រាជធានីភ្នំពេញ ៖ ស្ត្រីជាប្រពន្ធ និងប្តីជាជនជាតិចិនម្នាក់ស្រវឹងខ្លាំងពេក បើករថយន្តទៅផ្ទះមិនរួច ក៏ដេកលក់តាមផ្លូវទាំង២នាក់ ហើយត្រូវជនសង្ស័យលួចវះហោប៉ៅយកលុយអស់ជាង២ពាន់ដុល្លារ លុះពេលជនសង្ស័យធ្វើសកម្មភាពដោះយកខ្សែកមួយខ្សែ ស្រាប់តែបុរសជាជនជាតិចិននោះភ្ញាក់ដឹងខ្លួនក៏ប្តឹងសមត្ថកិច្ចអោយជួយអន្តរាគមន៍តែម្តង ។
ហេតុការណ៍នេះបង្កឲ្យមានការភ្ញាក់ផ្អើលកាលពីវេលាម៉ោង២និង៣០នាទីរំលងអធ្រាត្រឈានចូលថ្ងៃទី២៤ ខែធ្នូ ឆ្នាំ២០១៨ នៅតាមបណ្ដោយផ្លូវសហព័ន្ធរុស្ស៊ី ជាប់របងព្រលានយន្តហោះអន្តរជាតិភ្នំពេញពោធិ៍ចិនតុង ដែលស្ថិតនៅភូមិព្រៃទា សង្កាត់ចោមចៅទី៣ ខណ្ឌពោធិ៍សែនជ័យ ។
ប្រពន្ធរបស់បុរសរងគ្រោះជាជនជាតិចិនខាងលើឈ្មោះ លី ហួរ អាយុ២៨ឆ្នាំ មុខរបរបកប្រែភាសាចិន ស្នាក់នៅផ្ទះជួល៣កន្លែង ទី១នៅ ម្តុំផ្សារជម្ពូវ័ន សង្កាត់ចោមចៅទី៣ ខណ្ឌពោធិ៍សែនជ័យ, ទី២-នៅម្តុំផ្សារថ្មី និង៣-នៅម្តុំផ្សារអូរឫស្សី ។ ចំណែកសំភារៈដែលបាត់បង់រួមមានកាបូបលុយសរុបជាង២ពាន់ដុល្លារ ខ្សែកប្លាទីនមួយខ្សែទម្ងន់៥ជី អត្តសញ្ញាណប័ណ្ណ ប័ណ្ណបើកបរ និងលិខិតឆ្លងដែន ។
តាមប្រភពព័ត៌មានពីស្ត្រីជាប្រពន្ធជនរងគ្រោះបានឲ្យដឹងថា នៅមុនពេលកើតហេតុ គាត់និងប្តីបានផឹកស៊ីនៅខារ៉ាអូខេ ម៉ូឌែល ស៊ីធី នៅម្ដុំផ្លូវជាតិលេខ៣ បន្ទាប់មកពួកគាត់បានត្រឡប់ទៅផ្ទះនៅផ្សារថ្មី តែដោយសារប្តីរបស់គាត់ដែលជាជនជាតិចិនខាងលើស្រវឹងខ្លាំងពេកបានបើកបររថយន្ដម៉ាកស៊ីអវី ពណ៌ទឹកប្រាក់ ពាក់ស្លាកលេខ ភ្នំពេញ ២I-៩២៥៧ ទៅមុខមិនរួច ក៏សុំប្រពន្ធឈប់សំរាកមួយសន្ទុះសិន ហើយពួកគាត់ក៏បានដេកលក់ក្នុងរថយន្តទាំង២នាក់តែម្តង ។
ប្រភពព័ត៌មានដដែលបានបន្តថា ពេលគាត់ និងប្តីជាជនជាតិចិនដេកលក់ ក៏ស្រាប់តែមានជនសង្ស័យបានវះហោប៉ៅខោប្តីរបស់គាត់យកលុយអស់ជាង២ពាន់ដុល្លារ លុះពេលជនសង្ស័យធ្វើសកម្មភាពដោះខ្សែក
របស់បុរសជនជាតិចិននោះ ធ្វើឱ្យបុរសជនជាតិចិននោះភ្ញាក់ដឹងខ្លួន បន្ទាប់មកជនសង្ស័យបានរត់ឆ្លងផ្លូវ ហើយគេចខ្លួនចូលភូមិកើតហេតុបាត់។
ក្រោយពេលកើតហេតុ ជនរងគ្រោះបានមករាយការណ៍ប្រាប់សមត្ថកិច្ចដើម្បីអោយជួយអន្តរាគមន៍ភ្លាមៗផងដែរ ហើយភ្លាមៗនោះដែរ ជនរងគ្រោះមិនទាន់ដាក់ពាក្យបណ្ដឹងនៅឡើយទេ រង់ចាំថ្ងៃស្អែកទើបដាក់ពាក្យបណ្ដឹងម្តងទៀត ៕
ចែករំលែកព័តមាននេះ