រាជធានីភ្នំពេញ ៖ កំណើនប្រជាពលរដ្ឋកើនឡើងពីមួយឆ្នាំទៅមួយឆ្នាំ ជាពិសេសកំណើនអ្នករៀបការថ្មីថ្មោងកាន់តែច្រើន បានធ្វើឲ្យតម្រូវការលំនៅឋាននៅក្នុងប្រទេសកម្ពុជា ជាពិសេសនៅរាជធានីភ្នំពេញ មានការកើនឡើងជាបន្ដបន្ទាប់ ។ តាមការវាយតម្លៃរបស់ភ្នាក់ងារអចលនទ្រព្យ តម្រូវការលំនៅឋានទូទាំងប្រទេសនាពេលបច្ចុប្បន្ននេះ មានរហូតដល់ជិត៨ម៉ឺនខ្នង និងត្រូវឲ្យមានការវិនិយោគបន្ថែម ដើម្បីឆ្លើយតបទៅនឹងតម្រូវការនេះ ។
លោក ច្រឹក សុខនីម នាយកប្រតិបត្តិនៃក្រុមហ៊ុនវាយតម្លៃ និងភ្នាក់ងារអចលនទ្រព្យ Century 21 Mekong និងជាប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា ទើបជាប់ឆ្នោត បានឲ្យដឹងថា លំនៅឋាននៅក្នុងព្រះរាជាណាចក្រកម្ពុជា រហូតមកដល់ពេលនេះ នៅមានការខ្វះខាតច្រើនជាពិសេស នៅរាជធានីភ្នំពេញ ។ លោកថា ៖« បើតាមការប៉ាន់ស្មានមើល លំនៅឋាននៅក្នុងប្រទេសកម្ពុជាយើង អាចនៅខ្វះប្រហាក់ប្រហែលជា៧ទៅ៨ម៉ឺនខ្នងទៀត ដែលទាមទារឲ្យមានការវិនិយោគច្រើនបន្ថែម»។
លោកបន្តថា គេអាចដឹងបានថា លំនៅឋានពិតជាត្រូវការច្រើន តាមរយៈការបើកលក់គម្រោងថ្មីៗរបស់វិនិយោគិន ហើយក៏លក់អស់ភ្លាមៗ ដូចនេះវាអាចបញ្ជាក់បានយ៉ាងច្បាស់ថា បើទោះបីជាមានការវិនិយោគបន្ថែមច្រើនយ៉ាងណាក៏ដោយ ក៏នៅតែមិនទាន់ឆ្លើយតប នឹងតម្រូវការជាក់ស្ដែងនៅឡើយ ។ តែយ៉ាងណាក៏ដោយ នាពេលបច្ចុប្បន្ននេះ ការផ្គត់ផ្គង់លំនៅឋាន ត្រូវបានផ្លាស់ប្តូរបន្តិចម្ដងៗ ដូចជាផ្លាស់ប្តូរពីការសាងសង់ផ្ទះល្វែង មកសាងសង់ខុនដូ និងអាផាតម៉ិនសម្រាប់លក់ ឬជួលវិញ ដែលធ្វើឲ្យការរស់នៅរបស់ពលរដ្ឋកម្ពុជា មានភាពស៊ីវិល័យជាងមុន ។
លោកនិយាយថា ៖« ការសាងសង់ខុនដូ និងអាផាតម៉ិននាពេលនេះ មិនមែនសម្រាប់ទីផ្សារនាពេលបច្ចុប្បន្នទេ តែគេសាងសង់សម្រាប់និន្នាការនៅរយៈពេល៥ទៅ ១០ឆ្នាំខាងមុខ ដែលយុវជននឹងងាកទៅរកការរស់នៅបែបទំនើបបែបនេះ » ។
