ខេត្តក្រចេះ ៖ លំនៅឋាននៅតាមដងទន្លេមេគង្គក្នុងស្រុកឆ្លូង បានរងគ្រោះដោយការបាក់ច្រាំងគួរឲ្យបារម្ភនាប៉ុន្មានឆ្នាំចុងក្រោយនេះដោយមានផ្ទះឈើតូចធំយ៉ាងហោចណាស់ជាង២០ខ្នង ដែលសង់នៅជួរមាត់ច្រាំងទន្លេផ្សេងៗគ្នា រងការបាក់ស្រុតខូចខាតជាបន្តបន្ទាប់ ។
ជាថ្មីទៀត យ៉ាងហោចណាស់លំនៅឋាន៥ខ្នងដែលសង់ជាប់ៗគ្នានៅតាមបណ្តោយមាត់ច្រាំងទន្លេមេគង្គ ក្នុងភូមិកោះកណ្តុរ ឃុំឆ្លូង ស្រុកឆ្លូង បានបាក់ស្រុតចូលទៅក្នុងទន្លេជាមួយនឹងដីច្រាំង ក្នុងនោះមានផ្ទះ១ខ្នងក្រោយពីបានបាក់រលំថែមទាំងឆេះសន្ធោសន្ធៅទៀតដោយសារទុស្សេចរន្តអគ្គិសនី ។
ការបាក់ដីច្រាំងទន្លេដែលបានកើតមានជាថ្មីនេះ គឺនៅយប់ថ្ងៃទី២៦ ខែវិច្ឆិកា និងត្រូវបានអាជ្ញាធរស្រុកឆ្លូងបញ្ជាក់ថា ទោះបីមានការបាក់ច្រាំងនាវេលាយប់មែន តែមិនបានបង្កឲ្យមានគ្រោះថ្នាក់ដល់អាយុជីវិតជាម្ចាស់ផ្ទះនោះទេ ដោយសារតែស្ថានភាពនៃការបាក់កើតមានយឺតៗ ធ្វើឲ្យពួកគាត់អាចជម្លៀសខ្លួនក៏ដូចជា
នាំយកសម្ភារសំខាន់ៗចេញមកក្រៅបានខ្លះ ។
ទោះជាយ៉ាងណា ហេតុការណ៍នេះបណ្តាលឲ្យផ្ទះឈើនិងផ្ទះបេតុងសរុបចំនួន៥ខ្នង ក្នុងនោះ៤ខ្នងជាលំនៅឋានរបស់ជនជាតិវៀតណាម ត្រូវខូចខាតស្ទើរទាំងស្រុង ។ចំពោះការបាក់ច្រាំងទន្លេដែលបណ្តាលឲ្យខូចខាតលំនៅឋាននេះ ត្រូវបានអាជ្ញាធរលើកឡើងថា ដោយសារខេត្តក្រចេះបានទទួលរងនូវឥទ្ធិពលពីព្យុះ USAGI ដែលបានបង្កជាភ្លៀងធ្លាក់យ៉ាងគំហុកក្នុងរយៈពេល២យប់១ថ្ងៃ ទើបធ្វើឲ្យទឹកភ្លៀងហូរច្រោះដីច្រាំងទន្លេដែលជាប្រភេទដីល្បាប់ ទើបបណ្តាលឲ្យបាក់ស្រុតលំនៅឋានខាងលើចូលក្នុងទន្លេតែម្តង ។
ប៉ុន្តែបើទោះបីជាអាជ្ញាធរលើកឡើងបែបនេះក្តី តែសម្រាប់ពលរដ្ឋវិញលើកឡើងថា មូលហេតុដែលស្រុកឆ្លូងតែងតែជួបនឹងស្ថានភាពបាក់ច្រាំងទន្លេជាញឹកញាប់បែបនេះ គឺបណ្តាលមកពីការធ្វើអាជីវកម្មបូមក្រួស ខ្សាច់ របស់ក្រុមឈ្មួញអាជីវកម្មធំៗ ដែលកំពុងមានសកម្មភាពនៅកណ្តាលទន្លេជារៀងរាល់ថ្ងៃ ។
ប្រជាពលរដ្ឋបានលើកឡើងទៀតថា កន្លងមកដោយសារតែមានក្តីបារម្ភពីការបាក់ច្រាំងទន្លេបែបនេះហើយ ទើបពួកគាត់បានស្នើទៅអាជ្ញាធរស្រុកឲ្យមានវិធានការបញ្ឈប់អាជីវកម្មបូមក្រួស ខ្សាច់ នៅកណ្តាលទន្លេមេគង្គក្នុងស្រុកមួយនេះ តែការបញ្ឈប់បានត្រឹមតែមួយរយៈពេលខ្លីប៉ុណ្ណោះ ក៏បន្តធ្វើដដែល ។
គួររំឭកថា កាលពីចុងឆ្នាំ២០១៦កន្លងមកមានលំនៅឋានពលរដ្ឋខ្មែរអ៊ិស្លាមដែលសង់នៅតាមតំបន់ជួរមាត់ទន្លេក្នុងឃុំព្រែកសាម៉ាន់ ស្រុកឆ្លូង យ៉ាងហោចណាស់ជាង២០ខ្នង មានតូចមានធំ បានជួបមហន្តរាយបាក់ស្រុតចូលក្នុងទន្លេទៅជាមួយនឹងដីច្រាំង ។
ក្រោយមកទៀត កាលពីដើមខែវិច្ឆិកាកន្លងទៅថ្មីៗនេះ មានផ្ទះឈើធំមួយខ្នងប្រក់សីង្កសី ដែលសង់នៅលើដីមាត់ច្រាំងទន្លេមេគង្គ ក្នុងឃុំឆ្លូង ស្រុកឆ្លូង បានរងការខូចខាត ក្រោយពីជួបហេតុការណ៍បាក់ស្រុតជាមួយនឹងដីច្រាំងទន្លេដូចគ្នា ។ការបាក់ច្រាំងទន្លេដែលបង្កជាមហន្តរាយធ្ងន់ធ្ងរទាំងអស់នេះ ត្រូវបានអាជ្ញាធរស្រុក និងខេត្តអះអាងថា គឺបណ្តាលមកពីការហូរច្រោះនៃទឹកភ្លៀង ៕
ចែករំលែកព័តមាននេះ