ខេត្តកំពង់ស្ពឺ ៖ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជាបានអញ្ជើញចុះចែកអំណោយដល់អ្នកផ្ទុកមេរោគអេដស៍ ចាស់ជរាគ្មានទីពឹង កុមារកំព្រា និងជនពិការចំនួន៦០៣គ្រួសារដែលរស់នៅក្នុងឃុំចំនួន៧ ក្នុងស្រុកថ្ពង កាលពីថ្ងៃទី២៤ មិថុនា ។ ពិធីចែកអំណោយនោះបានធ្វើឡើងនៅលើទំនប់អន្លង់ជ្រៃ ភូមិអន្លង់ជ្រៃ ឃុំប្រាំបីមុំ ស្រុកថ្ពង ។
ខេត្តកំពង់ស្ពឺ ៖ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជាបានអញ្ជើញចុះចែកអំណោយដល់អ្នកផ្ទុកមេរោគអេដស៍ ចាស់ជរាគ្មានទីពឹង កុមារកំព្រា និងជនពិការចំនួន៦០៣គ្រួសារដែលរស់នៅក្នុងឃុំចំនួន៧ ក្នុងស្រុកថ្ពង កាលពីថ្ងៃទី២៤ មិថុនា ។ ពិធីចែកអំណោយនោះបានធ្វើឡើងនៅលើទំនប់អន្លង់ជ្រៃ ភូមិអន្លង់ជ្រៃ ឃុំប្រាំបីមុំ ស្រុកថ្ពង ។
ប្រជាពលរដ្ឋដែលទទួលអំណោយទាំងនោះក្នុងមួយគ្រួសារៗទទួលបានអង្ករ៣០គីឡូក្រាម មី១កេស ត្រីខ១០កំប៉ុង សារុង១ ក្រមា១ មុង១ ភួយ១ ទឹកបរិសុទ្ធឱរ៉ាល់១ដប ប្រេងឆា១ដប ថវិកា២ម៉ឺនរៀល និងក្រណាត់ស១ដុំ និងថវិកា១ម៉ឺនរៀលពីលើអំណោយទាំងនោះ ជាអំណោយរបស់សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ។ ដោយឡែកចំពោះជនពិការ៧នាក់ ម្នាក់ៗទទួលបានរទេះពិការមួយគ្រឿង និងថវិកា១០ម៉ឺនរៀល ។
មានមតិសំណេះសំណាលនៅក្នុងឱកាសនោះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន បានមានប្រសាសន៍ថា កាកបាទក្រហមកម្ពុជាគឺជាអង្គការក្រៅរដ្ឋាភិបាលមួយដែលធ្វើសកម្មភាពអាស្រ័យដោយអំណោយសប្បុរសជនគ្រប់មជ្ឈដ្ឋាន ដែលបានយកទៅផ្តល់ជូនកាកបាទក្រហមកម្ពុជា ដើម្បីជួយប្រជាពលរដ្ឋរងគ្រោះឱ្យបានទាន់ពេលវេលា ។ ជាមួយគ្នានេះ សម្តេចបានរំលឹកអំពីការលំបាក សេចក្តីវេទនា និងការកាប់សម្លាប់ក្នុងសម័យប៉ុលពត ដែលមនុស្សគ្រប់រូបមិនអាចបំភ្លេចបាន និងបានអំពាវនាវឱ្យប្រជាពលរដ្ឋទាំងអស់ចេញទៅបោះឆ្នោតឱ្យបានគ្រប់ៗគ្នានៅថ្ងៃទី២៨ កក្កដាខាងមុខនេះ ។
ជាងនេះទៅទៀត សម្តេចក៏បានអំពាវនាវដល់ស្ត្រីមានផ្ទៃពោះដែលមានផ្ទុកមេរោគអេដស៍ផងដែរ កុំឱ្យមានចិត្តលាក់លៀមទៀត ត្រូវមានចិត្តក្លាហាន ហ៊ានចេញមុខពិគ្រោះយោបល់ជាមួយគ្រូពេទ្យដើម្បីទទួលបានថ្នាំការពារកុំឱ្យឆ្លងទៅកូននៅពេលឆ្លងទន្លេ ។ សម្តេចបានស្នើសុំឱ្យអាជ្ញាធរដែនដីគ្រប់លំដាប់ថ្នាក់ត្រូវពិនិត្យមើលឱ្យបានល្អកុំឱ្យកើតមានល្បែងស៊ីសងគ្រប់ប្រភេទ ដែលជាហេតុបង្កឱ្យកើតមានអំពើហិង្សានៅក្នុងមូលដ្ឋាន កើតមានអំពើចោរកម្មដូចជា ចោរលួច ចោរឆក់ ចោរប្លន់ជាដើម ។
ក្រៅពីនេះសម្តេចបានសំណូមពរឱ្យបងប្អូនប្រជាពលរដ្ឋទាំងអស់ត្រូវគោរពច្បាប់ចរាចរណ៍ឱ្យបានគ្រប់ៗគ្នា ពីព្រោះបញ្ហាគ្រោះថ្នាក់ចរាចរណ៍នាពេលបច្ចុប្បន្ននេះកំពុងក្លាយជាក្តីកង្វល់យ៉ាងធំធេងសម្រាប់រដ្ឋាភិបាលដោយសារតែអត្រាស្លាប់កំពុងកើតមានក្នុងចំនួនមួយដែលគួរឱ្យព្រួយបារម្ភបំផុត ៕
ចែករំលែកព័តមាននេះ