រាជធានីភ្នំពេញ ៖ មន្ត្រីជាន់ខ្ពស់ក្រសួងការងារ និងបណ្តុះបណ្តាលវិជ្ជាជីវៈ បានឱ្យដឹងថា ច្បាប់ស្តីពីប្រាក់ឈ្នួលអប្បបរមា បានចូលរួមបង្កើតឱកាសការងារ និងជំរុញឱ្យមានបរិយាកាសវិនិយោគ និងធុរកិច្ចកាន់តែប្រសើរនៅកម្ពុជា ។…
រាជធានីភ្នំពេញ ៖ មន្ត្រីជាន់ខ្ពស់ក្រសួងការងារ និងបណ្តុះបណ្តាលវិជ្ជាជីវៈ បានឱ្យដឹងថា ច្បាប់ស្តីពីប្រាក់ឈ្នួលអប្បបរមា បានចូលរួមបង្កើតឱកាសការងារ និងជំរុញឱ្យមានបរិយាកាសវិនិយោគ និងធុរកិច្ចកាន់តែប្រសើរនៅកម្ពុជា ។
ក្នុងពិធីបើកសិក្ខាសាលាកម្រិតខ្ពស់ ស្តីពី « ការពិនិត្យតាមដានប្រាក់ឈ្នួលអប្បបរមា» កាលពីថ្ងៃទី២៦ វិច្ឆិកា នៅសណ្ឋាគារឡឺរ៉ូយ៉ាល់ លោក ហេង សួរ រដ្ឋលេខាធិការក្រសួងការងារនិងបណ្តុះបណ្តាលវិជ្ជាជីវៈ មានប្រសាសន៍ថា ដើម្បីធានាបាននូវយន្តការកំណត់ប្រាក់ឈ្នួលអប្បបរមា ក្នុងការធានាបាននូវសុខដុមរមនានៃទំនាក់ទំនងវិជ្ជាជីវៈ ក៏ដូចជាការលើកកម្ពស់កម្រិតជីវភាពរបស់កម្មករនិយោជិត ព្រមទាំងធានាបាននូវស្ថិរភាព និរន្តរភាពនៃវិស័យពាណិជ្ជកម្ម និងការទាក់ទាញការវិនិយោគនៅប្រទេសកម្ពុជា ក្រសួងបានរៀបចំច្បាប់ស្ដីពីប្រាក់ឈ្នួលអប្បបរមា ដោយអនុលោមតាមរដ្ឋធម្មនុញ្ញនៃព្រះរាជាណាចក្រកម្ពុជា និងស្របតាមច្បាប់ស្ដីពីការងារ ដើម្បីកំណត់អំពីប្រាក់ឈ្នួលអប្បបរមាដែលចាំបាច់ក្នុងការធានានូវជីវភាពរស់នៅសមរម្យរបស់កម្មករនិយោជិតគ្រប់រូប និងអនុសញ្ញាអន្តរជាតិខាងការងារលេខ១៣១ និងអនុសាសន៍លេខ១៣៥ ស្ដីពីការកំណត់ប្រាក់ឈ្នួលអប្បបរមា ដែលតម្រូវឱ្យមានប្រព័ន្ធកំណត់ប្រាក់ឈ្នួលអប្បបរមាមួយតាមបែបវិទ្យាសាស្ត្រ ។
លោកបញ្ជាក់ថា ៖« ច្បាប់នេះមាន៦ជំពូក និង៣០មាត្រា ដែលនឹងមានវិសាលភាពគ្របដណ្តប់លើសហគ្រាស ឬគ្រឹះស្ថាន និងជនទាំងទ្បាយដែលស្ថិតនៅក្រោមបទប្បញ្ញត្តិនៃច្បាប់ស្តីពីការងារ និងមានគោលបំណង ដើម្បីលើកកម្ពស់ជីវភាពរស់នៅសមរម្យ សេចក្ដីថ្លៃថ្នូរ បង្កើតឱកាសការងារ បង្កើនផលិតភាពរបស់កម្មករនិយោជិត និងជំរុញឱ្យមានបរិយាកាសវិនិយោគ និងធុរកិច្ចកាន់តែប្រសើរ ប្រកបដោយភាពទាក់ទាញ »។
