រាជធានីភ្នំពេញ ៖ មន្ត្រីអ្នកនាំពាក្យអាកាសចរស៊ីវិល បានអះអាងថា ព្រលានយន្តហោះអន្តរជាតិថ្មីដែលស្ថិតក្នុងស្រុកសូទ្រនិគម ខេត្តសៀមរាប កំពុងដំណើរការសាងសង់សន្សឹមៗ ខណៈការចរចាជាមួយក្រុមហ៊ុនវិនិយោគព្រលានយន្តហោះកម្ពុជា ស្ថិតក្នុងភាពមិនច្បាស់លាស់ ។…
រាជធានីភ្នំពេញ ៖ មន្ត្រីអ្នកនាំពាក្យអាកាសចរស៊ីវិល បានអះអាងថា ព្រលានយន្តហោះអន្តរជាតិថ្មីដែលស្ថិតក្នុងស្រុកសូទ្រនិគម ខេត្តសៀមរាប កំពុងដំណើរការសាងសង់សន្សឹមៗ ខណៈការចរចាជាមួយក្រុមហ៊ុនវិនិយោគព្រលានយន្តហោះកម្ពុជា ស្ថិតក្នុងភាពមិនច្បាស់លាស់ ។
អ្នកនាំពាក្យរដ្ឋលេខាធិការដ្ឋានអាកាសចរស៊ីវិល លោក ស៊ិន ចាន់សិរីវុត្ថា បានឲ្យដឹងតាមទូរស័ព្ទកាលពីថ្ងៃទី៣ ធ្នូ ម្សិលមិញថា គម្រោងសាងសង់ព្រលានយន្តហោះនេះកំពុងឆ្ពោះទៅមុខសន្សឹមៗ តែមិនលឿនតាមអ្វីដែលយើងចង់បាននោះទេ ព្រោះព្រលានយន្តហោះមួយអាចចំណាយពេលសាងសង់ចន្លោះពេលពី៥ទៅ១០ឆ្នាំ ។
លោកបន្តថា តាមព័ត៌មានដែលលោកដឹង គឺក្រុមហ៊ុនវិនិយោគព្រលានយន្តហោះនេះបានឈូសឆាយពង្រាបដីជិតរួចរាល់ហើយ ខណៈពេលនេះពួកគេកំពុងធ្វើតេស្តដី និងការងារបច្ចេកទេសច្រើន ដើម្បីឈានទៅបើកការដ្ឋានសាងសង់នៅពេលខាងមុខ ។ លោកថា ៖« ការងារបច្ចេកទេស ជាការងារលំបាកស្មុគស្មាញ ដែលអាចចំណាយពេល១ឆ្នាំទៀត ទើបអាចរៀបចំចប់ ព្រោះព្រលានយន្តហោះមួយៗមិនមែនចេះតែធ្វើនោះទេ »។ លោកសង្កត់ធ្ងន់ថា ៖« ខ្ញុំអាចបញ្ជាក់បានថា គម្រោងរបស់រាជរដ្ឋាភិបាលនីមួយៗមិនមានការផ្លាស់ប្តូរទេ គ្រាន់តែអ្វីៗអាចដំណើរការបាន គឺត្រូវការពេលវេលាច្រើន »។
លោក ស៊ិន ចាន់សិរីវុត្ថា បានបន្តថា គម្រោងព្រលានយន្តហោះនេះនឹងសាងសង់ជា ២ដំណាក់កាល ដោយដំណាក់កាលទី១ អាចចំណាយថវិកាប្រមាណ៥៥០លានដុល្លារ និងដំណាក់កាលទី២ នឹងចំណាយថវិកាប្រមាណ៣៥០លានដុល្លារ ដើម្បីពង្រីកទំហំព្រលានយន្តហោះនេះកាន់តែធំ និងអាចចុះចតយន្តហោះធំៗបាន ។ នៅក្នុងកិច្ចប្រជុំជាមួយអភិបាលខេត្តសៀមរាបកាលពីពេលថ្មីៗនេះ លោក Zou Yuhuiនាយករងក្រុមហ៊ុន YUNAN DEVELOPMENT GROUP