រាជធានីភ្នំពេញ ៖ បុរសម្នាក់បើកបរម៉ូតូក្នុងល្បឿនលឿនវាក់អើនឹងរថយន្តឆ្លងផ្លូវបុកចំពាក់កណ្ដាលរថយន្ត បណ្តាលឲ្យអ្នកបើកបរម៉ូតូស្លាប់យ៉ាងអាណោចអាធ័ម ចំណែករថយន្តបានបើកគេចបាត់ បង្កឲ្យមានការភ្ញាក់ផ្អើលកាលពីវេលាម៉ោង២នឹង៣០នាទីរំលងអធ្រាត្រឈានចូលថ្ងៃទី២៦ ខែធ្នូ ឆ្នាំ២០១៨ នៅតាមបណ្ដោយផ្លូវជាតិលេខ៤កែងស្តុបផ្លូវទំនប់កប់ស្រូវ ដែលស្ថិតនៅភូមិជម្ពូវ័ន សង្កាត់ចោមចៅទី៣ ខណ្ឌពោធិ៍សែនជ័យ។
ជនរងគ្រោះដែលស្លាប់ឈ្មោះ ទី ស៊ីដេ ភេទប្រុស អាយុ២៣ឆ្នាំ ជាមន្ត្រីកងរាជអាវុធហត្ថ រស់នៅភូមិ តាឯកឃុំតាឯក ស្រុកខ្សាច់កណ្ដាល ខេត្តកណ្ដាល ជាអ្នកបើកបរម៉ូតូមួយគ្រឿងម៉ាក XR ពណ៌ខ្មៅ ពាក់ស្លាកលេខ ភ្នំពេញ ១GN-៩៣៦៤ ។
តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុ គេឃើញជនរងគ្រោះខាងលើបើកបរម៉ូតូមួយគ្រឿង ក្នុងទិសដៅពីកើតទៅលិច លុះមកដល់ចំណុចកើតហេតុចំណុចកើតហេតុខាងលើ ស្រាប់តែមានរថយន្តមួយគ្រឿងម៉ាកសាំយ៉ុង ពណ៌លឿង បើកបរក្នុងទិសដៅពីលិចទៅកើត លុះបើកមកដល់ចំណុចកើតហេតុ រថយន្តម៉ាកសាំយ៉ុងបានបត់ឆ្វេងទៅផ្លូវទំនប់កប់ស្រូវ ។
ពេលនោះជនរងគ្រោះជាន់ហ្វ្រាំងម៉ូតូមិនជាប់បានបុករថយន្តចំពាក់កណ្តាលពេញទំហឹង បណ្ដាលឲ្យអ្នកបើកបរម៉ូតូបោកនឹងកញ្ចក់រថយន្តរយះមុខ និងបាក់ដៃជាច្រើនកំណាត់បោកនឹងថ្នល់ជាច្រើនត្រឡប់ស្លាប់ភ្លាមៗនៅកន្លែងកើតហេតុផងដែរ។
ប្រភពព័ត៌មានបានបន្តទៀតថា ភ្លាមៗនោះរថយន្តម៉ាកសាំយ៉ុងបានបត់ត្រឡប់ក្រោយវិញ មិនបើកតាមផ្លូវទំនប់កប់ស្រូវទៀតនោះទេ ដោយបើកគេចបាត់ស្រមោល។
ក្រោយពេលកើតហេតុ ជំនាញចរាចរណ៍ខណ្ឌពោធិ៍សែនជ័យបានធ្វើលិខិតប្រគល់សពអោយក្រុមគ្រួសារ
នៃសពដើម្បីយកទៅធ្វើបុណ្យ តាមប្រពៃណីនៅឯស្រុកកំណើត ៕
ចែករំលែកព័តមាននេះ