រាជធានីភ្នំពេញ ៖ ក្នុងពេលដែលកម្ពុជាកំពុងប្រឈមនឹងការដកការអនុគ្រោះពន្ធពីសហភាពអឺរ៉ុប វិនិយោគិនអឺរ៉ុបដែលកំពុងបណ្ដាក់ទុនរកស៊ីនៅកម្ពុជា បានស្នើឲ្យរាជរដ្ឋាភិបាលកម្ពុជាបន្តចរចាជាមួយសហភាពអឺរ៉ុបដើម្បីទទួលបានការអនុគ្រោះពន្ធសម្រាប់ទំនិញនាំចូលសហភាពអឺរ៉ុបបន្តទៀត ក្នុងគោលបំណងផ្ដល់អត្ថប្រយោជន៍ ។ លោក Lann Andreas…
រាជធានីភ្នំពេញ ៖ ក្នុងពេលដែលកម្ពុជាកំពុងប្រឈមនឹងការដកការអនុគ្រោះពន្ធពីសហភាពអឺរ៉ុប វិនិយោគិនអឺរ៉ុបដែលកំពុងបណ្ដាក់ទុនរកស៊ីនៅកម្ពុជា បានស្នើឲ្យរាជរដ្ឋាភិបាលកម្ពុជាបន្តចរចាជាមួយសហភាពអឺរ៉ុបដើម្បីទទួលបានការអនុគ្រោះពន្ធសម្រាប់ទំនិញនាំចូលសហភាពអឺរ៉ុបបន្តទៀត ក្នុងគោលបំណងផ្ដល់អត្ថប្រយោជន៍ ។
លោក Lann Andreas Johannes នាយកប្រតិបត្តិក្រុមហ៊ុន Pactics ផលិតសម្ភារ កាបូប ស្រោមវ៉ែនតា និងក្រណាត់ជូតវ៉ែនតា សម្រាប់នាំចេញទៅកាន់សហភាពអឺរ៉ុប បានឲ្យដឹងថា បើសិនជាភាគីពាក់ព័ន្ធទាំងពីរអង្គុយចរចាជាមួយគ្នា លោកជឿថា ដំណោះស្រាយនឹងអាចមាន ហើយវានឹងផ្ដល់ប្រយោជន៍ជាច្រើនទៀតដល់ពលរដ្ឋកម្ពុជា ពីការបន្តផ្ដល់ការអនុគ្រោះពន្ធមកកម្ពុជា ក្នុងការនាំទំនិញទៅកាន់សហភាពអឺរ៉ុប ។ លោកថ្លែងថា ៖« ខ្ញុំនៅតែមានជំនឿជាក់ខ្ពស់ចំពោះប្រព័ន្ធអនុគ្រោះពន្ធទំនិញគ្រប់យ៉ាងមកលើកម្ពុជា ក្នុងការនាំចូលទៅកាន់សហភាពអឺរ៉ុប »។
លោកបន្តថា បើសិនជាមានការដកEBA មែននោះ វានឹងបង្កផលប៉ះពាល់ភ្លាមៗតែម្ដងមកលើសមត្ថភាពប្រកួតប្រជែងរបស់ក្រុមហ៊ុនផលិត និងនាំចេញទៅកាន់សហភាពអឺរ៉ុបនៅក្នុងប្រទេសកម្ពុជា ជាមួយនឹងក្រុមហ៊ុនផលិតនិងចេញនាំចេញទៅអឺរ៉ុបដូចគ្នា តែនៅក្នុងប្រទេសជិតខាងរបស់កម្ពុជា ក៏ដូចជាជាមួយប្រទេសចិនជាដើម ។ លោកថា ៖« ការផ្ដល់EBA មកកម្ពុជារបស់អឺរ៉ុបបានផ្ដល់ប្រយោជន៍ច្រើនណាស់ដល់ពលរដ្ឋកម្ពុជា។ ជាក់ស្ដែង គ្រាន់តែក្រុមហ៊ុនរបស់យើង