រាជធានីភ្នំពេញ ៖ គណៈកម្មាធិការជាតិរៀបចំការបោះឆ្នោត(គ.ជ.ប) បានអំពាវនាវឱ្យប្រជាពលរដ្ឋដែលបានចុះឈ្មោះបោះឆ្នោតរួចហើយទៅពិនិត្យមើលឈ្មោះ និងផ្ទៀងផ្ទាត់ទិន្នន័យរបស់ខ្លួននៅលើបញ្ជីបោះឆ្នោតដំបូង និងបញ្ជីឈ្មោះអ្នកដែលត្រូវលុបចេញពីបញ្ជីបោះឆ្នោត ដែលបិទផ្សាយនៅតាមសាលាឃុំ-សង្កាត់ ដើម្បីកែតម្រូវក្នុងករណីមានកំហុស ។ លោក…
រាជធានីភ្នំពេញ ៖ គណៈកម្មាធិការជាតិរៀបចំការបោះឆ្នោត(គ.ជ.ប) បានអំពាវនាវឱ្យប្រជាពលរដ្ឋដែលបានចុះឈ្មោះបោះឆ្នោតរួចហើយទៅពិនិត្យមើលឈ្មោះ និងផ្ទៀងផ្ទាត់ទិន្នន័យរបស់ខ្លួននៅលើបញ្ជីបោះឆ្នោតដំបូង និងបញ្ជីឈ្មោះអ្នកដែលត្រូវលុបចេញពីបញ្ជីបោះឆ្នោត ដែលបិទផ្សាយនៅតាមសាលាឃុំ-សង្កាត់ ដើម្បីកែតម្រូវក្នុងករណីមានកំហុស ។
លោក ហង្ស ពុទ្ធា សមាជិកនិងជាអ្នកនាំ ពាក្យ គ.ជ.ប ថ្លែងថា ការបិទផ្សាយបញ្ជីទាំងពីរនេះមានរយៈពេល៥ថ្ងៃ រហូតដល់ថ្ងៃទី១ ខែធ្នូឆ្នាំនេះ គឺដើម្បីបើកផ្លូវឱ្យប្រជាពលរដ្ឋមានសិទ្ធិប្តឹងតវ៉ា ឬប្តឹងជំទាស់ជាលាយលក្ខណ៍អក្សរទៅក្រុមប្រឹក្សាឃុំ សង្កាត់ ក្នុងករណីខុសឈ្មោះ ខុសទិន្នន័យផ្សេងៗ ឬការលុបឈ្មោះខុសដោយការភ័ន្តច្រឡំណាមួយ មុននឹង គ.ជ.ប ឈានទៅប្រកាសសុពលភាពបញ្ជីបោះឆ្នោតថ្មីជាផ្លូវការនៅថ្ងៃទី៣១ ខែធ្នូខាងមុខនេះ ។
លោក ហង្ស ពុទ្ធា បានថ្លែងប្រាប់អ្នកសារព័ត៌មាននៅថ្ងៃទី២៧ ខែវិច្ឆិកាថា ក្នុងករណីអ្នកប្តឹងតវ៉ាឬអ្នកប្តឹងជំទាស់មិនពេញចិត្តនឹងសេចក្តីសម្រេចរបស់ក្រុមប្រឹក្សាឃុំ-សង្កាត់ គឺអាចប្តឹងបន្តទៅ គ.ជ.ប និងក្រុមប្រឹក្សាធម្មនុញ្ញតាមច្បាប់កំណត់ ។ យោងតាមលទ្ធផលបណ្តោះអាសន្ននៃការពិនិត្យបញ្ជីឈ្មោះ និងការចុះឈ្មោះបោះឆ្នោតរបស់ គ.ជ.ប កាលពីខែតុលាកន្លងទៅនេះ បង្ហាញថា មានអ្នកចុះឈ្មោះបោះឆ្នោតថ្មីចំនួន១៩ម៉ឺននាក់ ហើយអ្នកបោះឆ្នោតដែលនឹងត្រូវលុបចេញពីបញ្ជីបោះឆ្នោតមានចំនួនជាង៥៦.០០០នាក់ និងអ្នកដែលបានកែតម្រូវឈ្មោះ និងទិន្នន័យមានជាង១.៥០០នាក់ ។
គ.ជ.ប បានលើកឡើងថា ការធ្វើបច្ចុប្បន្នភាពបញ្ជីបោះឆ្នោតឆ្នាំ២០១៨នេះ គឺសំដៅទៅលើអ្នកផ្លាស់ប្តូរលំនៅឋាន ការកែតម្រូវឈ្មោះឬទិន្នន័យអ្នកបោះឆ្នោត អ្នកទើបគ្រប់អាយុ១៨ឆ្នាំ អ្នកមិនទាន់បានចុះឈ្មោះបោះឆ្នោតពីមុនមក ការស្រង់និងលុបឈ្មោះចំពោះអ្នកទទួលមរណភាព និងអ្នកត្រូវបានដកសិទ្ធិបោះឆ្នោតបណ្តោះអាសន្ន ។
ក្រុមអង្គការសង្គមស៊ីវិល ធ្វើការងារលើការបោះឆ្នោតនៅកម្ពុជាបានលើឡើងថា ដើម្បីធានាបានពីការខុសឈ្មោះ ឬទិន្នន័យផ្សេងៗ និងការបាត់ឈ្មោះក្នុងបញ្ជី ប្រជាពលរដ្ឋគ្រប់រូបគួរទៅពិនិត្យបញ្ជីឈ្មោះដែលបិទនៅតាមសាលាឃុំ-សង្កាត់ឱ្យបានគ្រប់ៗគ្នា ។ ប្រជាពលរដ្ឋហាក់មិនសូវចាប់អារម្មណ៍ក្នុងការទៅពិនិត្យមើលឈ្មោះ និងផ្ទៀងផ្ទាត់ទិន្នន័យរបស់ខ្លួននៅលើបញ្ជីបោះឆ្នោតដំបូងនេះទេ ដោយសារមិនមែនជាឆ្នាំបោះឆ្នោត ។
តាម គ.ជ.ប បាន បញ្ជាក់ថា ក្រៅពីការបិទផ្សាយបញ្ជីបោះឆ្នោតដំបូង និងបញ្ជីឈ្មោះអ្នកដែលត្រូវលុបឈ្មោះចេញពីបញ្ជីបោះឆ្នោតនៅតាមសាលាឃុំ-សង្កាត់នីមួយៗ បញ្ជីនេះក៏មានបង្ហោះផ្សាយនៅលើគេហទំព័ររបស់គ.ជ.ប www.voterlist.org.kh ផងដែរ ដែលប្រជាពលរដ្ឋអាចស្វែងរកឈ្មោះរបស់ខ្លួនតាមរយៈទូរស័ព្ទដៃឆ្លាតវៃនៅលើកម្មវិធី App របស់គ.ជ.ប ដែលមានឈ្មោះថា Voterlist KH ។
ស្របពេលជាមួយគ្នានេះ គ.ជ.ប បានចេញសេចក្តីប្រកាសព័ត៌មានកាលពីសប្តាហ៍មុននេះថា គ.ជ.ប សូមប្រកាសដល់សាធារណជន គណបក្សនយោបាយ និងស្ថាប័នពាក់ព័ន្ធនានាថា កាលបរិច្ឆេទនៃការបោះឆ្នោតលើកទី៣ ដើម្បីជ្រើសរើសក្រុមប្រឹក្សារាជធានី ក្រុមប្រឹក្សាក្រុង ក្រុមប្រឹក្សាស្រុក ខណ្ឌ ត្រូវបានកំណត់ធ្វើឡើងនៅថ្ងៃអាទិត្យទី២៦ ខែឧសភា ឆ្នាំ២០១៩ខាងមុខ ។ អ្នកបោះឆ្នោតគឺជាក្រុមប្រឹក្សាឃុំ-សង្កាត់ក្នុងមុខតំណែង សម្រាប់ការបោះឆ្នោតអសកលជ្រើសរើសក្រុមប្រឹក្សារាជធានី ក្រុមប្រឹក្សាក្រុង ក្រុមប្រឹក្សាស្រុក ក្រុមប្រឹក្សាខណ្ឌ ៕
ចែករំលែកព័តមាននេះ