ខេត្តក្រចេះ ៖ តំណាងក្រុមហ៊ុនម្សៅដំឡូងមីដ៏ធំមួយនៅខេត្តក្រចេះអះអាងប្រាប់អាជ្ញាធរមូលដ្ឋានថា ក្រុមហ៊ុននឹងផ្អាកការផលិតម្សៅដំឡូងមួយរយៈពេល រង់ចាំការជួលជុលប្រព័ន្ធកែច្នៃកាកសំណល់ឲ្យរួចរាល់តាមបទដ្ឋានបច្ចេកទេសត្រឹមត្រូវ ដើម្បីកុំឱ្យប៉ះពាល់ដល់បរិស្ថាន និងប៉ះពាល់ផ្លូវអារម្មណ៍របស់ពលរដ្ឋ ដោយសារតែក្លិនស្អុយយ៉ាងអសោចិ៍នោះ ។
ការបញ្ជាក់ពីជំហររបស់ក្រុមហ៊ុនម្សៅដំឡូងមី ដែលជាក្រុមហ៊ុនកូរេ៉ដ៏ធំមួយឈ្មោះ ស៊ីង សុង គឺធ្វើឡើងបន្ទាប់ពីក្រុមហ៊ុននេះបានកែច្នៃម្សៅដំឡូងមី ហើយបង្ហូរកាកសំណល់ ធ្វើឲ្យមានក្លិនស្អុយយ៉ាងអសោចិ៍ជះមកលើពលរដ្ឋនៅតំបន់ជុំវិញក្រុងក្រចេះ និងនៅស្រុកចិត្របុរី ។
ក្រុមហ៊ុនម្សៅដំឡូងមីដ៏ធំមួយនេះ មានទីតាំងនៅជាប់ផ្លូវជាតិលេខ៧ ក្នុងសង្កាត់អូរឫស្សីក្រុងក្រចេះ បានចាប់ផ្តើមដំណើរការផលិតម្សៅដំឡូងមានរយៈពេលជាង២ឆ្នាំមកហើយ ។ បន្ទាប់ពីក្រុមហ៊ុននេះចាប់ផ្តើមដំណើរការមក សក្តានុពលលើវិស័យដំឡូងមីក៏កាន់តែរីកធំឡើង ដោយសារក្រុមហ៊ុនបានបញ្ជាទិញដំឡូងមីពីពលរដ្ឋក្នុងតម្លៃខ្ពស់ ។
អាជ្ញាធរមូលដ្ឋាន ក្នុងសង្កាត់អូរឫស្សីបានឲ្យដឹងថា កាកសំណល់ដំឡូងមីរបស់ក្រុមហ៊ុន ត្រូវបានបង្ហូរចេញដោយគ្មានអាងស្តុក បណ្តាលឲ្យមានក្លិនស្អុយអសោចិ៍ប៉ះពាល់ដល់ផ្លូវអារម្មណ៍របស់ពលរដ្ឋ ដែលកំពុងរស់នៅតំបន់ជំុវិញ ក្នុងរយៈពេលប៉ុន្មានខែចុងក្រោយនេះ ដោយសារកាកសំណល់បង្ហូរចូលក្នុងទឹកព្រែក និងអូរ បានធ្វើឱ្យប៉ះពាល់យ៉ាងធ្ងន់ធ្ងរដល់ការរស់នៅរបស់ពលរដ្ឋ ក៏ដូចជាសត្វពាហនៈ ។
មន្ត្រីអាជ្ញាធរបានឲ្យដឹងទៀតថា កន្លងមក កាកសំណល់របស់ក្រុមហ៊ុនបង្កឲ្យប៉ះពាល់ដល់បរិស្ថាននៅជុំវិញ ពិសេសគឺការជះក្លិនស្អុយដែលពលរដ្ឋតែងតែប្តឹងមកអាជ្ញាធរឲ្យជួយដោះស្រាយ ។ ទន្ទឹមនឹងនេះ អាជ្ញាធរស្រុកនិងក្រុង បានចុះទៅពិនិត្យទីតាំងក្រុមហ៊ុនជាញឹកញាប់ និងសំណូមពរឲ្យក្រុមហ៊ុនកែសម្រួលប្រព័ន្ធលូបង្ហូរកាកសំណល់ឲ្យបានត្រឹមត្រូវ និងឆាប់រហ័ស ដើម្បីបញ្ចៀសការប៉ះពាល់ ។
ចៅសង្កាត់អូរឫស្សី លោក ឈឺន រឹទ្ធ បានថ្លែងថា តំណាងក្រុមហ៊ុនបានជួបពិគ្រោះជាមួយនឹងអាជ្ញាធរមូលដ្ឋាន ដោយអះអាងមកកាន់អាជ្ញាធរថា ក្រុមហ៊ុននឹងបញ្ឈប់សកម្មភាពផលិតម្សៅដំឡូងមីមួយរយៈពេល ចាប់ពីថ្ងៃទី១៩ ខែធ្នូតទៅ ដោយរង់ចាំជួសជុលកែច្នៃប្រព័ន្ធបង្ហូរកាកសំណល់ឲ្យមានភាពប្រសើរឡើងវិញ ទើបចាប់ផ្តើមដំណើរការសាជាថ្មី ។
លោកចៅសង្កាត់បញ្ជាក់ថា ក្រុមហ៊ុនម្សៅដំឡូងមីនេះជួយលើកស្ទួយជីវភាពពលរដ្ឋក្នុងមូលដ្នានបានច្រើន ដូចជាការផ្តល់ការងារឲ្យពលរដ្ឋ និងការបញ្ជាទិញដំឡូងមីពីពលរដ្ឋក្នុងតម្លៃថ្លៃ ហើយក្រុមហ៊ុនតែងតែសហការជាមួយអាជ្ញាធរគ្រប់លំដាប់ថ្នាក់ លើជំហរដោះស្រាយពីបញ្ហាចន្លោះប្រហោងដែលបង្កការប៉ះពាល់ដល់ប្រជាពលរដ្ឋ ៕
ចែករំលែកព័តមាននេះ