បានផ្ដល់ការងារជូនពលរដ្ឋប្រហែល៧០០នាក់ ហើយយើងក៏មានគម្រោងពង្រីកវិសាលភាពរបស់យើងបន្ថែមទៀត ដូច្នេះវានឹងផ្ដល់ការងារបន្ថែមទៀតដល់ពលរដ្ឋកម្ពុជា។ ប៉ុន្តែបើសិនជាEUដកការអនុគ្រោះពន្ធពីកម្ពុជាវិញនោះ យើងនឹងពិចារណា ហើយរង់ចាំមើលថាតើអតិថិជនដែលជាអ្នកបញ្ជាទិញរបស់យើងនឹងបន្តយកទំនិញពីយើងទៀត ឬក៏យ៉ាងណា ។ សរុបមក ភាពមិនប្រាកដមិនប្រជាដែលកើតចេញពីEBAនេះ នឹងមានច្រើនចំពោះប្រយោជន៍កម្ពុជា »។
លោកបានរំឭកថា កាលពីខែមុន លោកក៏បានជួបចរចាជាមួយឯកអគ្គរដ្ឋទូតសហភាពអឺរ៉ុបប្រចាំកកម្ពុជាដែរ ដើម្បីរកដំណោះស្រាយណាមួយផ្ដល់ជូនអ្នកវិនិយោគអឺរ៉ុបនៅក្នុងប្រទេសកម្ពុជា ដូចដែលបានដឹងហើយថា មានផលប៉ះពាល់ធំប៉ុនណាពីការផ្ដាច់ប្រព័ន្ធអនុគ្រោះពន្ធនេះ ។ លោកបន្ថែមថា ៖« សម្រាប់កម្មករ និយោជិតដែលបម្រើការនៅក្នុងរោងចក្រ Pactics បានទទួលលក្ខខណ្ឌការងារល្អប្រសើរ។ ជាក់ស្ដែងនៅពេលមានបុគ្គលិកសម្រាលកូនគម្រប់៣ខែ ពួកគេអាចយកកូនមករោងចក្រ ដោយយើងបានបង្កើតទារកដ្ឋានមួយសម្រាប់មើលថែកូនៗរបស់បុគ្គលិក ។ ជាក់ស្ដែងពេលបច្ចុប្បន្ននេះ មានទារកចំនួន១៦នាក់កំពុងត្រូវបានមើលថែ ដែលក្រុមហ៊ុនត្រូវចំណាយលើការមើលថែទាំងអស់ជូនពួកគេ »។ លោកថា ៖« យើងមិនចង់ឲ្យកម្មករនិយោជិតដែលមានជំនាញរបស់យើង ត្រូវសម្រាកនៅផ្ទះមើលថែកូន ដោយអត់មានចំណូលអ្វីនោះទេ ហើយយើងក៏មិនចង់រកបុគ្គលិកថ្មីៗមកបណ្ដុះបណ្ដាល និងប្រើពេលយូរនោះដែរ ដូចនេះហើយ ទើបយើងចំណាយថ្លៃមើលថែទារកនៅក្នុងរោងចក្រតែម្ដង ។ ម្យ៉ាងទៀត ម្ដាយទារកទាំងនោះ ក៏មានអារម្មណ៍កក់ក្ដៅ និងអាចបំពេញការងារបានយ៉ាងមានប្រសិទ្ធភាពផងដែរ » ។
លោកបញ្ជាក់ថា បច្ចុប្បន្ននេះ ទីផ្សារធំសម្រាប់ការនាំចេញរបស់ខ្លួនគឺបណ្ដាប្រទេសសហភាពអឺរ៉ុប បន្ទាប់មកសហរដ្ឋអាមេរិក ហើយលេខ៣នោះគឺប្រទេសចិន។ យ៉ាងណាមិញ សម្រាប់ការនាំចូលសម្ភារសម្រាប់ផលិតនៅក្នុងរោងចក្រមួយភាគធំ គឺនាំចូលពីប្រទេសចិន ។
