ខេត្ដសៀមរាប ៖ ស្របពេលដែលរាជរដ្ឋាភិបាលកម្ពុជា កំពុងប្រឹងប្រែងពង្រឹងឡើងវិញនូវវិស័យជលផល ដោយបានលុបចោលឡូត៍នេសាទនៅទូទាំងប្រទេស ជាពិសេសក្នុងបឹងទន្លេសាប ដើម្បីប្រយោជន៍ស្ដារធនធានមច្ឆជាតិឱ្យសម្បូរឡើងវិញ ។ បច្ចុប្បន្នគេសង្កេតឃើញនិគមជនយួនមួយចំនួនកំពុងបង្វែរទិសដៅមកចិញ្ចឹមត្រីរ៉ស់ និងត្រីឆ្ដោនៅតាមស្រះវិញម្ដង ហើយកូនត្រីតូចៗរាប់លានក្បាលក្នុងមួយថ្ងៃៗត្រូវបានបំផ្លិចបំផ្លាញយ៉ាងរង្គាលពីបឹងធម្មជាតិ ដើម្បីយកមកផ្គត់ផ្គង់ដល់ការចិញ្ចឹមត្រីប្រភេទនេះ ។
សកម្មភាពចិញ្ចឹមត្រីរ៉ស់ និងត្រីឆ្ដោជាពពួកត្រីស៊ីត្រីគ្នាវាជាចំណី ត្រូវបានហាមឃាត់ តែនិគមជនយួនទាំងនោះអាចដំណើរការទៅបាន ដោយគេសង្ស័យថា អាចឃុបឃិតគ្នាជាមួយមន្ដ្រីជំនាញ និងមន្ដ្រីអនុវត្ដច្បាប់ជាច្រើនស្ថាប័នទៀត ព្រោះកន្លងមកគេឃើញបង្ក្រាបបទល្មើសនេះខ្លះៗដែរ ប៉ុន្ដែបានត្រឹមតែឱ្យធ្វើកិច្ចសន្យាកំណត់រយៈពេលបញ្ឈប់ រួចបន្ដដំណើរការសកម្មភាពដដែល ។ យោងតាមមន្ដ្រីសមត្ថកិច្ចមួយរូបដែលសុំមិនបញ្ចេញឈ្មោះឱ្យដឹងថា សកម្មភាពចិញ្ចឹមត្រីរ៉ស់ និងត្រីឆ្ដោដែលរាជរដ្ឋាភិបាលហាមឃាត់កំពុងតែកក្រើកឡើងខ្លាំងជាងពេលណាៗទាំងអស់ ជាពិសេសកន្លែងចិញ្ចឹមត្រីប្រភេទនេះចំនួន៣កន្លែង នៅតាមរណ្ដៅធំៗ ជ្រៅៗ ដែលបន្សល់ទុកពីឈ្មួញកាយដីលក់នៅតាមមាត់បឹងទន្លេសាបក្នុងភូមិសាស្ដ្រក្រុងសៀមរាប និងស្រុកពួក ។
ទីតាំងចិញ្ចឹមត្រីខុសច្បាប់ទាំងនោះមាន ១-ស្ថិតក្នុងភូមិថ្មី សង្កាត់ស្វាយដង្គំ ចុះពីផ្លូវក្រវាត់ក្រុងបន្ដិច ២-ស្ថិតនៅខាងជើងភ្នំក្រោម ជាដីរបស់មន្ដ្រីចូលនិវត្ដន៍ម្នាក់ និង៣-ស្ថិតក្នុងភូមិតាចែត ឃុំសំរោងយារ ស្រុកពួក ។ មន្ដ្រីដដែលបានបន្ថែមថា កន្លែងចិញ្ចឹមត្រីខាងលើនោះ មានទ្រង់ទ្រាយធំសម្បើមណាស់ មានស្រះធំៗ និងដាក់កូនត្រីរាប់សែនក្បាលក្នុងមួយស្រះៗ ដោយមានថៅកែជាជនជាតិយួន និងប្រើប្រាស់កម្មករជំនាញយួនរាប់សិបនាក់ ព្រមទាំងមានអំណាចសម្បើមណាស់ គ្មានអ្នកណាហ៊ានប្រថុយចេញមុខបង្ក្រាបឡើយ។
ចំណែកតាមប្រភពពីប្រជាពលរដ្ឋរស់នៅក្បែរកន្លែងចិញ្ចឹមត្រីមួយ ក្នុងចំណោម៣កន្លែងនោះប្រាប់ថា ជារៀងរាល់ថ្ងៃគេឃើញមានរថយន្ដ និងម៉ូតូច្រើនគ្រឿងដឹកកូនត្រីរាប់សិបតោនចូលទៅក្នុងបរិវេណចិញ្ចឹមត្រីនោះ ដែលនេះគឺជាមហន្ដរាយយ៉ាងធ្ងន់ធ្ងរបំផុតមួយសម្រាប់ធនធានមច្ឆជាតិរបស់យើង ។
