ខេត្តព្រះវិហារ ៖ កាលពីចុងសប្តាហ៍កន្លងទៅនេះ មន្ទីរកសិកម្មខេត្តបាននាំយកស្រូវពូជចំនួន២.៦០០គីឡូក្រាមទៅចែកជូនប្រជាកសិករនៅគ្រប់ឃុំក្នុងស្រុកជាំក្សាន្តសម្រាប់ជាទុនក្នុងការបង្កបង្កើនផលនារដូវវស្សា ។ ពិធីនេះធ្វើឡើងក្រោមអធិបតីភាពលោក ស៊ុយ សេរិទ្ធិ អភិបាលរងខេត្ត ដោយមានការអញ្ជើញចូលរួមពីមន្ត្រីរាជការក្នុងស្រុក និងប្រជាកសិករជាំក្សាន្ត ចំនួន២៦០គ្រួសារ។
ខេត្តព្រះវិហារ ៖ កាលពីចុងសប្តាហ៍កន្លងទៅនេះ មន្ទីរកសិកម្មខេត្តបាននាំយកស្រូវពូជចំនួន២.៦០០គីឡូក្រាមទៅចែកជូនប្រជាកសិករនៅគ្រប់ឃុំក្នុងស្រុកជាំក្សាន្តសម្រាប់ជាទុនក្នុងការបង្កបង្កើនផលនារដូវវស្សា ។ ពិធីនេះធ្វើឡើងក្រោមអធិបតីភាពលោក ស៊ុយ សេរិទ្ធិ អភិបាលរងខេត្ត ដោយមានការអញ្ជើញចូលរួមពីមន្ត្រីរាជការក្នុងស្រុក និងប្រជាកសិករជាំក្សាន្ត ចំនួន២៦០គ្រួសារ។
លោក ពឹង ទ្រីដា ប្រធានមន្ទីរកសិកម្មខេត្តថ្លែងថា ស្រូវពូជទាំងនេះមានពូជផ្ការំដួល និងជលសា គឺជាពូជសុទ្ធល្អ ចែកជូនក្រុមកសិករសម្រិតសម្រាំងពូជចំនួន៦ក្រុម ស្មើនឹង១៥០គ្រួសារ កសិករក្រុមបង្ហាញភូមិគំរូចំនួន៦១គ្រួសារ និងកសិករធ្វើស្រែបង្ហាញមួយចំនួនផងដែរ ដោយក្នុងមួយគ្រួសារៗទទួលបានស្រូវពូជ១០គីឡូក្រាម ។ ស្រូវពូជដែលផ្តល់ជូនកសិករនាពេលនេះមិនច្រើនទេ ប៉ុន្តែជាផ្នែកមួយនៃសកម្មភាពគម្រោងបម្រែបម្រួលអាកាសធាតុ (NAPA Follow-up) ដែលគាំទ្រថវិកាដោយមូលនិធិបរិស្ថានសកលតាមរយៈកម្មវិធីអភិវឌ្ឍន៍របស់អង្គការសហប្រជាជាតិ (GEF/UNDP) ។
លោកប្រធានមន្ទីរកសិកម្មខេត្តបានផ្តាំផ្ញើដល់កសិករឱ្យចេះជ្រើសរើសពូជ និងសម្រាំងស្រូវពូជដែលល្អសម្រាប់ធ្វើការដាំដុះ ព្រោះគ្រាប់ពូជល្អអាចដុះលូតលាស់បានឆាប់រហ័ស និងផ្តល់ទិន្នផលខ្ពស់ ។ ជាមួយនេះក៏បានដាស់តឿនដល់ប្រជាកសិករ មុននឹងដាំដុះត្រូវរៀបចំដីឱ្យបានល្អ ព្រោះបើរៀបចំដីបានល្អនោះដំណាំស្រូវនឹងលូតលាស់បានល្អជាក់ជាមិនខាន។ លោកប្រធានមន្ទីរបានបញ្ជាក់ទៀតថា ការផលិតស្រូវនាសម័យនេះជាការផលិតតាមបែបបច្ចេកទេសកសិកម្មថ្មី គឺមិនផលិតផ្សងព្រេងដូចសម័យបុរាណឡើយ ត្រូវលើកភ្លឺស្រែឱ្យបានមាំល្អដើម្បីថែរក្សាទឹក និងជីជាតិក្នុងស្រែមិនឱ្យហូរចេញបាន ។
ប្រជាកសិករគប្បីយកចិត្តទុកដាក់លើការប្រើប្រាស់ជីធម្មជាតិឱ្យបានខ្លាំងក្លាបំផុត ព្រោះជីធម្មជាតិមានគុណសម្បត្តិច្រើនដូចជា ធ្វើឱ្យដីផុសល្អ អាចរក្សាសំណើមក្នុងដីបានយូរ ជួយបង្កើនជីជាតិដី បន្ថយការចំណាយក្នុងការទិញជីគីមី និងជួយរក្សាបរិស្ថានបានល្អទៀតផង ។លោក ស៊ុយ សេរិទ្ធិ អភិបាលរងខេត្តថ្លែងថា ក្រោយពីទទួលបានស្រូវពូជ និងការពន្យល់អំពីបច្ចេកទេសក្នុងការដាំដុះពីសំណាក់មន្ត្រីជំនាញកសិកម្ម ហើយសូមបងប្អូនយកទៅអនុវត្តឱ្យបានខ្ជាប់ខ្ជួនដើម្បីទទួលបានផលល្អសម្រាប់គ្រួសារនីមួយៗ ៕
ចែករំលែកព័តមាននេះ