ពាក់ព័ន្ធនឹងប្រព័ន្ធអនុគ្រោះពន្ធនេះ សេដ្ឋវិទូជាន់ខ្ពស់ និងជាទីប្រឹក្សារាជរដ្ឋាភិបាលកម្ពុជាបានផ្ដល់ទស្សនាទានដល់រាជរដ្ឋាភិបាលកម្ពុជា គួរតែរិះរកវិធីសាស្ត្រដែលអាចរស់ដោយខ្លួនឯង ដោយមិនចាំបាច់ពឹងលើ EBA នេះ ហើយកម្ពុជាគួរតែងាកទៅរកការផលិតនូវផលិតផលណាដែលមានតម្លៃបន្ថែមខ្ពស់សម្រាប់ជំរុញកំណើនសេដ្ឋកិច្ច និងអាចឲ្យពលរដ្ឋរកប្រាក់ចំណូលបានកាន់តែច្រើន ។
លោកបណ្ឌិត ម៉ី កល្យាណ សេដ្ឋវិទូ និងជាទីប្រឹក្សាជាន់ខ្ពស់នៃឧត្តមក្រុមប្រឹក្សាសេដ្ឋកិច្ចជាតិ បានថ្លែងថា ក្នុងដំណាក់កាលបច្ចុប្បន្ននេះ គឺជាពេលវេលាដែលត្រូវផ្លាស់ប្តូរបណ្ដើរៗហើយ មានន័យថា ផលិតផលសម្លៀកបំពាក់នៅតែធ្វើ តែគួរធ្វើរបស់ណាដែលមានតម្លៃខ្ពស់ជាងនេះ ហើយពេលនេះក៏បានឃើញថា មានផលិតថ្មីមួយទៀតដែលយើងកំពុងធ្វើរួចហើយនោះគឺ ផលិតផលធ្វើដំណើរ ( Traveling Goods ) និងកំពុងតែមានទីផ្សារផងដែរទៅកាន់អាមេរិក និងបណ្ដាប្រទេសជាច្រើន ។ អីចឹងរយៈពេលដែលខ្លួនកំពុងទទួលបានការអនុគ្រោះពន្ធនេះ យើងត្រូវស្វែងរកអ្វីដែលថ្មីៗបន្ថែមឲ្យបានច្រើន ។
លោកបណ្ឌិតបន្ថែមថា ៖« បើសិនជាយើងមិនពិពិធកម្មទាំងទីផ្សារ និងផលិតផល ហើយនៅតែពឹងលើខោអាវដូចបច្ចុប្បន្ន យើងអាចនឹងមានបញ្ហា ពីព្រោះថា កូនកសិករមួយចំនួនបានមកចាប់យករបរជាអ្នកផលិតខោអាវ ធ្វើការនៅរោងចក្រ និងលះបង់ស្រែចំការចោលបណ្ដើរៗហើយ ។ អីចឹង បើសិនជាគេឈប់ផ្ដល់អនុគ្រោះពន្ធ មានន័យថាទំនិញយើងនឹងឡើងថ្លៃនៅលើទីផ្សារលក់រាយប្រទេសទាំងនោះ ដូចនេះអាចនឹងបាត់បង់អ្នកទិញ ឬគេឈប់ទិញពីយើង គេទៅទិញពីប្រទេសណាដែលលក់តម្លៃទាបជាងយើង នោះហើយដែលធ្វើឲ្យកម្មករត្រូវបាត់បង់ការងារ និងងាកទៅស្រែវិញ ជួនកាលស្រែចំការធ្វើមិនបានផលទៀត ដែលជាហេតុធ្វើឲ្យមានបញ្ហាកើតឡើង » ៕
ចែករំលែកព័តមាននេះ