រាជធានីភ្នំពេញ ៖ ប្រជាពលរដ្ឋចំនួន១៤គ្រួសារ រស់នៅតាមផ្លូវលេខ១៩៧២ ស្ថិតក្នុងភូមិពោងពាយ សង្កាត់ភ្នំពេញថ្មី ខណ្ឌសែនសុខ បាននាំគ្នាផ្ទុះការតវ៉ាដោយលើកបដាព្រោងព្រាតប្រឆាំងអាជ្ញាធរខណ្ឌ ដែលព្យាយាមចុះទៅរុះរើរបងរបស់ពួកគាត់ដោយចោទថា បានធ្វើរំលោភលើដីផ្លូវ ។
ការតវ៉ានេះបានកើតឡើងកាលពីវេលាម៉ោងប្រមាណ៤រសៀលថ្ងៃទី២៤ ខែធ្នូ បន្ទាប់ពីអាជ្ញាធរប៉ុនប៉ងទៅរុះរើរបងនោះ តែមិនបានសម្រេច តែបានព្រមានថានឹងចុះមករុះរើទៀត ។ ការធ្វើរបងរបស់ពលរដ្ឋនោះ ត្រូវបានលោកម៉ូវ ម៉ានិត អភិបាលខណ្ឌសែនសុខ ចោទប្រកាន់ប្រជាពលរដ្ឋថា បោះបង្គោលរបងលើដីផ្លូវយកធ្វើជាកម្មសិទ្ធិផ្ទាល់ខ្លួន ហើយលោកបានបញ្ជាឲ្យរុះរើ ។
ទន្ទឹមនឹងការលើកបដាតវ៉ានេះ ពលរដ្ឋក៏បានចោទអាជ្ញាធរខណ្ឌសែនសុខវិញថា អយុត្តិធម៌ដែលបានការពារបុគ្គលឲ្យបោះបង្គោលរំលោភយកដីផ្លូវប្រវែងប្រមាណ៥ម៉ែត្រ ហើយនៅពេលដែលពួកគាត់បោះ
បង្គោលការពារដីរបស់ខ្លួន បែរជាត្រូវអាជ្ញាធររារាំងនិងព្យាយាមប្រើអំណាចមករុះរើដោយចោទថាពួកគាត់រំលោភដីផ្លូវទៅវិញ ។
ប្រជាពលរដ្ឋបានឲ្យដឹងថា ទីតាំងដីដែលពួកគាត់បោះបង្គោលនេះ គឺពួកគាត់បានកាន់កាប់តាំងពីឆ្នាំ១៩៨៣មកម្លេ៉ះ ដោយមានបង្កាន់ដៃបណ្តោះអាសន្ន ប៉ុន្តែគ្មានប័ណ្ណកម្មសិទ្ធិឡើយ ។ លុះមកដល់ឆ្នាំ២០០៥ អាជ្ញាធរបានចុះវែងធ្វើប្លង់រឹងជូនប្រជាពលរដ្ឋក្នុងមូលដ្ឋានភូមិពោងពាយ ពួកគាត់ក៏បានស្នើសុំធ្វើប័ណ្ណកម្មសិទ្ធិ ប៉ុន្តែអាជ្ញាធរមិនបានចេញប័ណ្ណឲ្យទេដោយអះអាងថា ទីតាំងដែលពួកគាត់ស្នាក់នៅប៉ះពាល់លើចំណីផ្លូវ ។
គួរបញ្ជាក់ថា ពលរដ្ឋចំនួន១៤គ្រួសារបានផ្ទុះការតវ៉ាជាបន្តបន្ទាប់ ដែលលើកទី១កាលពីរសៀលថ្ងៃទី១៩ ខែវិឆ្ឆិកា ឆ្នាំ២០១៨ កន្លងមកបន្ទាប់អាជ្ញាធរនិងមន្ត្រីជំនាញចុះទៅវាស់វែងបោះបង្គោលនោះ ដោយប្រជាពលរដ្ឋបាននាំគ្នារារាំងមិនឲ្យបោះបង្គោលនិងចោទប្រកាន់ថា ការបោះបង្គោលរបស់អាជ្ញាធរនោះគីរំលោភលើដងផ្លូវលេខ១៩៧២ ។ លុះក្រោយមកជាលើកទី២នៅថ្ងៃទី២៩ ខែវិច្ឆិកា អាជ្ញាធរក៏បានបន្តទៅហ៊ុមព័ទ្ធរបងនោះទៀត តែមិនបានសម្រេចដោយប្រជាពលរដ្ឋរារាំង និងលើកទី៣នៅរសៀលថ្ងៃទី១ ខែធ្នូ រហូតបានសម្រេច ។
បន្ទាប់ពីមានការធ្វើរបងដែលការពារដោយអាជ្ញាធរនោះ ប្រជាពលរដ្ឋក៏បានធ្វើរបងការពារដីរបស់ខ្លួនវិញ និងត្រូវបានអាជ្ញាធរចុះទៅរុះរើនៅវេលាម៉ោង១២ថ្ងៃត្រង់ថ្ងៃទី២៤ ខែធ្នូ តែត្រូវបានប្រជាពលរដ្ឋរារាំងវិញ ។
ទោះបីជាយ៉ាងណា អាជ្ញាធរបានទទូចសុំឲ្យប្រជាពលរដ្ឋរើដោយខ្លួនឯង បើពុំរុះរើទេអាជ្ញាធរខណ្ឌសែនសុខ នឹងបន្តចុះទៅរុះរើ នៅវេលាម៉ោង៣រសៀលថ្ងៃទី២៤ ខែធ្នូ ទើបប្រជាពលរដ្ឋបន្តលើបដាតវ៉ា និងស្រែកថាអយុត្តិធម៌ ។ បន្ទាប់ពីលើកបដា នៅរសៀលថ្ងៃនោះប្រជាពលរដ្ឋក៏បានលើកគ្នាទៅតវ៉ានៅផ្ទះមេភូមិផងដែរ ៕
ចែករំលែកព័តមាននេះ