំការមន ។
រថយន្តបង្កខាងលើម៉ាកFerrari ពណ៌ខៀវ ពាក់ស្លាកលេខ ភ្នំពេញ ២AZ-៣៣៣៣ បើកបរដោយបុរសជនជាតិចិនម្នាក់ និងរួមដំណើរដោយស្ត្រីម្នាក់ទៀត។
តាមប្រភពព័ត៌មានពីអ្នកឃើញហេតុការណ៍ផ្ទាល់បានឲ្យដឹងថា មុនកើតហេតុ គេឃើញរថយន្ដបង្កខាងលើ បើកចេញពីខារ៉ាអូខេមួយកន្លែងនៅជិតកន្លែងកើតហេតុ ធ្វើដំណើរតាម បណ្ដោយមហាវិថីព្រះមុនីវង្ស ក្នុងទិសដៅពីត្បូងទៅជើង គ្រាន់តែចេញពីខារ៉ាអូខេភ្លាម រថយន្ដបង្កនោះជាន់ហ្គ៊ែរមួយទំហឹង លឿនដូចហោះទៅមុខបាន១០០ម៉ែត្រ ក៏ទៅបុករះរបាំងថ្មពុះចែកទ្រូងផ្លូវ បណ្តាលអោយបាក់ដួលរលំអស់៣កង់ ចំណែករថយន្ដបង្កបានដាច់កង់មុខខាងឆ្វេងខ្ទាតទៅចូលផ្លូវម្ខាងទៀត និងរេចង្កូតមកខាងស្តាំទៅបុកនឹងស្លាកហាងផឹកស៊ីចិនមួយកន្លែងយីហោ បង្កងនាគ បណ្តាលអោយខ្ទេចស្លាកយីហោអស់មួយផ្ទាំង និងបាក់ដួលរលំតុពេញមុខហាង។
ភ្លាមៗនោះ ក៏មានរថយន្តមួយគ្រឿងទៀតជិះគ្នា២នាក់ម៉ាកកាមរីឆ្លាម ពាក់ស្លាកលេខ ភ្នំពេញ ២G-៦២៥៤បានបុកកង់របស់រថយន្តបង្ក បណ្តាលអោយរថយន្តម៉ាកកាមរីឆ្លាមនោះដាច់កាឡេកង់ខាងឆ្វេងរងការខូចខាត ចំណែកបុរស២នាក់ដែលជិះក្នុងរថយន្តម៉ាកកាមរីឆ្លាមនោះមិនមានរងរបួសអ្វីទេ ។
ក្រោយកើតហេតុ អ្នកបើកបររថយន្តបង្កបានគេចខ្លួនចេញពីកើតហេតុទៅបាត់ បន្សល់ទុកតែរថយន្តនៅកន្លែងកើតហេតុ អោយសមត្ថកិច្ចវាស់វែង និងស្ទូចយកទៅរក្សាទុកនៅការិយាល័យនរគរបាលចរាចរណ៍ផ្លូវគោកនៃស្នងការដ្ឋានរាជធានីភ្នំពេញដើម្បីដោះស្រាយគ្នានៅពេលក្រោយតាមផ្លូវច្បាប់ ចំណែករថយន្តម៉ាកកាមរីឆ្លាម ត្រូវបានម្ចាស់យកទៅជួសជុលដោយខ្លួនឯង ៕
ចែករំលែកព័តមាននេះ