រាជធានីភ្នំពេញ ៖ គម្រោងផ្លូវល្បឿនលឿនពីភ្នំពេញ-ក្រុងបាវិត ដែលគ្រោងចំណាយថវិការហូតដល់៣.៨០០លានដុល្លារនោះ បានបញ្ចប់ការសិក្សាទាំងស្រុងហើយ ប៉ុន្តែការសាងសង់នៅពេលណា មិនទាន់កំណត់ពេលវេលាជាក់លាក់នៅឡើយទេ។ នេះបើតាមការឲ្យដឹងពីមន្ត្រីជាន់ខ្ពស់ក្រសួងសាធារណការ និងដឹកជញ្ជូន ។
លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានបង្ហើបអំពីព័ត៌មាននេះក្នុងពិធីមួយកាលពីថ្ងៃទី១៩ ធ្នូ កន្លងមកនេះ ។
អ្នកនាំពាក្យក្រសួងដដែលនេះ គឺលោកវ៉ាស៊ឹម សូរិយា បានឲ្យដឹងតាមទូរស័ព្ទនាព្រឹកថ្ងៃទី២០ ធ្នូ ម្សិលមិញ គម្រោងនេះសិក្សាដោយទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន (JICA) ដែលជាគម្រោងមួយមានតម្លៃថ្លៃខ្ពស់ ហើយក្រសួងបានស្នើឲ្យJICA ជួយសិក្សាជាថ្មី ដើម្បីបន្ថយតម្លៃលើការសាងសង់ផ្លូវនេះ ។
លោកបន្តថា មានក្រុមហ៊ុនជាច្រើន ហើយក្រសួងបានអញ្ជើញប្រទេសជាច្រើនសិក្សាពីផ្លូវនេះ ដើម្បីមានជម្រើសផ្សេងៗគ្នា មុនសម្រេចចិត្តសាងសង់ ។ លោកលើកឡើងថា ៖« មូលហេតុដែលផ្លូវនេះត្រូវចំណាយច្រើន ដោយសារត្រូវសាងសង់ស្ពានមានប្រវែងរហូតដល់១០គីឡូម៉ែត្រ ឆ្លងកាត់ផ្ទៃបឹងនៅស្រុកល្វាឯម ព្រោះផ្លូវនេះគ្រោងសាងសង់ចេញពីស្រុកល្វាឯម ឆ្លងកាត់ខេត្តកណ្តាល ឆ្ពោះទៅកាន់ខេត្តព្រៃវែង និងទៅកាន់ក្រុងបាវិតខេត្តស្វាយរៀងតែម្ដង »។ លោកបន្ថែមថា ៖« បើតាមការសិក្សារបស់ JICA ផ្លូវនេះត្រូវជួបប្រសព្វជាមួយផ្លូវជាតិលេខ១ នៅស្រុកកំពង់ត្របែក ខេត្តព្រៃវែង មុនឆ្ពោះទៅកាន់ខេត្តស្វាយរៀង »។
លោក វ៉ាស៊ឹម សូរិយា បានបន្ដថា គម្រោងសាងសង់ផ្លូវល្បឿនលឿននេះ មានប្រវែង១៦០គីឡូម៉ែត្រ ខ្លីជាងផ្លូវជាតិលេខ១ ដែលបច្ចុប្បន្នមានប្រវែង១៦៧គីឡូម៉ែត្រ គិតពីរាជធានីភ្នំពេញ ដល់ក្រុងបាវិតព្រំប្រទល់ប្រទេសវៀតណាម ។
គួរកត់សម្គាល់ផងដែរ នេះជាគម្រោងផ្លូវល្បឿនលឿនទី២ហើយរបស់កម្ពុជា ខណៈដែលគម្រោងផ្លូវល្បឿនលឿនទី១ ពីភ្នំពេញ ឆ្ពោះទៅខេត្តព្រះសីហនុ គ្រោងនឹងបើកការដ្ឋានសាងសង់ឆាប់ៗខាងមុខនេះ ។
បើតាមការអះអាងពីលោកទេសរដ្ឋមន្ត្រី ស៊ុន ចាន់ថុល បានបញ្ជាក់កាលពីពេលថ្មីៗនេះថា ការបើកការដ្ឋានសាងសាង់ផ្លូវល្បឿនលឿនពីភ្នំពេញទៅខេត្តព្រះសីហនុ នឹងចាប់ផ្តើមក្នុងពេលខាងមុខឆាប់ៗនេះ ខណៈបច្ចុប្បន្ន ក្រុមហ៊ុនចិន បានចំណាយប្រាក់ទិញសម្ភារ និងគ្រឿងចក្រគ្រប់ប្រភេទអស់ប្រហែល១០០លានដុល្លារសម្រាប់យកមកសាងសង់ ។
ប្រធានក្រុមប្រឹក្សាវិទ្យាស្ថានសិក្សាការអភិវឌ្ឍ លោកបណ្ឌិត ម៉ី កល្យាណ បានថ្លែងថា បញ្ហាហេដ្ឋារចនាសម្ព័ន្ធជារឿងប្រឈមមួយក្នុងការអភិវឌ្ឍសេដ្ឋកិច្ចកម្ពុជា ប៉ុន្តែរាជរដ្ឋាភិបាលក្នុងរយៈពេលប៉ុន្មានឆ្នាំចុងក្រោយនេះបានរៀបចំគោលនយោបាយ និងវិនិយោគលើហេដ្ឋារចនាសម្ព័ន្ធយ៉ាងច្រើន ដើម្បីជំរុញកំណើនសេដ្ឋកិច្ចជាតិ ហើយអ្វីដែលរាជរដ្ឋាភិបាលបានធ្វើ គឺស្ថិតក្នុងទិសដៅត្រឹមត្រូវមួយហើយ ។ លោកថ្លែងថា ៖« វាជារឿងចាំបាច់ដែលត្រូវកសាងហេដ្ឋារចនាសម្ព័ន្ធ ដើម្បីរុញសេដ្ឋកិច្ចកម្ពុជាទៅកាន់ដំណាក់កាលថ្មីមួយទៀត ព្រោះបើចង់ឲ្យសេដ្ឋកិច្ចកម្ពុជាកើនឡើង និងឈានទៅកាន់លំដាប់ថ្មី កម្ពុជាត្រូវការវិនិយោគលើហេដ្ឋារចនាសម្ព័ន្ធបន្ថែមទៀត »៕
ចែករំលែកព័តមាននេះ