រាជធានីភ្នំពេញ ៖ យោងតាមក្រសួងការបរទេស និងសហប្រតិបត្តិការអន្តរជាតិបានឲ្យដឹងថារដ្ឋមន្ត្រីការបរទេសរ៉ូម៉ានីបានត្រៀមរៀបចំជាបន្តបន្ទាប់ពាក់ព័ន្ធនឹងការដាក់សម្ពោធរូបសំណាកចំនួន៤ជាកិត្តិយសរំលឹកដល់ស្ថាបនិកអង្គការក្រុមប្រទេសនិយាយភាសាបារាំងហ្វ្រង់កូហ្វូនី (ហៅកាត់ថា IOF) ដែលក្នុងចំណោមនោះមានរូបសំណាក់របស់ព្រះបរមរតនៈកោដ្ឋ នរោត្តមសីហនុរបស់កម្ពុជា នៅក្នុងបរិវេណនៃទីលានហ្វ្រង់កូហ្វូនី ស្ថិតក្នុងទីក្រុងប៊ុយការ៉េស ។
ការលើកឡើងនេះបន្ទាប់ពីលោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការ អន្តរជាតិនៃព្រះរាជាណាចក្រកម្ពុជាបានបញ្ចប់ដំណើរបំពេញទស្សនកិច្ចផ្លូវការ នៅរូម៉ានីពីថ្ងៃទី១២ដល់១៣ ខែធ្នូ ឆ្នាំ២០១៨ តបតាមការអញ្ជើញរបស់លោក តេអូឌ័រ ម៉េឡិស្កាណូ រដ្ឋមន្ត្រីការបរទេសរូម៉ានី ។ ទស្សនកិច្ចនេះដែលបានធ្វើឡើងស្របពេលប្រទេសទាំងពីរប្រារព្ធខួបលើកទី៥៥ឆ្នាំនៃទំនាក់ទំនងការទូត មានគោលបំណងពង្រឹងទំនុកចិត្តផ្នែកនយោបាយ និងពង្រីក កិច្ចសហប្រតិបត្តិការលើគ្រប់វិស័យរវាងប្រទេសទាំងពីរ ។
នៅក្នុងជំនួបទ្វេភាគីរដ្ឋមន្ត្រីការបរទេសទាំងពីរបានជម្រាបជូនអំពីការវិវត្តន៍នាពេលថ្មីៗនៅក្នុងប្រទេសរបស់ខ្លួនដែលក្នុងឱកាសនោះលោក ម៉េឡិស្កាណូ បានអបអរសារទរចំពោះការអភិវឌ្ឍសេដ្ឋកិច្ចរបស់កម្ពុជាក្នុងកម្រិតគួរឲ្យចាប់អារម្មណ៍ និងបានសំដែងនូវការត្រៀមខ្លួនលើកកម្ពស់ទំនាក់ទំនង កម្ពុជា-រូម៉ានី លើគ្រប់វិស័យដែលផ្តល់ប្រយោជន៍រួម ។
ដោយពិនិត្យលើសក្តានុពលដែលកម្ពុជា និងរូម៉ានីមានស្រាប់រដ្ឋមន្ត្រីការបរទេសទាំងពីរបានគូសបញ្ជាក់ពីភាពចាំបាច់នៃកិច្ចខិតខំប្រឹងប្រែងរួមគ្នាបន្ថែមទៀត ដើម្បីពង្រីកភាពជាដៃគូ សេដ្ឋកិច្ច និងពាណិជ្ជកម្ម ។ ភាគីទាំងពីរបានឯកភាពធ្វើការរួមគ្នាជំរុញឱ្យមានការបង្កើតក្រុមប្រឹក្សាពាណិជ្ជកម្មកម្ពុជា -រូម៉ានី ក្រុមការងារអន្តរនាយកដ្ឋានរវាងក្រសួងពាណិជ្ជកម្មនៃប្រទេសទាំងពីរ និងគណៈកម្មាធិការសេដ្ឋកិច្ចចម្រុះ ។ រដ្ឋមន្ត្រីការបរទេសទាំងពីរបានកត់សម្គាល់ថា ប្រទេសទាំងពីរមានសក្តានុពលជាច្រើនសម្រាប់កិច្ចសហប្រតិបត្តិការនៅក្នុងវិស័យកសិកម្ម ព័ត៌មានវិទ្យា និងប្រេងឧស្ម័ន (គ្រឿងម៉ាស៊ីន) ហើយបានឯកភាពលើកទឹកចិត្តអោយស្ថាប័នពាក់ព័ន្ធធ្វើការពិភាក្សាគ្នាលម្អិតបន្តទៀត ។ ម្យ៉ាងវិញទៀតភាគីទាំងពីរបានវាយតម្លៃខ្ពស់ចំពោះការបើកជាផ្លូវការនូវស្ថានកុងស៊ុលកិត្តិយសរបស់ព្រះរាជាណាចក្រកម្ពុជាប្រចាំរូម៉ានី និងការរៀបចំវេទិកាធុរកិច្ចក្នុងអំឡុងពេលនៃដំណើរទស្សនកិច្ចនេះដែលជាការបោះជំហានថ្មីបន្ថែមទៀត សំដៅជួយលើកស្ទួយទំនាក់ទំនងសេដ្ឋកិច្ចរវាងប្រទេសទាំងពីរ ។
រដ្ឋមន្ត្រីការបរទេសទាំងពីរបានផ្តល់សារៈសំខាន់យ៉ាងខ្លាំងចំពោះការអប់រំយុវជនជំនាន់ក្រោយ ។ ក្នុងន័យនេះភាគីរ៉ូម៉ានីបានសន្យាបន្តផ្តល់អាហារូបករណ៍ដល់និស្សិតកម្ពុជា និងអញ្ជើញអ្នកការទូតវ័យក្មេងកម្ពុជាចូលរួមក្នុងវគ្គបណ្តុះបណ្តាលផ្នែកការទូតប្រចាំឆ្នាំរបស់ខ្លួន ។ រដ្ឋមន្ដ្រីការបរទេសទាំងពីរបានចុះហត្ថលេខាលើកិច្ចព្រមព្រៀងចំនួន២ ដើម្បីសម្រួលដល់ការធ្វើដំណើររបស់មន្ត្រីរដ្ឋាភិបាល និងជំរុញកិច្ចសហប្រតិបត្តិការរបស់វិទ្យាស្ថានការទូតរវាងប្រទេសទាំងពីរ ។
លើសពីនេះទៀតភាគីទាំងពីរបានគូសបញ្ជាក់ពីសារៈសំខាន់នៃការចូលជាធរមានអោយបានឆាប់នៃកិច្ចព្រមព្រៀងស្តីពីកិច្ចសហប្រតិបត្តិការលើវិស័យអប់រំវិទ្យាសាស្ត្រ វប្បធម៌ ប្រព័ន្ធផ្សព្វផ្សាយ យុវជន និងកីឡា ដែលត្រូវបានចុះហត្ថលេខា កាលពីឆ្នាំ២០១៧ ។ ជាងនេះទៅទៀតរដ្ឋមន្ត្រីការបរទេសទាំងពីរបានឯកភាពធ្វើការរួមគ្នា ដើម្បីពន្លឿនអោយឆាប់ចប់ចំពោះការចរចាលើកិច្ចព្រមព្រៀងដែលនៅសេសសល់នៅក្នុងវិស័យពន្ធដារ សន្តិសុខ ទេសចរណ៍ ការដឹកជញ្ជូនតាមសមុទ្រ និងពលករ ។ ភាគីរូម៉ានីក៏បានជម្រាបជូនលោកឧបនាយករដ្ឋមន្ត្រីអំពីការត្រៀមរៀបចំជាបន្តបន្ទាប់ពាក់ព័ន្ធនឹងការដាក់សម្ពោធរូបសំណាកចំនួន៤ ជាកិត្តិយសរំលឹកដល់ស្ថាបនិកអង្គការក្រុមប្រទេសនិយាយភាសាបារាំងហ្វ្រង់កូហ្វូនី (ហៅកាត់ថា IOF) ដែលក្នុងចំណោមនោះមានរូបសំណាក់របស់ព្រះបរមរតនៈកោដ្ឋនរោត្តមសីហនុរបស់កម្ពុជានៅក្នុងបរិវេណនៃទីលានហ្វ្រង់កូហ្វូនី ស្ថិតក្នុងទីក្រុងប៊ុយការ៉េស ។ ព្រឹត្តិការណ៍ជាប្រវត្ដិសាស្ដ្រនេះត្រូវបានកំណត់កាលបរិច្ឆេទនៅឆ្នាំ២០២០វិញ ដើម្បីអបអរសារទរខួបលើកទី៥០ឆ្នាំ នៃការបង្កើតអង្គការ IOF ។
រដ្ឋមន្ត្រីការបរទេសរ៉ូម៉ានីក៏បានសន្យាថា នឹងដើរតួជាអ្នកសម្របសម្រួលដ៏ស្មោះត្រង់មួយ ដើម្បីជំរុញអោយមានកុងសង់ស៊ុសសំដៅគាំទ្រការធ្វើអោយប្រសើរឡើងចំពោះទំនាក់ទំនងរវាងកម្ពុជា និងសហភាពអឺរ៉ុប រួមទាំងករណីនាំចូលអង្ករក្រអូបរបស់កម្ពុជាចូលក្នុងទីផ្សារសហភាពអឺរ៉ុប ក្នុងអំឡុងពេលដែលរូម៉ានីធ្វើជាប្រធានប្តូរវេននៃក្រុមប្រឹក្សាអឺរ៉ុបនៅក្នុងរយៈពេល៦ខែដំបូងនៃឆ្នាំ២០១៩ ។ ដោយឡែកលោកឧបនាយករដ្ឋមន្ត្រីបានជួបពិភាក្សាជាមួយ ឯកឧត្តមវីយ៉ូរ៉ែល ស្តេហ្វាន ឧបនាយករដ្ឋមន្ត្រីរូម៉ានីដែលបានវាយតម្លៃខ្ពស់ចំពោះកំណើនសេដ្ឋកិច្ចរបស់កម្ពុជាក្នុងរយៈពេលពីរទសវត្សរ៍កន្លងមក ។
ភាគីទាំងពីរបានកំណត់វិស័យសក្តានុពលមួយចំនួនសម្រាប់កិច្ចសហប្រតិបត្តិការដូចជា ប្រេង- ឧស្ម័ន ផ្លូវដែក ថាមពលកកើតឡើងវិញបច្ចេកវិទ្យាព័ត៌មានវិទ្យា កសិកម្ម ឱសថ ។ ហើយបានឯកភាពលើកទឹកចិត្តអោយស្ថាប័នពាក់ព័ន្ធពិនិត្យលទ្ធភាពរៀបចំគម្រោងជាក់ស្តែង ។ ឧបនាយករដ្ឋមន្ត្រីទាំងពីរក៏បានសង្កត់ធ្ងន់លើតួនាទីយ៉ាងសំខាន់នៃភាពជាដៃគូផ្ទាល់រវាងអាជ្ញាធរខេត្ត-ក្រុងរបស់ប្រទេសទាំងពីរ ។ ឯកឧត្តម ស្តេហ្វាន ក៏បានបញ្ជាក់ជាថ្មីផងដែរអំពីបំណងរបស់រូម៉ានីក្នុងការសម្របសម្រួលកិច្ចសន្ទនាប្រកបដោយភាពស្មោះត្រង់ និងតម្លាភាព ដើម្បីលើកកម្ពស់ការយល់គ្នាទៅវិញទៅមក និងធ្វើអោយប្រសើរឡើងនូវទំនាក់ទំនងរវាងកម្ពុជា និងសហភាពអឺរ៉ុប៕
ចែករំលែកព័តមាននេះ