ខេត្តស្វាយរៀង ៖ កាលពីថ្ងៃទី២៣ មិថុនា នៅក្នុងវត្តពោធិ៍សន្តោតមានរៀបចំពិធីសម្ពោធដាក់ឱ្យប្រើប្រាស់ស្ថានីយបូមទឹកសម្តេចតេជោ ហ៊ុន សែន ភូមិសូ ស្ថិតនៅភូមិសូ ឃុំដូនស ស្រុកស្វាយជ្រំ ក្រោមអធិបតីភាពលោកជំទាវបណ្ឌិត ម៉ែន សំអន ប្រធានគណៈកម្មាធិការកណ្តាលចុះជួយខេត្តស្វាយរៀង ។ នៅក្នុងពិធិនោះក៏មានការអញ្ជើញចូលរួមពីមន្ត្រីក្រុមការងារចុះជួយស្រុកស្វាយជ្រំ លោកគ្រូ-អ្នកគ្រូ សិស្សានុសិស្ស និងប្រជាពលរដ្ឋសរុប២.៤២៩នាក់ផងដែរ ។
លោក សុទ្ធ គឹមច័ន្ទ អភិបាលស្រុកស្វាយជ្រំបានឡើងអានរបាយការណ៍ជូនគណៈអធិបតី និងអង្គពិធីឱ្យបានជ្រាបថា ស្ថានីយបូមទឹកសម្តេចតេជោហ៊ុន សែន ភូមិសូ នេះគឺជាអំណោយដ៏ថ្លៃថ្លារបស់សម្តេចតេជោ ហ៊ុន សែន ។ ភូមិសូនេះបានជីកប្រឡាយមេប្រវែង៣០០ម៉ែត្រ ជម្រៅ៣ម៉ែត្រ មាត់ប្រឡាយទំហំ៤,៥ម៉ែត្រ ដើម្បីនាំទឹកពីអាងកំពង់សូ មកស្ថានីយដែលមានបំពាក់មា៉ស៊ីនចំនួន២គ្រឿង មានបំពង់បូមទឹកមុខកាត់០,៥០ម៉ែត្រ និងប្រឡាយបណ្តែតធ្វើពីបេតុងប្រវែង២៦០ម៉ែត្រ បាតក្រោម១ម៉ែត្រ មាត់លើ២ម៉ែត្រ ដើម្បីបង្ហូរទឹកចែកចាយនៅតាមប្រឡាយនានាក្នុងភូមិសូ ភូមិព្រៃរកា ភូមិដូងព្រះ ភូមិបឹងកែក ភូមិចិន្សា និងភូមិអូរស្រងាំ ដែលអាចជួយសង្គ្រោះ និងស្រោចស្រពលើផ្ទៃដីស្រែប្រមាណមួយពាន់ហិកតា ។
លោកជំទាវបណ្ឌិត ម៉ែន សំអន បានមានមតិសំណេះសំណាលថា នេះជាស្ថានីយបូមទឹកទី៤៩ហើយ ដែលជាអំណោយដ៏ថ្លៃថ្លារបស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រា៉នី ហ៊ុន សែន និងការចូលរួមអំពីថ្នាក់ដឹកនាំរាជរដ្ឋាភិបាល និងសប្បុរសជននានាដែលមានជំនឿលើរាជរដ្ឋាភិបាលក្នុងការអភិវឌ្ឍជាតិលើគ្រប់វិស័យ ។
នៅក្នុងពិធីនេះក៏មានការបំពាក់គ្រឿងឥស្សរិយយសដល់សប្បុរសជន និងផ្តល់អំណោយជូនលោកគ្រូ-អ្នកគ្រូ៨៥នាក់ ក្នុងម្នាក់ៗសារុង១ សាប៊ូក្រអូប១ដុំ ប្រាក់២ម៉ឺនរៀល ។ គ្រូពេទ្យ៩នាក់ ក្នុងម្នាក់ៗសារុង១ សាប៊ូ១ដុំ ប្រាក់២ម៉ឺនរៀល ។ យាយជីតាជី១០០នាក់ ក្នុងម្នាក់ៗក្រណាត់ស១ដុំ ប្រាក់១ម៉ឺនរៀល ។ សិស្សានុសិស្ស៩០៦នាក់ ក្នុងម្នាក់ៗទទួលបានសៀវភៅ២ក្បាល ប៊ិក១ដើម ប្រាក់៥ពាន់រៀល ។ កម្លាំងសមត្ថកិច្ច៤៥នាក់ ម្នាក់ៗទទួលបានប្រាក់២ម៉ឺនរៀល និងប្រជាពលរដ្ឋ១.៣៣៥នាក់ ក្នុងម្នាក់ៗសារុង១ សាប៊ូ១ដុំ ៕
ចែករំលែកព័តមាននេះ