ខេត្តព្រះសីហនុ ៖ ជនបរទេស៣នាក់ត្រូវបានកម្លាំងនគរបាលការិយាល័យអន្តរាគមន៍នៃស្នងការដ្ឋាននគរបាលខេត្តព្រះសីហនុសហការជាមួយព្រះរាជអាជ្ញាអមសាលាដំបូងខេត្តព្រះសីហនុឃាត់ខ្លួនកាលពីវេលាម៉ោង៨យប់ ថ្ងៃទី១៨ មិថុនា ២០១៣ ពីបទសង្ស័យបង្ខាំងមនុស្សខុសច្បាប់ និងធ្វើទារុណកម្មលើជនរងគ្រោះបញ្ជូនទៅការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តព្រះសីហនុដើម្បីចាត់ការតាមនីតិវិធីច្បាប់ ។
ជនបរទេសទាំង៣នាក់នោះ ១-ឈ្មោះSUNDAROY VADYM ភេទប្រុស កើតឆ្នាំ១៩៨០ ជាជនជាតិអ៊ុយក្រែន ជាម្ចាស់ផ្ទះ, ២-ឈ្មោះ KULLKOV ALEXANDR ភេទប្រុស កើតឆ្នាំ១៩៨៨ ជនជាតិរុស្ស៊ី និង៣-ឈ្មោះ Anatoll Vlamirrovich Krutakov ភេទប្រុស អាយុ២៦ឆ្នាំ សញ្ជាតិអ៊ុយក្រែន ។ យោងតាមសម្តីរបស់លោកនាយប៉ុស្តិ៍នគរបាលរដ្ឋបាលសង្កាត់លេខ៣បានឱ្យដឹងថា ជនបរទេសខាងលើនេះមករស់នៅបង្កើតជាភូមិឋាន ភូមិគ្រឹះមានរយៈពេលជាច្រើនឆ្នាំមកហើយ ដោយបាននាំក្រុមគ្រួសារ ឪពុក ម្តាយចាស់ជរាមកស្នាក់នៅជាមួយ ខណៈពេលនៅប្រទេសរុស្ស៊ីចូលដល់រដូវត្រជាក់។
គួររំលឹកផងដែរថា ជនរងគ្រោះជាជនសង្ស័យឈ្មោះមុំ រិទ្ធី អាយុ២៨ឆ្នាំ មានទីលំនៅក្រុមទី២០ ភូមិ៣ សង្កាត់៣ ក្រុងព្រះសីហនុ បានចូលទៅផ្ទះរបស់ជនបរទេស លួចយកទូរស័ព្ទដៃ១គ្រឿងម៉ាកណូកៀ N77 ហើយត្រូវជនសង្ស័យទាំង៣នាក់ចាប់ឃុំខ្លួននៅក្នុងផ្ទះ និងធ្វើទារុណកម្មដោយយកកន្ត្រៃកាត់ដែកកាត់មេដៃស្តាំ និងយកកាវវិទ្យាសាស្ត្រចាក់លើបាតដៃឱ្យកកឈឺផ្សារ និងយកច្រវ៉ាក់ទាក់.កដូចសត្វឆ្កែ យកបំពង់ទីបជ័រចងបិទមាត់មិនឱ្យនិយាយរួច ចងដៃស្លាបសេកទៅក្រោយ និងចងជើងឃុំខ្លួនជនរងគ្រោះតាំងពីព្រឹកថ្ងៃទី១៧ មិថុនា ២០១៣ រហូតដល់យប់ថ្ងៃទី១៨ មិថុនា ២០១៣ ទើបជនរងគ្រោះរើបម្រះរួច ក៏ស្រែកឆោឡោឱ្យអ្នកជិតខាងជួយទើបមានការភ្ញាក់ផ្អើលដល់ប្រជាពលរដ្ឋរស់នៅក្បែរនោះរាយការណ៍ទៅសមត្ថកិច្ចតែម្តង។
ចែករំលែកព័តមាននេះ