ដែលជាក្រុមហ៊ុនទទួលបានសិទ្ធិវិនិយោគព្រលានយន្តហោះនេះ បានស្នើឲ្យអាជ្ញាធរខេត្តសៀមរាបយកចិត្តទុកដាក់លើការងារបច្ចេកទេសមួយចំនួន ពិសេសទីតាំងជុំវិញអាកាសយានដ្ឋាននេះ ទាក់ទងនឹងបង្គោលភ្លើង វត្តនៅលើភ្នំ និងគម្រោងអភិវឌ្ឍន៍ខេត្ត ដើម្បីធានាសុវត្ថិភាពដល់វិស័យអាកាសចរណ៍ ។
ព្រលានយន្តហោះនេះមានទីតាំងស្ថិតនៅឃុំតាយែក ស្រុកសូទ្រនិគម ខេត្តសៀមរាប ។
បើតាមលោក Zou Yuhui បានបន្តឲ្យដឹងផងដែរថា រហូតមកទល់ពេលនេះ ក្រុមហ៊ុនបានកំពុងរៀបចំ និងកសាងផែនការមេ ព្រមទាំងហេដ្ឋារចនាសម្ព័ន្ធមួយចំនួនរួចហើយ ដើម្បីជំរុញឲ្យដំណើរការសាងសង់ព្រលាននេះ ទទួលបានជោគជ័យតាមការគ្រោងទុក ។
ទីប្រឹក្សាសមាគមទីភ្នាក់ងារទេសចរណ៍កម្ពុជា លោក ហូ វណ្ឌី បានថ្លែងថា នៅពេលព្រលានយន្តហោះនេះសាងសង់ចប់ និងអាចចុះចតយន្តហោះខ្នាតធំបាន វានឹងជួយទាក់ទាញវិស័យអាកាសចរណ៍ភ្ជាប់ជើងហោះហើរកាន់តែច្រើនថែមទៀត ពិសេសនឹងនាំមកមិនត្រឹមតែភ្ញៀវទេសចរនោះទេ តែក៏នាំមកនូវវិស័យពាណិជ្ជកម្ម និងទាក់ទាញការវិនិយោគបន្ថែមទៀតផងដែរ ។ លោកបន្តថា ៖« វាជារឿងអបអរសាទរ ចាប់តាំងពីការដាក់ចេញនូវគោលនយោបាយ បើកចំហជើងមេឃរបស់ប្រមុខរាជរដ្ឋាភិបាល វិស័យអាកាសចរណ៍នៅកម្ពុជាមានភាពរីកចម្រើនខ្លាំង ហេតុនេះពេលព្រលាននេះសាងសង់ចប់ នឹងជំរុញវិស័យនេះឲ្យកាន់តែរីកចម្រើនបន្ថែមទៀត »។
ព្រលានយន្តហោះអន្តរជាតិថ្មីនៅខេត្តសៀមរាបនេះ នឹងត្រូវសាងសង់នៅលើផ្ទៃដីជាង៧០០ហិកតា ក្រោមទុនវិនិយោគប្រមាណ៩០០លានដុល្លារ ដែលវិនិយោគដោយក្រុមហ៊ុនYUNAN Development Group ជាក្រុមហ៊ុនយក្សមួយមានមូលដ្ឋាននៅប្រទេសចិន ។ រយៈពេល៥ឆ្នាំចុងក្រោយនេះ កំណើននៃការធ្វើដំណើរតាមផ្លូវអាកាសមានការកើនឡើងជាបន្ដបន្ទាប់ ។ ជាក់ស្ដែងក្នុងឆ្នាំ២០១៧ អាកាសយានដ្ឋានទាំង៣របស់កម្ពុជា ទទួលបានអ្នកដំណើរចំនួន៨លាននាក់ បើធៀបនឹងឆ្នាំ២០១៦ មានចំនួន៧លាននាក់ ។ ដោយឡែកក្នុងឆ្នាំ២០១៨នេះ កម្ពុជាកំពុងត្រៀមទទួលស្វាគមន៍អ្នកដំណើរតាមផ្លូវអាកាសចំនួន១០លាននាក់ផងដែរ ៕
ចែករំលែកព័តមាននេះ