លោកបានបន្ថែមថា ច្បាប់នេះមានគោលដៅធានាការកំណត់ប្រាក់ឈ្នួលអប្បបរមាសម្រាប់ជនទាំងទ្បាយដែលស្ថិតនៅក្រោមបទប្បញ្ញត្តិនៃច្បាប់ស្តីពីការងារ, បង្កើតនីតិវិធីកំណត់ប្រាក់ឈ្នួលអប្បបរមាតាមបែបវិទ្យាសាស្ត្រ ដោយផ្អែកលើលក្ខណៈវិនិច្ឆ័យបែបសង្គម និងសេដ្ឋកិច្ច, បង្កើតក្រុមប្រឹក្សាជាតិប្រាក់ឈ្នួលអប្បបរមា ដើម្បីជាយន្តការត្រីភាគីសម្រាប់សិក្សាស្រាវជ្រាវ និងផ្តល់អនុសាសន៍អំពីប្រាក់ឈ្នួលអប្បបរមា និងអត្ថប្រយោជន៍ផ្សេងៗរបស់ជនទាំងទ្បាយ ដែលស្ថិតនៅក្រោមបទប្បញ្ញត្តិនៃច្បាប់ស្តីពីការងារ ។ លោកថា ៖« ច្បាប់នេះគឺជាសមិទ្ធផលមួយយ៉ាងសំខាន់ក្នុងការអភិវឌ្ឍក្របខ័ណ្ឌគតិយុត្ត ដើម្បីគាំទ្រការអនុវត្តយុទ្ធសាស្ត្រចតុកោណដំណាក់កាលទី៤របស់រាជរដ្ឋាភិបាលនីតិកាលទី៦ នៃរដ្ឋសភា »។
ប្រាក់ឈ្នួលអប្បបរមាសម្រាប់វិស័យវាយនភណ្ឌកាត់ដេរសម្លៀកបំពាក់ និងផលិតស្បែកជើង បានបន្តកើនឡើងពីចំនួន៤០ដុល្លារក្នុង១ខែនៅក្នុងឆ្នាំ១៩៩៧ ដល់១៨២ដុល្លារ ក្នុង១ខែនៅឆ្នាំ២០១៩ខាងមុខនេះ ហើយបើបូកនឹងប្រាក់អត្ថប្រយោជន៍បន្ថែមផ្សេងៗទៀត កម្មករនិយោជិតម្នាក់អាចទទួលបានប្រាក់ឈ្នួលជាមធ្យមពី១៩៩ដល់២១០ដុល្លាអាមេរិកក្នុង១ខែ ដែលកម្រិតប្រាក់ឈ្នួលនេះ បានជួយធ្វើឱ្យជីវភាពរស់នៅរបស់កម្មករនិយោជិតកាន់តែប្រសើរឡើងជាបន្ដបន្ទាប់ ។ នេះបើតាមលោកហេង សួរ ។
