ខេត្តកំពត ៖ តាមសេចក្តីរាយការណ៍របស់ការិយាល័យនគរបាលប្រឆាំងគ្រឿងញៀនខេត្តឲ្យដឹងថា កាល
ពីវេលាម៉ោង២និង២០នាទីរសៀលថ្ងៃទី១៨ ខែធ្នូ កម្លាំងការិយាល័យប្រឆាំងបទល្មើសគ្រឿងញៀនខេត្ត សហការជាមួយកម្លាំងនាយកដ្ឋានសន្តិសុខផ្ទៃក្នុងក្រសួងមហាផ្ទៃ បានបង្ក្រាបមុខសញ្ញាពាក់ព័ន្ធនឹងករណីជួញដូរនិងរក្សាទុកគ្រឿងញៀន១ករណី ដែលផ្ញើតាមរយៈបញ្ញើប្រៃសណីយ៍ខេត្ត ។
លោកវរសេនីយ៍ឯក គង់ សុខន ស្នងការរងនគរបាលខេត្ត ទទួលផែនប្រឆាំងបទល្មើសបានឲ្យដឹងថា នៅក្នុងប្រតិបត្តិការបង្ក្រាបនេះ សមត្ថកិច្ចបានចាប់ឃាត់ខ្លួនមុខសញ្ញាដំបូងជាស្ត្រី២នាក់ ក្នុងនោះជនបរទេសម្នាក់និងខ្មែរម្នាក់ ដែលមានឈ្មោះ Gayazova Anjela អាយុ២៩ ឆ្នាំ ជនជាតិអ៊ូស្បេគីស្ថាន កាន់លិខិត ឆ្លងដែនលេខAA១៦២២០២ ស្នាក់នៅភូមិដូនតោក សង្កាត់ត្រើយកោះ ក្រុងកំពត និងឈ្មោះ មុំ សុធា អាយុ២៨ឆ្នាំ ស្នាក់នៅភូមិកំពង់បាយខាងជើង សង្កាត់កំពង់បាយ ក្រុងកំពត ។
ចំពោះវត្ថុតាងដកហូតបានមាន កេសក្រដាស១កេស ដែលមុខសញ្ញាបានទៅទទួលនៅរប្រៃសណីយ៍ខេត្ត ក្នុងកេសនោះមាន ថ្នាំញៀនប្រភេទអុិចស្តាស៊ី១.៥០៣គ្រាប់ និងទឹកថ្នាំសង្ស័យជាប្រភេទថ្នាំញៀនមេតំហ្វេតាមីន១កញ្ចប់ធំ ។ក្រោយពេលឃាត់មុខសញ្ញាខាងលើនេះ សមត្ថកិច្ចបានបន្តឃាត់ខ្លួនបុរសជាប្តីឈ្មោះ Tasdelen Onder អាយុ៣៧ឆ្នាំ និងបន្តដកហូតវត្ថុតាងនៅ២កន្លែងផ្សេងគ្នា ដែល ៖
១-ផ្ទះជួលនៅភូមិដូនតោក សង្កាត់ត្រើយកោះ ក្រុងកំពត ដកហូតវត្ថុតាងមាន កញ្ឆាក្រៀម១កញ្ចប់ ២-លិខិតឆ្លងដែនឈ្មោះGayazova Anjelaមួយច្បាប់ ៣-សៀវភៅការងារជនបរទេសឈ្មោះ Gayazova Anjela ចំនួន២ក្បាល កុំព្យួរទ័រយួរដៃ១គ្រឿង ឧបករណ៍និងធាតុផ្សំសម្រាប់ជក់ស៊ីសា
ចំនួន៧កេសធំនិង២កេសតូច និងម្សៅពណ៌សស្អិត១កេស ។
២-ហាងជួលស្ថិតនៅភូមិទ្វីខាងជើង សង្កាត់អណ្តូងខ្មែរ ក្រុងកំពត ដកហូតបានវត្ថុតាងមានគ្រាប់ថ្នាំសង្ស័យជាប្រភេទថ្នាំញៀនអិចស្តាស៊ី៣៤៩គ្រាប់(ពណ៌ខៀវ២៨គ្រាប់ ពណ៌ផ្កាឈូក៩៤គ្រាប់ ពណ៌ទឹកមាស៤៧គ្រាប់ ពណ៌ក្រហម១៨០គ្រាប់) ម្សៅថ្នាំសង្ស័យជាប្រភេទថ្នាំញៀនអិចស្តាស៊ីចំនួន៥កញ្ចប់ ទម្ងន់២៦៦,២៦ក្រាម កុំព្យួរទ័រយួរដៃ១គ្រឿង និងទូរស័ព្ទ២គ្រឿង ។
ក្រោយពីបានពិនិត្យឆែកឆេររួចរាល់ សមត្ថកិច្ចសម្រេចវេចខ្ចប់វត្ថុតាងនិងសម្ភារពាក់ព័ន្ធទាំងអស់ប្រគល់ជូនលោក សំអុន វីរយុទ្ធ អនុប្រធាននាយកដ្ឋានសន្តិសុខផ្ទៃក្នុងក្រសួងមហាផ្ទៃ ដើម្បីចាត់ការបន្តតាមនីតិវិធី៕
ចែករំលែកព័តមាននេះ