ចិន​ស្នាក់​នៅ​ហើយ ថែម​ទាំង​ជាប់​…


ខេត្ត​ព្រះ​សីហ​នុ ៖ សេចក្តីរាយការណ៍​ឲ្យ​ដឹង​ថា ជនជាតិ​ចិន​ដែល​ចូល​មក​ស្នាក់​នៅ​បណ្តោះអាសន្ន​តំបន់​ទេសចរណ៍​ក្រុងព្រះសីហនុ​ភាគច្រើន​ជាប់​ពាក់​គ្រឿងញៀន​ឲ្យ​តែ​សមត្ថកិច្ច​ឃាត់​ឆែកឆេរ និង​ពិនិត្យ​ទឹកនោម ។

ជាក់ស្តែង​កាលពី​វេលា​ម៉ោង​១០​និង​៣០​នាទី​ព្រឹក​ថ្ងៃ​ទី​១២ ខែធ្នូ​នេះ​កម្លាំង​សមត្ថកិច្ច​ជំនាញ​ការិយាល័យ​នគរបាល​ប្រឆាំង​គ្រឿងញៀន​ខេត្ត​ព្រះ​សីហ​នុ​បាន​ចុះ​បង្ក្រាប​ករណី​ចែកចាយ និង​ប្រើប្រាស់​គ្រឿងញៀន​មួយ​កន្លែង​ដែល​ប្រព្រឹត្ត​នៅ​ចំណុច​ក្រុម​១ ភូមិ​៤ សង្កាត់​លេខ​៤ ក្រុង​-​ខេត្ត​ព្រះ​សីហ​នុ​បាន​ធ្វើការ​ឃាត់ខ្លួន​ជនសង្ស័យ​ម្នាក់​ដែល​មានឈ្មោះ A FENG ភេទ​ប្រុស អាយុ​៣២​ឆ្នាំ ជនជាតិ​ចិន ចូល​មក​ស្នាក់​នៅ​បណ្តោះអាសន្ន និង​ចាប់​យក​វត្ថុ​តាង​មាន​១- ម្សៅ​ក្រាម​ស​ថ្លា​សង្ស័យ​ជា​សារធាតុ​ញៀន​ចំនួន​២​កញ្ចប់​ទូរស័ព្ទ​ដៃ​១​គ្រឿង​ដែល​សំងំ​ប្រើប្រាស់ និង​ចែកចាយ​នៅ​ទីនោះ ។

ក្រោយ​ពី​ឃាត់ខ្លួន​ជនជាតិ​ចិន​ម្នាក់​នោះ​ទើបបាន​ចម្លើយ​ប្រាស្រ័យ​ទាក់ទង​ទៅ​ជនជាតិ​ចិន​១​ក្រុម​ទៀត​ដែល​ជា​មុខសញ្ញា​ទទួល​ការ​ចែកចាយ និង​ប្រើប្រាស់​គ្រឿងញៀន​ដូច​គ្នា ។ សេចក្តី​រាយ​ការ​បន្ត​ថា ក្រោម​ការ​អនុវត្ត​ច្បាប់​យ៉ាង​ម៉ឺងម៉ាត់ លោក​ឧត្តមសេនីយ៍ទោ ជួន ណា​រិ​ន្ទ ស្នងការ​នគរបាល​ខេត្ត​ព្រះ​សីហ​នុ​នៅ​វេលា​រសៀល​ថ្ងៃ​ទី​១៣ ខែធ្នូ បាន​ដាក់​បទបញ្ជា​ទៅ​កម្លាំង​ជំនាញ​ឲ្យ​ចុះ​បង្ក្រាប​មុខសញ្ញា​ពាក់ព័ន្ធ​គ្រឿងញៀន​ដោយ​នាំ​ឈ្មោះ A FENG ចូលរួម​សហការ ចង្អុលបង្ហាញ​ពី​សមាសភាព​ដែល​កំពុង​ធ្វើ​សកម្មភាព​ប្រព្រឹត្ត​បទល្មើស ។

កិច្ច​ប្រតិបត្តិការ​នោះ​បន្ត​ឈាន​ទៅ​ដល់​ការ​ឃាត់​ជនសង្ស័យ​ជា​ជនជាតិ​ចិន​២​នាក់​ទៀត ដែល​ម្នាក់​ឈ្មោះ PANJUN ភេទ​ប្រុស អាយុ​៣៥​ឆ្នាំ និង​ម្នាក់​ឈ្មោះ DU DE YOUNG ភេទ​ប្រុស អាយុ​៣០​ឆ្នាំ ស្ថិត​នៅ​ចំណុច​ក្រុម​១១ ភូមិ​២ សង្កាត់​លេខ​២ ក្រុង​-​ខេត្ត​ព្រះ​សីហ​នុ ។ លទ្ធផល​កម្លាំង​សមត្ថកិច្ច​បាន​ឆែកឆេរ​រក​ឃើញ​មាន​វត្ថុ​តាង​១- ម្សៅ​ក្រាម​ស​ថ្លា​សង្ស័យ​ជា​សារធាតុ​ញៀន​ចំនួន​១៧​កញ្ចប់​ម្សៅ​ម៉ត់​ស​ថ្លា សង្ស័យ​ជា​សារធាតុ​ញៀន​ចំនួន​១៣​កញ្ចប់ ប្រភេទ​ថ្នាំ​គ្រាប់​ចំនួន​៩០​គ្រាប់ និង​ទូរស័ព្ទ​ដៃ​ចំនួន​២​គ្រឿង ។

ក្រោយ​ពី​ឃាត់ខ្លួន​ជនសង្ស័យ​ទាំង​៣​នាក់​នោះ​សមត្ថកិច្ច​បាន​ធ្វើតេស្ត​(​ពិនិត្យ​)​ទឹកនោម​រក​ឃើញ​ថា ពួក​គេ​សុទ្ធតែ​ជាប់​ពាក់ព័ន្ធ​ប្រើប្រាស់​នូវ​សារធាតុ​ញៀន និង​ស្តាប់​ចម្លើយ​ជនសង្ស័យ បង្ហាញ​ឲ្យ​កាន់តែ​ច្បាស់​ថា ជនជាតិ​ចិន​ដែល​ចូល​មក​ស្នាក់​នៅ​តំបន់​ទេសចរណ៍​ក្រុងព្រះសីហនុ​ភាគច្រើន​ត្រូវ​បាន​ប្រើប្រាស់​គ្រឿងញៀន ។ ដោយ​មានការ​អះអាង​យ៉ាង​ដូច្នេះ​ព្រោះ​ពួក​គេ ជា​អ្នក​ចែកចាយ​ទើបបាន​ដឹង​ពី​សកម្មភាព​អ្នក​ប្រើប្រាស់​គ្រឿងញៀន ។ ជនសង្ស័យ និង​វត្ថុ​តាង​ត្រូវ​បាន​សមត្ថកិច្ច​កសាង​សំណុំរឿង​បញ្ជូន​ទៅ​សាលាដំបូង​ខេត្ត​តាម​នីតិវិធី ៕

ព័ត៌មាន​ជាតិ

Sponsored News

ការស្ទង់មតិគេហទំព័រថ្មី




សូម​អរគុណ