ខេត្តមណ្ឌលគិរី ៖ មនុស្សរស់នៅពឹងលើការបរិភោគបានគ្រប់គ្រាន់ និងការស្នាក់អាស្រ័យបានត្រឹមត្រូវ តែទោះជាយ៉ាងណាពុំមែនមនុស្សគ្រប់គ្នាសុទ្ធតែមានជីវិត និងជីវភាពរស់នៅបានសមប្រកបទៅតាមចិត្តប្រាថ្នាទាំងអស់នោះទេ ។ ជាក់ស្តែងលោកតាវ័យចាស់ជរាជនជាតិព្នងម្នាក់អាយុ១០៤ឆ្នាំ បានធ្លាក់ខ្លួនលំបាកវេទនាតែឯង ខណៈជំងឺកំពុងវាយលុកលើរូបរាងកាយគ្មានពេលល្ហែ និងពុំមានកូនចៅសូម្បីតែម្នាក់សម្រាប់មើលការខុសត្រូវលើជីវិតជាជនចាស់ជរាឡើយ។ សពថ្ងៃរូបគាត់រស់នៅពឹងផ្អែកទាំងស្រុងទៅលើសណ្តានចិត្តរបស់អ្នកជិតខាងផ្តល់អាហារ និងកន្លែងស្នាក់នៅដ៏តូចចង្អៀត ។ សព្វថ្ងៃលោកតាទុរគតរស់នៅភូមិ-ឃុំដាក់ដាំ ស្រុកអូររាំង ខេត្តមណ្ឌលគិរី។
តាមប្រភពពីបុរសម្នាក់ឈ្មោះលុញដែលមានទីលំនៅក្បែរលោកតាកំសត់ទុរគតបានឱ្យដឹងថា លោកតាមានឈ្មោះសាង អាយុ១០៤ឆ្នាំ ពុំចេះនិយាយភាសាខ្មែរទេ ហើយគាត់ក៏ពុំមានប្រពន្ធកូនដែរ ។ លោកលុញបន្តថា លោកតារស់នៅម្នាក់ឯងស្ទើរមួយជិវិតទៅហើយ ហើយសព្វថ្ងៃគាត់រស់នៅដោយសារទឹកចិត្តរបស់អ្នកភូមិដែលបានផ្តល់អាហារបន្តិចបន្តួចសម្រាប់មួយពេលៗប៉ុណ្ណោះ។ មិនត្រឹមតែប៉ុណ្ណឹងទេ រូបគាត់បានធ្លាក់ខ្លួនឈឺអស់រយៈពេលជាង១០ឆ្នាំកន្លងមកហើយ រាល់ថ្ងៃសុខភាពរបស់លោកតាកំពុងរងនូវជំងឺជាច្រើនមុខ និងពុំអាចងើបដើរបានឡើយបានត្រឹមអង្គុយកិលមួយកន្លែង។ ជាងនេះទៅទៀតគាត់ពុំមានបងប្អូនញាតិមិត្តជួយទំនុកបម្រុងនោះទេ គឺមានតែម្នាក់ឯងគត់ ។
ដូច្នេះតាមរយៈកោះសន្តិភាពសូមសំណូមពរដល់សប្បុរសជនដែលមានទឹកចិត្តសប្បុរសធម៌មេត្តាជួយឧបត្ថម្ភជាអំណោយដល់លោកតាកំសត់ទុរគតម្នាក់នេះផង៕
ចែករំលែកព័តមាននេះ