រាជធានីភ្នំពេញ ៖ រថយន្តមួយគ្រឿងម៉ាកឡិចស៊ីសRX330បើកបរក្នុងល្បឿនយ៉ាងលឿន លុះមកដល់រង្វង់មូលព្រហ្មមុខបួនក៏ជ្រុលទៅបុកខឿនសួនច្បារពុះចែកទ្រូងផ្លូវ បណ្តាលអោយបាក់អស់២ទៅ៣កង់ ចំណែករថយន្តរងការខូចខាតដាច់កាឡេកង់មុខផ្នែកខាងឆ្វេង ។
ហេតុការណ៍នេះបានកើតឡើងកាលពីវេលាម៉ោង១២និង១៥នាទីរំលងអធ្រាត្រឈានចូលថ្ងៃទី១៩ ខែធ្នូ ឆ្នាំ២០១៨ តាមបណ្តោយផ្លូវជាតិលេខ៦ នៅចំណុចរង្វង់មូលព្រហ្មមុខបួន ស្ថិតនៅក្នុងសង្កាត់ជ្រោយចង្វារ ខណ្ឌជ្រោយចង្វារ ។
សាក្សីដែលគេឃើញហេតុការណ៍បានអោយដឹងថា មុនពេលកើតហេតុ គេបានឃើញរថយន្តមួយគ្រឿងខាងលើជិះគ្នា៤ ក្នុងនោះបុរសម្នាក់ជាអ្នកបើកបររថយន្តម៉ាកឡិចស៊ីស RX330 ពណ៌ស្ករ ពាក់ស្លាកលេខ ភ្នំពេញ ២AO-៣៧៨៤ ធ្វើដំណើរតាមបណ្តោយផ្លូវជាតិលេខ៦ ក្នុងទិសដៅពីជើងទៅត្បូង មិនដឹងថា ពួកគាត់ទើបតែចេញមកពីណានោះទេបានជាបើកក្នុងល្បឿនយ៉ាងលឿនដូចហោះ លុះមកដល់រង្វង់មូលព្រហ្មមុខបួនដែលផ្លូវរៀងកាងជាច្រមុះជ្រូក អ្នកបើកបររថយន្តជ្រុលចង្កូតមកបុកខឿនសួនច្បារពុះចែកទ្រូងផ្លូវ បណ្តាលអោយបាក់អស់២ទៅ៣កង់ ចំណែករថយន្តរងការខូចខាតខ្ទេចដាច់កាឡេកង់ខាងមុខផ្នែកខាងឆ្វេង រីឯកង់ខាងក្រោយវិញបានបែក តែសំណាងល្អមិនបង្កគ្រោះថ្នាក់ដល់អ្នកដទៃនោះទេ គ្រាន់តែខូចខាតរថយន្តតែប៉ុណ្ណោះ ។
ភ្លាមៗនោះដែរ ម្ចាស់រថយន្តបំរុងនឹងហៅរថយន្តស្ទូចដើម្បីស្ទូចយករថយន្តរបស់គាត់ចេញពីកន្លែងកើតហេតុដែរ ប៉ុន្តែត្រូវបានសមត្ថកិច្ចធ្វើការហាមឃាត់មិនអោយស្ទូចរថយន្តនោះទេ ទើបម្ចាស់រថយន្តរួមនឹងមិត្តភក្តិបានទុករថយន្តចោលហើយរត់គេចខ្លួនបាត់អស់ ។
ក្រោយពេលកើតហេតុ រថយន្តខាងលើត្រូវបានសមត្ថកិច្ចធ្វើការវាស់វែងស្ទូចយកទៅរក្សាទុកនៅការិយា
ល័យចរាចរណ៍ផ្លូវដើម្បីរង់ចាំដោះស្រាយគ្នានៅពេលក្រោយទៀត ៕
ចែករំលែកព័តមាននេះ