រាជធានីភ្នំពេញ ៖ ឈ្មោះទួលគោកជាខណ្ឌមួយក្នុងចំណោមខណ្ឌទាំង១២ ក្នុងរាជធានីភ្នំពេញ ហើយក៏ជាខណ្ឌមួយស្ថិតនៅកណ្តាលរាជធានី ដែលជាទីប្រជុំជនមួយមានផ្សាររដ្ឋ ឯកជនតូច-ធំ ប្រមាណជាង១០ផ្សារ ។ លោក…
រាជធានីភ្នំពេញ ៖ ឈ្មោះទួលគោកជាខណ្ឌមួយក្នុងចំណោមខណ្ឌទាំង១២ ក្នុងរាជធានីភ្នំពេញ ហើយក៏ជាខណ្ឌមួយស្ថិតនៅកណ្តាលរាជធានី ដែលជាទីប្រជុំជនមួយមានផ្សាររដ្ឋ ឯកជនតូច-ធំ ប្រមាណជាង១០ផ្សារ ។
លោក ឯក ឃុនដឿន អភិបាលខណ្ឌ បានឱ្យដឹងថា ខណ្ឌទួលគោកមានព្រំប្រទល់ ខាងកើតទល់នឹងវិថីនេរុហ៍ខណ្ឌ៧មករា និងផ្លូវលេខ១៣២ខណ្ឌដូនពេញ ។ ខាងជើងទល់នឹងផ្លូវលេខ២៧៣ និងផ្លូវលេខ៣៥៥ ជាប់ព្រំប្រទល់ខណ្ឌឫស្សីកែវ ។ ខាងលិចទល់ផ្លូវលេខ៥៩៨ ខណ្ឌឫស្សីកែវ ផ្លូវលេខ២៧១ ខណ្ឌសែនសុខ និងខណ្ឌមានជ័យ ។ ខាងត្បូងទល់នឹងវិថីព្រះមុនីរ៉េត ខណ្ឌចំការមន ។ ខណ្ឌទួលគោកមានផ្ទៃដីទំហំ៧,៩៨គីឡូម៉ែត្រការ៉េ ស្មើនឹង១,១៧ភាគរយនៃផ្ទៃដី រាជធានីភ្នំពេញ ។ ខណ្ឌចែងចែកជា១០សង្កាត់ ១៤៣ភូមិ ៩៩មណ្ឌល រដ្ឋបាល៥៤២ក្រុម មានប្រជាពលរដ្ឋ សរុបចំនួន១២៧.៥០៧នាក់ មានស្រី្តចំនួន៦៥.២៥១នាក់ មានដង់ស៊ីតេប្រជាជន១៥.៩៥៨នាក់ ក្នុង១គីឡូម៉ែត្រការ៉េ ។
ខណ្ឌទួលគោក ជាតំបន់ពាណិជ្ជកម្ម សេវាកម្ម សិប្បកម្ម និងជាតំបន់ស្នាក់នៅផងដែរ ព្រមទាំងមានមជ្ឈមណ្ឌលពាណិជ្ជកម្មចំនួន២ គឺមជ្ឈមណ្ឌលម៉ុងឌីយ៉ាល់ និងមជ្ឈមណ្ឌលទួលគោក ។
លោកអភិបាលខណ្ឌ បានឱ្យដឹងទៀតថា ខណ្ឌទួលគោកជាទីប្រជុំជនមានផ្សាររដ្ឋសំខាន់ៗចំនួន៤ គឺ៖
១-ផ្សារទួលគោក (វិនិយោគឱ្យឯកជន) ស្ថិតនៅសង្កាត់បឹងកក់ទី២ មានទំហំ១១.៧០០ម៉ែត្រការ៉េ មានចំនួន៥៧២តូបស្តង់ ។ ២-ផ្សារដើមគស្ថិតនៅសង្កាត់ផ្សារដើមគ មានទំហំ១០.៤១២ម៉ែត្រការ៉េ មាន៨២៥តូបស្តង់ ។ ៣-ផ្សារដេប៉ូ (វិនិយោគឯកជន) ស្ថិតនៅសង្កាត់ផ្សារដេប៉ូទី១ មានទំហំ៩.៧៨១ម៉ែត្រការ៉េ មានចំនួន៥៤០តូប និងស្តង់ធំៗ ។ ៤-ផ្សារសាមគ្គី ស្ថិតនៅសង្កាត់ផ្សារដេប៉ូទី៣ មានទំហំ៥.៥០៨ម៉ែត្រការ៉េ មានចំនួន៦៤៨តូប ស្តង់ ។
ក្រៅពីផ្សារសំខាន់របស់រដ្ឋ ធំៗនោះនៅមានផ្សាររដ្ឋ និងឯកជនមួយចំនួនទៀត ដូចជាផ្សារមាន់អាំង(រដ្ឋ) ផ្សារ៧មករា(រដ្ឋ) ផ្សារនាគមាស(ឯកជន) ផ្សារសំណង់១២(ឯកជន),ផ្សារT K (ឯកជន) ផ្សារផ្លែឈើអា៥ ស្ថិតនៅសង្កាត់ផ្សារដើមគ មាន១១១តូប ផ្សារបន្លែនៅសង្កាត់ផ្សារដើមគមាន៨១តូប ព្រមទាំងមានផ្សារឯកជនតូចៗ ដែលជាផ្សារហៅថាម៉ាត ជាច្រើនកន្លែងទៀត ។ មានផ្សារក្រមូន ដូចជាផ្សារគីឡូម៉ែត្រលេខ៤ ផ្សារញ៉ែ ។ ផ្សារនីមួយៗត្រូវបានគេដឹងថា សុទ្ធតែមានប្រវត្តិ ដែលផ្សារខ្លះអាជ្ញាធរនិងប្រជាពលរដ្ឋដាក់ឱ្យ និងបានហៅតៗរហូតមកដល់បច្ចុប្បន្ន ។