គួរបញ្ជាក់ថា កាលពីថ្ងៃទី២៧ វិច្ឆិកា ឆ្នាំ២០១២កន្លងទៅ សមត្ថកិច្ចចម្រុះមួយក្រុមរួមមានមន្ដ្រីរដ្ឋបាលជលផល និងកម្លាំងនគរបាលការិយាល័យប្រឆាំងបទល្មើសសេដ្ឋកិច្ចខេត្ដ ដឹកនាំដោយលោក សំរិទ្ធ សុខុន ព្រះរាជអាជ្ញារងអមសាលាដំបូងខេត្ដ ធ្លាប់បានបើកប្រតិបត្ដិការបង្ក្រាបកន្លែងចិញ្ចឹមត្រីរ៉ស់ និងត្រីឆ្ដោនៅភូមិតាចែត ឃុំសំរោងយារ ស្រុកពួក ម្ដងហើយ ប៉ុន្ដែបានត្រឹមតែធ្វើកំណត់ហេតុរួមមួយ រួចប្រគល់កូនត្រីរាប់សែនក្បាលទៅឱ្យម្ចាស់ចិញ្ចឹមបន្ដវិញតែប៉ុណ្ណោះ ។
មុខរបរចិញ្ចឹមត្រីរ៉ស់ និងត្រីឆ្ដោត្រូវបានហាមឃាត់តាំងពីអំឡុងឆ្នាំ២០០៤មក ។ នេះបើផ្អែកតាមសេចក្ដីជូនដំណឹងលេខ៤០០៤ សកស.សជណ ចុះថ្ងៃទី៣ កញ្ញា ឆ្នាំ២០០៤ ស្ដីពីការបញ្ឈប់សកម្មភាពចិញ្ចឹមត្រីរ៉ស់ និងត្រីឆ្ដោរបស់ក្រសួងកសិកម្ម រុក្ខាប្រមាញ់ និងនេសាទ ។ បន្ថែមពីលើនេះ សម្ដេចតេជោ ហ៊ុន សែន ប្រមុខរាជរដ្ឋាភិបាលកម្ពុជា ក៏ធ្លាប់បានអំពាវនាវកុំឱ្យប្រជាពលរដ្ឋចិញ្ចឹមត្រីប្រភេទនេះដែរ ព្រោះវាអន្ដរាយដល់មច្ឆជាតិ ។ ជុំវិញសកម្មភាពចិញ្ចឹមត្រីល្មើសច្បាប់នេះដែរ ប្រតិភូរាជរដ្ឋាភិបាលទទួលបន្ទុកជាប្រធានរដ្ឋបាលជលផលលោក ណៅ ធួក ធ្លាប់បានបញ្ជាក់ថា តាមការសិក្សាកន្លងមក បង្ហាញថា «ត្រីរ៉ស់ និងត្រីឆ្ដោ ត្រូវការចំណីចំនួនប្រាំដង ទើបរំលែងទម្ងន់វាបានមួយដង» មានន័យថា ដើម្បីចិញ្ចឹមត្រីប្រភេទទាំងពីរនេះឱ្យបានទម្ងន់១គីឡូក្រាម គឺត្រូវឱ្យវាស៊ីកូនត្រីតូចៗគ្នាវាអស់ចំនួនដល់ទៅ៥គីឡូក្រាម ដែលមានចំនួនរាប់ម៉ឺុនក្បាល ។
ទោះជាយ៉ាងណា នៅពេញមួយថ្ងៃទី១៧ មិថុនា គេមិនអាចស្វែងជួបលោក ខេង សុខអូន នាយសង្កាត់រដ្ឋបាលជលផលចុងឃ្នៀស និងលោក ឡុង គឹមឈៀន នាយសង្កាត់រដ្ឋបាលជលផលមេជ្រៃ ដើម្បីសុំការបំភ្លឺជុំវិញទីកន្លែងចិញ្ចឹមត្រីរ៉ស់ និងត្រីឆ្ដោទាំង៣កន្លែងនេះបានទេ ។ ថ្វីបើបែបនេះក្ដី នាយខណ្ឌរដ្ឋបាលជលផលសៀមរាប លោក ព្រិន សាវិន មានប្រសាសន៍ប្រាប់តាមទូរស័ព្ទ កាលពីព្រឹកថ្ងៃទី១៧ មិថុនាថា ករណីចិញ្ចឹមត្រីខាងលើ លោកបានឱ្យធ្វើកិច្ចសន្យាបញ្ឈប់ការចិញ្ចឹមរួចរាល់ហើយ កាលពីពេលកន្លងទៅ តែបើសិនជាពួកគេនៅតែបន្ដលបលួចចិញ្ចឹមទៀត លោកនឹងមានចំណាត់ការទៅតាមច្បាប់ ៕
ចែករំលែកព័តមាននេះ