ខេត្តក្រចេះ ៖ ស្ត្រីជាមេខ្យល់ម្នាក់ក្នុងអំពើជួញដូរមនុស្សខុសច្បាប់ ឱ្យទៅធ្វើការនៅក្រៅប្រទេស ត្រូវបានតុលាការខេត្ត សម្រេចចេញដីកាឃុំខ្លួនបណ្តោះអាសន្ន នៅពន្ធនាគារខេត្តក្រោមបទចោទប្រកាន់ ការនាំយកចេញ ដោយមិនស្របច្បាប់សម្រាប់នាំឆ្លងដែន ។
ស្ត្រីជាមេខ្យល់ក្នុងអំពើជួញដូរមនុស្សនេះ ក៏ធ្លាប់ជាអតីតបុគ្គលិកក្រុមហ៊ុននាំពលករទៅធ្វើការនៅប្រទេសម៉ាឡេស៊ី ហើយត្រូវបានរាជរដ្ឋាភិបាលបញ្ឈប់ក្រុមហ៊ុន មិនឲ្យធ្វើអាជីកម្មទើបស្ត្រីរូបនេះបានប្រើល្បិចកល់ខ្លួនឯងបន្តការនាំមនុស្សចេញ ។ ស្ត្រីរូបនេះឈ្មោះ ផូ មឿន អាយុ៣១ឆ្នាំ នៅខណ្ឌដង្កោ រាជធានីភ្នំពេញ ត្រូវបានលោក ញិល ប៊ុនលី ចៅក្រមស៊ើបសួរនៃសាលាដំបូងខេត្តក្រចេះ សម្រេចចោទប្រកាន់និងឃុំខ្លួននៅថ្ងៃទី៨ ខែធ្នូ ។
ស្នងការរងប្រឆាំងការជួញដូរមនុស្ស និងការពារអនីតិជនខេត្តលោកស្រី វរសេនីយ៍ឯក នៅ រតនា បានប្រាប់ឲ្យដឹងថា ស្ត្រីជាមេខ្យល់រូបនេះ ត្រូវបានកម្លាំងសមត្ថកិច្ចបានស្រាវជ្រាវ ចាប់ខ្លួននៅរាជធានីភ្នំពេញ ។ ការចាប់ខ្លួនស្ត្រីរូបនេះពីកម្លាំងសមត្ថកិច្ចគឺបានធ្វើឡើង ទៅតាមពាក្យបណ្តឹងរបស់ឪពុកម្តាយក្មេងស្រីរងគ្រោះអាយុ២៧ឆ្នាំម្នាក់ រស់នៅឃុំចង្ក្រង់ ស្រុកចិត្របុរី ដែលស្ត្រីរូបនេះបានបោកបញ្ឆោតនាងឲ្យទៅធ្វើការនៅប្រទេសម៉ាឡេស៊ី តាមរយៈក្រុមហ៊ុននាំពលករតាំងពីឆ្នាំ២០១៤ ហើយរហូតមកទល់និងពេលនេះក៏បានបាត់ដំណឹង ។
បើតាមលោកស្រីស្នងការររងបានឲ្យដឹងទៀតថា ក្រោយការសាកសួរបានរកឃើញថា ក្រោយបញ្ចប់ការងារពីបុគ្គលិកក្រុមហ៊ុននាំពលករ ដែលរាជរដ្ឋាភិបាលបានបិទមិនឲ្យមានអាជីវកម្មបែបនេះទៀត ស្ត្រីជាមេខ្យល់រូបនេះនិងបក្សពួក២នាក់ផ្សេងទៀត នៅតែបន្តលួចធ្វើជំនួញនាំនារីទៅក្រៅប្រទេសដោយខុសច្បាប់បន្តទៀត ។
លោកស្រីបញ្ជាក់ថា មាននារីចំនួនជាង៣០នាក់ ដែលត្រូវបានស្ត្រីជាមេខ្យល់រូបនេះ និងបក្សពួកពីរនាក់ដែលគេចខ្លួនបានបោកបញ្ឆោតពួកគេនាំទៅធ្វើការនៅប្រទេសម៉ាឡេស៊ីដោយខុសច្បាប់ ។ នារីដែលរងគ្រោះទាំងចំនួនជាង៣០នាក់ដែលត្រូវបានពួកគេបាននាំយកចេញក្រៅប្រទេស ក្នុងនោះភាគច្រើនជាអ្នករស់នៅខេត្តក្រចេះ ខេត្តកំពង់ចាម និងខេត្តកំពង់ធំ ។
លោកស្រីវរសេនីយ៍ឯក នៅ រតនា បានអះអាងថា ចំពោះជន២នាក់ប្តីប្រពន្ធផ្សេង ទៀតដែលនៅពីក្រោយខ្នងស្ត្រីសង្ស័យរូបនេះលើជំនួញជួញដូរមនុស្សឆ្លងដែន ពេលនេះពួកគេកំពុងតែគេចខ្លួន ហើយនគរបាលកំពុងតែស្រាវជ្រាវចាប់ខ្លួនពួកគេផងដែរ ព្រោះបានស្គាល់អត្តសញ្ញាណអស់ហើយ ចាំមើលគេចទៅពួនដល់ទីណា ៕
ចែករំលែកព័តមាននេះ