រាជធានីភ្នំពេញ ៖ មន្ត្រីជាន់ខ្ពស់ក្រសួងពាណិជ្ជកម្មបានអះអាងថា គិតត្រឹមវិច្ឆិកាឆ្នាំ២០១៨នេះ ការនាំចេញទំនិញកម្ពុជា តាមប្រព័ន្ធអនុគ្រោះពាណិជ្ជកម្ម គឺមានទំហំទឹកប្រាក់ប្រមាណជាង១០.៣៦០លានដុល្លាអាមេរិក ជាកំណើនល្អប្រសើរមួយ ខណៈការនាំចេញទំនិញកម្ពុជានៅឆ្នាំ២០១៧ មានទំហំទឹកប្រាក់៩.៥៦០លានដុល្លាអាមេរិកប៉ុណ្ណោះ ។
មានប្រសាសន៍ប្រាប់ថ្នាក់ដឹកនាំគណៈកម្មការទី៩ នៃរដ្ឋសភាកាលពេលថ្មីៗនេះ លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មបានលើកឡើងថា ស្ថិតក្រោមប្រព័ន្ធអនុគ្រោះពាណិជ្ជកម្ម នៅក្នុងឆ្នាំ២០១៨នេះ មានផលិតផលកម្ពុជាជាច្រើនត្រូវបាននាំចេញ រួមមាន ៖ កង់, ស្បែងជើង, កាបូប, សម្លៀកបំពាក់, គ្រាប់ធញ្ញជាតិ, ផលិតផលជលផល, ជ័រកៅស៊ូ, ឈើកែច្នៃ, គ្រឿងបង្គុំអេឡិចត្រូនិក, ស្រូវ, អង្ករ, ពោត និងដំឡូងមីជាដើម គឺត្រូវបានកម្ពុជាផលិតនាំចេញ និងកំពុងមានតម្រូវ កើនឡើងខ្លាំងនៅក្នុងទីផ្សារអន្តរជាតិ ។
លោករដ្ឋមន្ត្រីថា ៖« ផលិតផលដែលខ្មែរបាននាំចេញនោះ ភាគច្រើននាំចេញទៅកាន់ទីផ្សារអឺរ៉ុប សហរដ្ឋអាមេរិក កាណាដា ជប៉ុន ចិន និងទីផ្សារនៅតំបន់អាស៊ាន »។ លោកបញ្ជាក់ថា ៖« នៅថ្ងៃខាងមុខ ក្រសួងនឹងបន្តស្នើឲ្យបណ្តាប្រទេសជាសមាជិករបស់អង្គការពាណិជ្ជកម្មពិភពលោក(WTO) បន្តការផ្តល់ និងផ្តល់ប្រព័ន្ធអនុគ្រោះពាណិជ្ជកម្មមកកម្ពុជាទៅលក្ខខណ្ឌ និងអត្ថប្រយោជន៍នានាដែលWTO ផ្តល់មកឲ្យកម្ពុជា »។
លោក សុខ សុភក្ត្រ អនុរដ្ឋលេខាធិការក្រសួងពាណិជ្ជកម្ម បានថ្លែងថា យោងតាមស្ថានភាពសេដ្ឋកិច្ចកម្ពុជា តាំងពីពេលចូលសមាជិកអង្គការពាណិជ្ជកម្មពិភពលោក រហូតមកដល់បច្ចុប្បន្ននេះ គឺកម្ពុជាទទួលបាននូវប្រព័ន្ធអនុគ្រោះពន្ធEBAទៅកាន់សហភាពអឺរ៉ុប និងផ្តល់ប្រព័ន្ធអនុគ្រោះពន្ធពាណិជ្ជកម្មប្រមាណ៩៧%សម្រាប់ទំនិញនាំចូលទៅកាន់បណ្ដាប្រទេសនានានៅពិភពលោក ។ ប៉ុន្តែបន្ទាប់ពីចូលរួមសន្និសីទ WTO នៅក្រុងហុងកុងឆ្នាំ២០០៥ មកដល់ពេលនេះ នៅមានប្រទេសមួយចំនួនដែលជាសមាជិកWTO ដូចគ្នា នៅមិនទាន់ផ្តល់ប្រព័ន្ធអនុគ្រោះពាណិជ្ជកម្ម ឲ្យមកកម្ពុជានៅឡើយទេ ។
លោកបន្តថា ៖« កម្ពុជាបាននិងកំពុងរៀបចំច្បាប់ជាច្រើនទៀត តាមសំណើរបស់ WTO និងការបង្កើតតុលាពាណិជ្ជកម្មនៅក្នុងស្រុក ពិសេសយើងកំពុងជំរុញឲ្យ WTO ពិនិត្យបញ្ហាប្រព័ន្ធអនុគ្រោះពាណិជ្ជកម្ម ដើម្បីជំរុញការផលិតនាំចេញឲ្យកើនឡើងថែមទៀត »៕
ចែករំលែកព័តមាននេះ