ខេត្តឧត្តរមានជ័យ ៖ បុរសជាជនជាតិចិន២នាក់និងស្ត្រីខ្មែរម្នាក់ ដែលត្រូវជាសង្សារនឹងគ្នា បានត្រូវនគរបាលឃាត់ខ្លួនពីបទជាប់ពាក់ព័ន្ធនឹងករណីលួចទូរស័ព្ទដៃចំនួន១៤៣គ្រឿងរបស់ក្រុមហ៊ុនអនឡាញ កាលពីវេលាម៉ោង៦ល្ងាច ថ្ងៃទី២៦ ខែធ្នូ នៅក្នុងបរិវេណកាស៊ីណូអូរស្មាច់រីសត ស្ថិតក្នុងភូមិអូរស្មាច់ សង្កាត់អូរស្មាច់ ក្រុងសំរោង ។
ជនទាំង៣នាក់នេះមាន ៖ ១-ឈ្មោះ សៀ ជីសៀង(XIE Jixiang) ភេទប្រុស អាយុ២៤ឆ្នាំ គ្មានលិខិតឆ្លងដែន ២-ឈ្មោះលី ជាសៀង (Li xiaxiang) ភេទប្រុស អាយុ២៧ឆ្នាំ គ្មានលិខិតឆ្លងដែន និង៣-ឈ្មោះ សុំ ស្រីល័ក្ខ ភេទស្រី អាយុ២៦ឆ្នាំ ទីលំនៅក្នុងសង្កាត់ព្រែកកក់ ស្រុកស្ទឹងត្រង់ ខេត្តកំពង់ចាម ។ ស្ត្រីរូបនេះ ជាស្រីស្នេហ៍របស់ជនជាតិចិនម្នាក់ក្នុងចំណោមពួកគេ២នាក់ ។
នគរបាលក្រុងសំរោងឱ្យដឹងថា ជនជាតិចិនទាំង២នាក់និងស្ត្រីខ្មែរម្នាក់ខាងលើ បាននាំគ្នាធ្វើដំណើរពីខេត្តព្រះសីហនុ កាលពីថ្ងៃទី២៥ ខែធ្នូ ឆ្ពោះមកកាន់ខេត្តឧត្តរមានជ័យ និងស្នាក់នៅផ្ទះសំណាក់មួយមានយីហោឆៃណា ក្នុងភូមិដើមច្រេស សង្កាត់អូរស្មាច់ ក្រុងសំរោង ។
នៅព្រឹកថ្ងៃទី២៦ ខែធ្នូ ពួកគេទាំង៣នាក់បានបន្លំខ្លួនធ្វើជាបុគ្គលិកកាស៊ីណូអូរស្មាច់រីសត តែនៅពេលផ្នែកសន្តិសុខសាកសួររកប័ណ្ណសម្គាល់ខ្លួនដែលបម្រើការងារ ក្រុមជននេះឆ្លើយថាភ្លេចនៅក្នុងបន្ទប់ដេក ។ លុះនៅវេលាម៉ោង៦ល្ងាចថ្ងៃដដែល ជនទាំង៣នាក់បានលួចចូលតាមរបង គាស់បន្ទប់ក្រុមហ៊ុនលក់ទូរស័ព្ទយកអស់១៤៣គ្រឿង រួចយកទៅលាក់ទុកក្នុងធុងសំរាមក្បែររបងក្រុមហ៊ុន ។
នគរបាលបញ្ជាក់ថា ក្រោយពីបានធ្វើសកម្ម ភាពលួចបានសម្រេចហើយ ក៏ត្រូវសន្តិសុខក្រុមហ៊ុនឃើញជនជាតិចិនដើរយួរវ៉ាលីសមកក្បែររបងធ្វើឲ្យមានការសង្ស័យក៏រាយការណ៍ទៅនគរបាលមកធ្វើឆែកឆេរ ឃើញទូរស័ព្ទដៃជាច្រើនគ្រឿងទើបដឹងថាជននេះលួចពីក្រុមហ៊ុន ក៏នាំខ្លួនទៅប៉ុស្គិ៍នគរបាលសង្កាត់អូរស្មាច់ធ្វើការសាកសួរ ។
នៅចំពោះមុខសមត្ថកិច្ច ជនទាំង៣នាក់ឆ្លើយសារភាពថា ពួកខ្លួនពិតជាបានប្រព្រឹត្តសកម្មភាពលួចទូរស័ព្ទនោះមែន និងបានកសាងសំណុំរឿងបញ្ជូនទៅសាលាដំបូងខេត្ត ៕
ចែករំលែកព័តមាននេះ