ខេត្តកណ្តាល ៖ សម្តេចតេជោមានប្រសាសន៍ថា សម្រាប់ឆ្នាំ២០១៨ និង២០១៩ ខាងមុខរាជរដ្ឋាភិបាលត្រូវបង់ខាតប្រាក់ចំណូលរដ្ឋប្រមាណ១២០លានដុល្លារ ដើម្បីតំឡើងប្រាក់បៀវត្សឲ្យកម្មករ ។ សម្តេចបានលើកពីការប្រឹងប្រែង រក្សាសុខសន្តិភាព…
ខេត្តកណ្តាល ៖ សម្តេចតេជោមានប្រសាសន៍ថា សម្រាប់ឆ្នាំ២០១៨ និង២០១៩ ខាងមុខរាជរដ្ឋាភិបាលត្រូវបង់ខាតប្រាក់ចំណូលរដ្ឋប្រមាណ១២០លានដុល្លារ ដើម្បីតំឡើងប្រាក់បៀវត្សឲ្យកម្មករ ។ សម្តេចបានលើកពីការប្រឹងប្រែង រក្សាសុខសន្តិភាព ស្ថេរភាពនយោបាយ ការកសាង ហេដ្ឋា រចនាសម្ព័ន្ធលើគ្រប់វិស័យ ការបណ្តុះបណ្តាល ធនធានមនុស្សដើម្បីទាក់ទាញវិនិយោគិនឲ្យ មកកម្ពុជា ។
សម្តេចតេជោនាយករដ្ឋមន្ត្រីបានថ្លែងក្នុងពេលសម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បន្តអញ្ជើញជួបសំណេះសំណាលជាមួយកម្មករ-កម្មការិនីសរុបប្រមាណ១៧៩១២នាក់ មកពីរោងចក្រ សហគ្រាសចំនួន១២ នៅក្នុងខេត្តកណ្តាល ដែលពិធីនេះធ្វើឡើងនៅភូមិក្រាំងស្បូវ ឃុំព្រះពុទ្ធ ស្រុកកណ្តាលស្ទឹង ខេត្តកណ្តាល នាព្រឹកថ្ងៃទី២៨ ខែវិច្ឆិកា ឆ្នាំ២០១៨ ។
សម្តេចបានលើកឡើងជាពិសេស ការយកចិត្តទុកដាក់ដំឡើងប្រាក់បៀវត្សឲ្យកម្មករ នៅឆ្នាំក្រោយ ឡើងដល់១៨២ដុល្លារ ដោយរដ្ឋបានចំណាយការខាតបង់ប្រមាណ៨០លានដុល្លារ ក្នុង១ឆ្នាំ ក្នុងគោលដៅជំរុញការតំឡើងប្រាក់បៀវត្សហូតឲ្យបានដល់២៤០ដុល្លារ ឬ២៥០ដុល្លារនៅពេលខាងមុខនេះ ។
សម្ដេចបានប្រាប់កម្មករថា ការចុះជួបកម្មករ មិនមែនត្រូវបញ្ចប់នៅឆ្នាំ២០១៨, ២០១៩ ឬ២០២០នោះទេ ដ៏រាបណាសម្តេចនៅធ្វើជានាយករដ្ឋមន្ត្រី សម្តេចនឹងនៅតែបន្តចុះជួបជាមួយ កម្មករយ៉ាងតិច១០ឆ្នាំទៅមុខទៀត ។ សម្តេចថា ការចុះជួបកម្មករ ក្នុងគោលដៅដើម្បីជំរុញការអភិវឌ្ឍ វិស័យឧស្សាហកម្មនៅកម្ពុជាឲ្យទទួលបានការរីកចម្រើនបន្ថែមទៀត ៕
ចែករំលែកព័តមាននេះ