រាជធានីភ្នំពេញ ៖ លោក រស់ ពិសិដ្ឋ ប្រធានក្រុមប្រឹក្សាជំនុំជម្រះនៃសាលាដំបូងរាជធានីភ្នំពេញ កាលពី
ព្រឹកថ្ងៃទី១៨ ខែធ្នូ បានប្រកាសសាលក្រមផ្តន្ទាទោសអតីតមន្ត្រីយោធាម្នាក់ ដាក់ពន្ធនាគារកំណត់១២ឆ្នាំ និងពិន័យជាប្រាក់១លាន រៀលចូលថវិការដ្ឋ ក្រោមការចោទប្រកាន់ពីបទប៉ុនប៉ងឃាតកម្ម ក្នុងរឿងគំនុំស្នេហាត្រីកោណ ។
សាលក្រមបានបើកផ្លូវឲ្យប្តឹងឧទ្ធរណ៍តាមកំណត់ច្បាប់ បើសិនជនជាប់ចោទ ឬដើមចោទកើតទុក្ខមិនសុខចិត្តចំពោះការកាត់ក្តីនេះ ។ ជនជាប់ចោទឈ្មោះ ប៊ុន តេង ហៅហ្គោ ភេទប្រុស អាយុ៣២ឆ្នាំ ជាអតីមន្ត្រីយោធាភូមិភាគ៥ មានឋានន្តរស័ក្តិវរសេនីយ៍ទោ ។ ចំណែកជនរងគ្រោះមាន២នាក់ ម្នាក់ឈ្មោះ សុឹង វីន
ហៅ ស្រីលក្ខណ៍ ភេទស្រី អាយុ២៥ឆ្នាំ មុខរបរលក់ខោអាវ តែខ្លះថា បម្រើការនៅហាងខារ៉ាអូខេ រងរបួសដោយគ្រាប់កាំភ្លើង និងម្នាក់ទៀតឈ្មោះ គង់ រ៉ាវិន ភេទប្រុស អាយុ៣០ឆ្នាំ មុខរបរលក់ដូរ ស្នាក់នៅផ្ទះលេខ៣៣K ផ្លូវលំ ភូមិទួលថ្ងាន់ សង្កាត់ទួលសង្កែ ខណ្ឌឫស្សីកែវ រាជធានីភ្នំពេញ ។
គួររំឭកថា កាលពីវេលាម៉ោង១២ និង៣០នាទីរំលងអធ្រាត្រឈានចូលថ្ងៃទី២៦ ខែកុម្ភៈឆ្នាំ២០១៨ នៅ
មុខផ្ទះជួលមួយ តាមផ្លូវលេខ១៩៧៤ ភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ ខ្មាន់កាំភ្លើងខាងលើមានគោលបំណងប៉ុនប៉ងផ្តាច់ជីវិតគូស្នេហ៍ ខណៈអតីតស្រីសេ្នហ៍របស់ខ្លួន កំពុងជិះក្នុងរថយន្តតូយូ៉តា ពណ៌ទឹកប្រាក់១គ្រឿង ដែលប្រុសថ្មីបានជូននាងត្រឡប់មកកាន់ផ្ទះជួលវិញ ។
ពេលជនរងគ្រោះមកដល់មុខផ្ទះខាងលើ ជនដៃដល់ដែលគេស្គាល់ថា ជាសង្សារជិះរថយន្តម៉ាករ៉េនរ៉ូវើរមួយគ្រឿង ពណ៌ស ទៅឈប់ទន្ទឹមគ្នា ហើយបើកកញ្ចក់បាញ់ប្រហារចំនួន៥គ្រាប់ ស្រោចទៅលើគូស្នេហ៍ទាំងពីរ ដែលស្ថិតនៅក្នុងរថយន្តបណ្តាលឲ្យស្ត្រីជាគូស្នេហ៍រងរបួសចំនួន២គ្រាប់ ។ បន្ទាប់ពីបាញ់ប្រហារហើយ ជនដៃដល់បានគេចខ្លួនបាត់ ចំណែកជនរងគ្រោះត្រូវបានសាច់ញាតិដឹកទៅសង្គ្រោះនៅមន្ទីរពេទ្យ ។
លុះ២ថ្ងៃក្រោយមក ជនជាប់ចោទបានចូលខ្លួនសារភាពកំហុស នៅស្នងការដ្ឋាននគរបាលរាជធានីភ្នំពេញ តែដោយជនសង្ស័យជាមន្ត្រីយោធា ក៏បានប្រគល់ឲ្យទៅបញ្ជាការដ្ឋានកងរាជអាវុធ ហត្ថរាជធានីភ្នំពេញវិញ ហើយជនសង្ស័យក៏ត្រូវបានការិយាល័យជំនាញកសាងសំណុំរឿងបញ្ជូនទៅសាលាដំបូង និងឃុំខ្លួនជាបណ្តោះអាសន្នតាំងពីពេលនោមក ។
សំណុំរឿងនេះ ត្រូវបានសាលាដំបូងរាជធានីភ្នំពេញ លើកយកមកបើកសវនាការជំនុំជម្រះទោសកាលពីថ្ងៃទី២៦ ខែតុលា ឆ្នាំ២០១៨ និងបានលើកពេលមកប្រកាសសាលក្រមនៅថ្ងៃទី១៨ ខែធ្នូ ដោយបានសម្រេចផ្តន្ទាទោសជនជាប់ចោទដាក់ពន្ធនាគារកំណត់១២ឆ្នាំ ៕
ចែករំលែកព័តមាននេះ