លោកបន្ថែមថា សម្រាប់ទីក្រុងភ្នំពេញ នាពេលបច្ចុប្បន្ននេះ ត្រូវបានគេមើលឃើញថា មានការរីកចម្រើនគ្រប់ទិសទៅហើយ ទៅលើការអភិវឌ្ឍលំនៅឋានផ្គត់ផ្គង់ឲ្យស្របទៅនឹងកំណើនរបស់ប្រជាពលរដ្ឋ និងបានធ្វើឲ្យតម្លៃដីធ្លី កើនឡើងរីកកាន់តែធំ ។ ជាក់ស្ដែង ការអភិវឌ្ឍនៅរាជធានីភ្នំពេញ បច្ចុប្បន្ននេះត្រូវបានរីកសាយខ្លាំងទៅប៉ែកខាងកើត នៅម្ដុំផ្លូវជាតិលេខ១ និងតំបន់មួយចំនួនទៀត នៅប៉ែកខាងលិច ដូចជានៅក្រាំងធ្នង់ ដែលកាលពីមុននោះតំបន់នោះ គឺជាវាលស្រែ និងតំបន់មិនសូវចាប់អារម្មណ៍ប៉ុន្មានឡើយ ។
បើតាមលោក ហ៊ឹម សីហា នាយកផ្នែកស្រាជ្រាវនៃក្រុមហ៊ុន VTrust Appraisal បានឲ្យដឹងថា តាមការព្យាករថា ការផ្គត់ផ្គង់អាផាតម៉ិននៅទូទាំងរាជធានីភ្នំពេញ មានកំណើនប្រចាំឆ្នាំ ប្រមាណ១០% ហើយបើគិតជាយូនីតវិញ ជាមធ្យមនឹងកើនឡើងប្រមាណ១.៥៨០យូនីតក្នុងមួយឆ្នាំៗ គឺកើនពីពេលនេះដល់ឆ្នាំ២០៣០ ។
លោកថា ៖« សម្រាប់រាជធានីភ្នំពេញ ដែលមានសកម្មភាពផ្គត់ផ្គង់លំនៅឋានច្រើនជាងគេ ត្រូវបានគេមើល ឃើញថា ខណ្ឌចំការមនមានចំនួនផ្គត់ផ្គង់អាផាតម៉ិនច្រើនជាងគេដែរ ដែលមានរហូតដល់២៣០គម្រោង ឬស្មើនឹង៥.៨២០យូនីត ដែលស្មើនឹងប្រមាណ៦៤%នៃចំណែកទីផ្សារទាំងមូល » ។
លោក ពីង សេរី នាយកប្រតិបត្តិក្រុមហ៊ុន Angkor Real Estate បានឲ្យដឹងផងដែរថា ក្នុងពេលតម្រូវការលំនៅឋាននៅកម្ពុជា ជាពិសេសភ្នំពេញ កំពុងតែកើនឡើងនោះ អ្នកអភិវឌ្ឍន៍ជំនាន់ក្រោយៗ គួរតែគិតគូរអភិវឌ្ឍន៍លំនៅឋានបែបណាដែលទំនើប និងស៊ីវិល័យ ជាពិសេសការសាងសង់អាផាតម៉ិនជាដើម ។
លោកថា ៖« អ្នកអភិវឌ្ឍន៍អាផាតម៉ិនជំនាន់ក្រោយគួរតែមានការគិតគូរឲ្យបានហ្មត់ចត់ ដូចជាសង់ចំណតយានយន្តឲ្យបានច្រើន និងទូលាយជាមុន ដើម្បីងាយស្រួលឲ្យអ្នករស់នៅចេញចូល និងមានចំណតត្រឹមត្រូវ ព្រោះថាបច្ចុប្បន្ននេះ អាផាតម៉ិនមួយចំនួន មិនមានចំណតត្រឹមត្រូវ ហើយការកង្វះចំណតនេះ ក៏កំពុងចោទជាបញ្ហាដែរ » ៕
ចែករំលែកព័តមាននេះ