លោក វ៉ាន់ សារ៉េត ចៅសង្កាត់បឹងកក់ទី២ បានឱ្យដឹងថា នៅក្នុងសង្កាត់របស់លោកមានផ្សារចំនួន៣ គីផ្សារទួលគោក ផ្សារមាន់អាំង និងផ្សារ៧មករា ។
លោកចៅសង្កាត់បានឱ្យដឹងទៀតថា ផ្សារទួលគោកជាផ្សារធំមួយរបស់រដ្ឋដែលមានតាំងពីសង្គមចាស់ហើយនៅកំឡុងឆ្នាំ២០០០ រាជរដ្ឋាភិបាលក៏បានវិនិយោគផ្សារនេះទៅឱ្យក្រុមហ៊ុនឯកជនរបស់ចិន ហើយបន្តបើកផ្សារលក់ដូររហូតមកដល់ពេលនេះ ។ ចំណែកផ្សារ៧មករា ជាផ្សាររដ្ឋដែលស្ថិតនៅលើដីចំនួន២ឡូត៍ មានទំហំប្រមាណ៣០ម៉ែត្រគុណ នឹង៨០ម៉ែត្រ ។ ផ្សារនេះបានកកើតឡើងតាំងពីឆ្នាំ១៩៨០ គីក្រោយថ្ងៃរំដោះ៧មករា ដែលប្រជាពលរដ្ឋបាននាំគ្នាមកលក់ដូររហូតមក ។
ទន្ទឹមនឹងប្រជាពលរដ្ឋនាំគ្នាលក់ដូរ អាជ្ញាធរ ដែលកាលនោះក៏បានដាក់ឈ្មោះថា ផ្សារ៧មករា ព្រោះកើតឡើងក្រោយថ្ងៃ៧មករា ហើយប្រជាពលរដ្ឋក៏បាននាំគ្នាឱ្យឈ្មោះថា ផ្សារ៧មករារហូតមក ។ បច្ចុប្បន្នទីតាំងដីផ្សារនេះមានប្រជាពលរដ្ឋរស់នៅលក់ដូរ ប្រមាណ៣០គ្រួសាររួមជាមួយប្រជាពលរដ្ឋជាច្រើនគ្រួសារទៀត ដែលមានដីនៅក្បែរនោះក៏បានលក់ដូរ ក្លាយជាទីប្រជុំជនមួយ ។
ដោយឡែកផ្សារមាន់អាំង ត្រូវបានលោក ចៅសង្កាត់ឱ្យដឹងថា ជាឈ្មោះផ្សារមួយដែលកើតចេញពីការលក់ដូរទៅតាមដងផ្លូវ តាំងពីសម័យសង្គមរាស្ត្រនិយមមកម្ល៉េះ ។ បន្ទាប់ពីថ្ងៃរំដោះ ៧មករា នៅកំឡុងឆ្នាំ១៩៨៣ ប្រជាពលរដ្ឋ ក៏បាននាំគ្នាបន្តលក់ដូរនៅតាមចិញ្ចើមផ្លូវលេខ៣១៥ ហើយអាជ្ញាធរសង្កាត់ក៏បានរៀបចំសណ្តាប់ធ្នាប់ ហើយក៏បានឱ្យពួកគាត់ទៅលក់ដូរលើដីរបស់ចៅសង្កាត់ដែលបានថែរក្សា ចំនួន២ឡូត៍ ដែលមួយឡូត៍មានទំហំ៤០ម៉ែត្រគុណ៦០ម៉ែត្រ ។ នៅឆ្នាំ១៩៨៧ នៅពេលដែលលោកទៅក៥ ត្រូវបានរដ្ឋដាក់បញ្ចូលដីនោះ ក្នុងអាំងវង់ទែរបស់រដ្ឋ ហើយដីនោះក៏បានក្លាយទៅជាផ្សារមាន់អាំងលក់ដូរ រហូតមកដល់បច្ចុប្បន្ន ។
ដោយឡែកផ្សារញ៉ែវិញ បានកើតឡើងតាំងពីឆ្នាំ១៩៧៩ ដោយសារតែយោធានៅអគ្គបញ្ជាការដ្ឋានបាននាំគ្នាទៅទិញបារី ផឹកស្រា និងទឹកត្នោតជូរហើយអង្គុយញ៉ែអ្នកលក់ដូរលេងយ៉ាងរងុំ រហូតដល់យប់ជ្រៅជារៀងរាល់ថ្ងៃយប់ហើយត្រូវបានប្រជាពលរដ្ឋហៅថា ផ្សារញ៉ែ ហើយជាប់ឈ្មោះរហូតមកដល់សព្វថ្ងៃនេះ ។
ប្រវត្តិផ្សារញ៉ែនេះ ក៏ជាប្រវត្តិស្នេហ៍របស់មន្ត្រីយោធាមួយចំនួនផងដែរ ដែលបានទៅផឹកស្រាញ៉ែអ្នកលក់រហូតបានគ្នាជាប្តីប្រពន្ធពូនជាកូនជាចៅ ។ នៅមានផ្សារមួយចំនួនទៀត សុទ្ធតែមានប្រវត្តិរបស់ខ្លួន ដែលកោះសន្តិភាពពុំបានលើកយកមកអត្ថាធិប្បាយឱ្យបានអស់នោះឡើយ ៕
ចែករំលែកព័តមាននេះ