រាជធានីភ្នំពេញ ៖ មន្ត្រីជាន់ខ្ពស់ក្រសួងកសិកម្ម រុក្ខាប្រមាញ់ និងនេសាទ បានអះអាងថា កម្ពុជាអាចមានលទ្ធភាពនាំចេញផលនេសាទ(ត្រី)ចន្លោះពី៦ពាន់ទៅ៧ពាន់តោនក្នុងឆ្នាំ២០១៨នេះ ដែលមានចំនួនប្រហាក់ប្រហែលគ្នានឹងឆ្នាំមុនដែរ ។ ប្រតិភូរាជរដ្ឋាភិបាលទទួលបន្ទុកអគ្គនាយក…
រាជធានីភ្នំពេញ ៖ មន្ត្រីជាន់ខ្ពស់ក្រសួងកសិកម្ម រុក្ខាប្រមាញ់ និងនេសាទ បានអះអាងថា កម្ពុជាអាចមានលទ្ធភាពនាំចេញផលនេសាទ(ត្រី)ចន្លោះពី៦ពាន់ទៅ៧ពាន់តោនក្នុងឆ្នាំ២០១៨នេះ ដែលមានចំនួនប្រហាក់ប្រហែលគ្នានឹងឆ្នាំមុនដែរ ។
ប្រតិភូរាជរដ្ឋាភិបាលទទួលបន្ទុកអគ្គនាយក អគ្គនាយកដ្ឋានជលផល នៃសក្រសួងកសិកម្ម លោក អេង ជាសាន បានមានប្រសាសន៍កាលពីថ្ងៃទី១៨ ធ្នូកន្លងមកថា ការនាំចេញត្រីពីកម្ពុជាអាចស្ថិតក្នុងសភាពទ្រឹង តែកម្ពុជាបាននាំចូលត្រីមកពីក្រៅប្រទេសមានកំណើនជាងការនាចេញ ដោយនាំចូលត្រីប្រមាណ១ម៉ឺនតោន ។
លោកបន្តថា ៖« ការណ៍ដែលកម្ពុជាមិនមានកំណើនឡើងនៃការនាំចេញ និងមានតម្រូវការនាំចូលខ្លះនោះ គឺដោយសារចំនួនប្រជាពលរដ្ឋ និងភ្ញៀវទេសចរជាតិ និងអន្តរជាតិមានការកើនឡើងខ្លាំងនៅឆ្នាំនេះ ដែលធ្វើឲ្យមានតម្រូវសាច់ត្រីច្រើន »។ លោក អេង ជាសាន បញ្ជាក់ថា រាល់ផលត្រីដែលកម្ពុជាបានបើកឲ្យមានការនាំចេញនិងនាំចូលនេះ គឺជាប្រភេទត្រីដែលបណ្តាប្រទេសនីមួយៗ មិនមានពូជនៅក្នុងប្រទេសកម្ពុជា និងត្រីមិនមាននៅក្នុងប្រទេសរបស់ពួកគេ ។
ដើម្បីបង្កើនការផលិតផលត្រីសម្រាប់ការផ្គត់ផ្គង់នៅក្នុងស្រុក និងបង្កើនការនាំចេញផង នោះ សហភាពអឺរ៉ុបថ្មីៗនេះបានសម្រេចចិត្ត គ្រោងផ្តល់ថវិកាជំនួយប្រមាណ៨៧លានអឺរ៉ូ ដែលស្មើប្រមាណ១០០លានដុល្លាអាមេរិកមកដល់ក្រសួងកសិកម្ម រុក្ខាប្រមាញ់ និងនេសាទ សម្រាប់អនុវត្តកម្មវិធីការគ្រប់គ្រងធនធានជល ផលនៅកម្ពុជាឆ្នាំ២០១៩-២០២៣ ។
គម្រោងជំនួយនេះ ជាការរួមចំណែក ក៏នឹងធានាការអភិរក្សត្រីជិតផុតពូជ ជួយសហគមន៍នេសាទបង្កើនជីវភាពក្នុងការការពារធនធាន ដើម្បីឲ្យមាននិរន្តរភាពក្នុងការប្រមូលផល និងផ្តល់ការកែច្នៃត្រីរក្សាទុកបានយូរ និងជំរុញកែច្នៃផលត្រីឲ្យមានគុណភាព និងអនាម័យ ។
បើតាមលោក អេង ជាសាន គម្រោងនេះ អាចនឹងចាប់ផ្ដល់នៅពាក់កណ្ដាលឆ្នាំ២០១៩ខាងមុខដោយសារតែទឹកប្រាក់មិនទាន់ធ្លាក់មក ដូចនេះវាអាចពន្យារពេលប្រមាណកន្លះឆ្នាំទៀត ។ លោកថ្លែងថា ៖« ហិរញ្ញប្បទាននេះ នឹងត្រូវបែងចែកទៅតាមសហគមន៍នានា ទូទាំងប្រទេស ដើម្បីអភិរក្ស ថែរក្សា និងផ្សព្វផ្សាយពីវិស័យជលនៅកម្ពុជា ហើយត្រូវធានាឲ្យបាននូវកំណើនជលផលទាំងទឹកសាប និងទឹកប្រៃ »។
ទោះបីយ៉ាងណា លោកបញ្ជាក់ថា សម្រាប់តំបន់ណា ខេត្តណាដែលទទួលបានផលប្រយោជន៍ច្រើន ពីហិរញ្ញប្បទានរបស់សហភាពអឺរ៉ុប មិនទាន់ដឹងច្បាស់នៅឡើយទេ ពេលនេះក្រុមការងារកំពុងរៀបចំធ្វើកិច្ចការនេះ តែយ៉ាងណាក៏ដោយក្រសួងនឹងបែងចែកឲ្យមានតម្លាភាពបំផុតដើម្បីប្រយោជន៍ដល់វិស័យជលផលនៅទូទាំងប្រទេសកម្ពុជា ៕
ចែករំលែកព័តមាននេះ