រាជធានីភ្នំពេញ ៖ រដ្ឋបាលខេត្តព្រះសីហនុបានត្រៀមបន្ទប់ស្នាក់នៅជិត៩.០០០បន្ទប់ និងតង់ចំនួន៣០០ សម្រាប់ទទួលភ្ញៀវទេសចរជាតិ និងអន្តរជាតិ នាបុណ្យបុណ្យឆ្លងឆ្នាំសកល ២០១៨-២០១៩ខាងមុខនេះ ។ អភិបាលខេត្តព្រះសីហនុ…
រាជធានីភ្នំពេញ ៖ រដ្ឋបាលខេត្តព្រះសីហនុបានត្រៀមបន្ទប់ស្នាក់នៅជិត៩.០០០បន្ទប់ និងតង់ចំនួន៣០០ សម្រាប់ទទួលភ្ញៀវទេសចរជាតិ និងអន្តរជាតិ នាបុណ្យបុណ្យឆ្លងឆ្នាំសកល ២០១៨-២០១៩ខាងមុខនេះ ។
អភិបាលខេត្តព្រះសីហនុ លោក យន្ត មីនមានប្រសាសន៍កាលព្រឹកថ្ងៃទី២៣ ខែធ្នូ កន្លងមកថា រដ្ឋបាលខេត្ត បានត្រៀមរៀបចំរួចជាស្រេចនូវព្រឹត្តិការណ៍បុណ្យឆ្លងឆ្នាំសកល ២០១៨-២០១៩ នៅឆ្នេរឯករាជ្យ ស្ថិតក្នុងសង្កាត់លេខ៣ ក្រុងព្រះសីហនុ និងរៀបចំនូវព្រឹត្តិការណ៍ជាច្រើន ដូចជា ការប្រគំតន្ត្រីរយៈពេល៤ថ្ងៃ គឺចាប់ពីថ្ងៃទី២៨ ដល់ថ្ងៃទី៣១ ខែធ្នូ ឆ្នាំ២០១៨ ដើម្បីអបអរសាទរបុណ្យឆ្លងឆ្នាំសកលនៅឆ្នេរឯករាជ្យ ដែលមានតារាល្បីៗនៅកម្ពុជា ចូលរួមសម្ដែងផងដែរ ។
លោកអភិបាលខេត្ត បានបន្ដថា រដ្ឋបាលខេត្តព្រះសីហនុ បានត្រៀមបន្ទប់ស្នាក់នៅជិត ៩.០០០បន្ទប់ ក្រៅពីបន្ទប់សណ្ឋាគារ និងផ្ទះសំណាក់ រដ្ឋបាលខេត្ត ក៏បានត្រៀមរៀបចំតង់ស្នាក់នៅចំនួន៣០០បន្ថែមទៀត នៅចុងឆ្នេរអូរឈើទាល (ឆ្នេរអារីស្តុន) ចំពោះតង់នីមួយមានតម្លៃចាប់ពី១៥ សម្រាប់មនុស្ស២នាក់។ ចំណែក២០ដុល្លាអាមេរិក សម្រាប់មនុស្ស៤នាក់ និងមានរៀបចំភ្លើងបំភ្លឺពេលយប់ បង្គន់អនាម័យចល័តចំនួន៤០ បន្ទប់សម្រាប់ផ្លាស់ប្តូរសម្លៀកបំពាក់ភ្ញៀវ និងការការពារសន្តិសុខ សុវត្ថិភាពសម្រាប់ភ្ញៀវស្នាក់នៅប្រកបដោយផាសុកភាពថែមទៀត ។
ទន្ទឹមនោះ រដ្ឋបាលខេត្ត សហការជាមួយសភាពាណិជ្ជកម្មខេត្តព្រះសីហនុ បានរៀបចំស្តង់ពិព័រណ៍ចំនួន២៥០ស្តង់ ដាក់បង្ហាញនូវផលិតផលខ្មែរ ដើម្បីត្រៀមរៀបចំអបអរសាទរបុណ្យឆ្លងឆ្នាំសកល២០១៨-២០១៩ ដើម្បីឲ្យប្រជាពលរដ្ឋ ក៏ដូចជាភ្ញៀវទេសចរជាតិ និងអន្តរជាតិចូលមកទស្សនាកម្សាន្តនៅខេត្តព្រះសីហនុ កាន់តែច្រើនឡើងបន្ថែមទៀត ។
ទីប្រឹក្សាសមាគមទីភ្នាក់ងារទេសចរណ៍កម្ពុជា លោក ហូ វណ្ឌី បានថ្លែងថា វាជារឿងល្អប្រសើរ ដើម្បីបញ្ចប់មន្ទិលទាក់ទងនឹងតម្លៃនិងកង្វះខាតបន្ទប់ស្នាក់នៅរបស់ភ្ញៀវ ប៉ុន្តែដើម្បីទាក់ទាញភ្ញៀវទេសចរបន្ថែមទៀត អាជ្ញាធរខេត្តត្រូវធ្វើការងារសំខាន់ៗជាច្រើនដូចជា រៀបចំសណ្តាប់ធ្នាប់របៀបរៀបរយ និងធានាឲ្យបាននូវសន្តិសុខសុវត្ថិភាពសម្រាប់ភ្ញៀវទេសចរ ពិសេសរៀបចំសេវាកម្មស្នាក់នៅ ជាមួយនឹងតម្លៃសមរម្យមួយដែលអាចឲ្យភ្ញៀវទេសចរជាតិ អាចទទួលយកបាន ។ លោកបន្តថា ៖« កំណើនភ្ញៀវទេសចរនៅក្រុងព្រះសីហនុ នឹងកើនឡើងវិញនាពេលអនាគត ខណៈទីក្រុងនេះនៅតែមានភាពទាក់ទាញ »។
សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានថ្លែងក្នុងពិធីបុណ្យសមុទ្រនៅខេត្តកោះកុង កាលពីពាក់កណ្តាលខែធ្នូ កន្លងមកដោយជំរុញឲ្យអាជ្ញាធរខេត្តព្រះសីហនុ ពង្រឹងការរៀបចំសន្តិសុខ សណ្តាប់ធ្នាប់ឲ្យបានល្អប្រសើរសម្រាប់ភ្ញៀវទេសចរជាតិ និងអន្តរជាតិ ពិសេសរៀបចំប្រព័ន្ធចម្រោះទឹកស្អាតឲ្យបានល្អប្រសើរ ដើម្បីបញ្ជៀសការបង្ហូរទឹកកខ្វក់ចូលក្នុងសមុទ្រ ៕
ចែករំលែកព័តមាននេះ