លោកបណ្ឌិត គី សេរីវឌ្ឍន៍ អ្នកស្រាវជ្រាវសេដ្ឋកិច្ចនៃរាជបណ្ឌិត្យសភាកម្ពុជា យល់ឃើញថា ច្បាប់ស្ដីពីប្រាក់ឈ្នួលនេះ នឹងលើកទឹកចិត្តដល់កម្មករក្នុងការបំពេញការងារ តែក៏ជាកត្តារារាំងមួយសម្រាប់វិស័យកាត់ដេរឬវិស័យផលិតកម្ម ដែលធ្វើឱ្យវិនិយោគក្រៅប្រទេស អាចនឹងរារែកក្នុងការចូលមកវិនិយោគ ឬដកចេញពីប្រទេសកម្ពុជាផងដែរ ពីព្រោះច្បាប់ប្រាក់ឈ្នួលពលកម្មឡើងខ្ពស់ពេក ។ លោកបណ្ឌិតបន្ដថា ៖« វិស័យកាត់ដេររបស់យើង ផលិតភាពរបស់កម្មករខ្ពស់ដល់កម្រិតកំពូលទៅហើយ មិនអាចខ្ពស់ជាងនេះបានទៀតទេ ដូចនេះដើម្បីឆ្លើយតបទៅនឹងបញ្ហានេះ កម្ពុជាត្រូវតែផ្លាស់ប្តូរវិស័យ ពីវិស័យឧស្សហកម្មប្រើកម្លាំងច្រើន មកប្រើវិស័យប្រើជំនាញដូចជាវិស័យអេឡិចត្រូនិកជាដើម »។
លោកបណ្ឌិតលើកឡើងថា ការឡើងប្រាក់ឈ្នួលដល់១៨២ដុល្លារក្នុង១ខែនេះនៅឆ្នាំក្រោយ វាឆ្លើយតបទៅនឹងការកើនឡើងនៃសេដ្ឋកិច្ចកម្ពុជាដែលមានអត្រាប្រមាណ៧%ក្នុងមួយឆ្នាំនេះ ក៏ប៉ុន្តែបើមើលទៅលើការចំណាយរបស់កម្មករវាជួបបញ្ហាប្រឈមខ្លះដែរ ថ្លៃឈ្នួលផ្ទះនិងម្ហូបអាហារឡើងថ្លៃតាមប្រាក់ខែកម្មករដែរ ។ ជាសំណូមពរ « ខ្ញុំស្នើដល់រាជរដ្ឋាភិបាលយកចិត្តទុកដាក់ធ្វើយ៉ាងណាឱ្យថ្លៃស្នាក់នៅឬការហូបចុករបស់កម្មករកុំឱ្យឡើងខ្ពស់ពេក ថ្វីដ្បិតរាជរដ្ឋាភិបាលមិនយកថ្លៃអគ្គិសនី ឬទឹកស្អាតដែលកម្មករប្រើ ប៉ុន្តែគួរមានវិធានការដើម្បីធ្វើឱ្យការចំណាយសម្រាប់ការរស់នៅទាប »។
គួរបញ្ជាក់ថា កម្ពុជាក៏បាននិងកំពុងពិភាក្សាអំពីគំនិតផ្ដួចផ្ដើមនៃគម្រោងសកម្មភាពដើម្បីការប្រែប្រួលផ្នែកលក្ខខណ្ឌការងារក្នុងវិស័យឧស្សាហកម្មកាត់ដេរសម្លៀកបំពាក់ ហៅកាត់ថា(ACT) ផងដែរ ដើម្បីធានាឱ្យកាន់តែប្រសើរឡើងសម្រាប់កម្មករនិយោជិតនៅកម្ពុជា ដូចជា ការធានាឱ្យនិយោជក និងអ្នកបញ្ជាទិញទាំងឡាយគាំទ្រដល់កម្មវិធីរបបសន្តិសុខសង្គម(បសស) ដែលទាក់ទងនឹងការធានារ៉ាប់រងហានិភ័យការងារ ការថែទាំងសុខភាព ហើយនៅឆ្នាំ២០១៩ រាជរដ្ឋាភិបាលនឹងដាក់ឱ្យអនុវត្តនូវរបបសោធននិវត្តន៍ ។
គោលបំណងរបស់ACT គឺការប្តេជ្ញាចិត្តកម្រិតអន្តរជាតិ ក្នុងការសម្រេចឱ្យបានប្រាក់ឈ្នួលសមរម្យនៅក្នុងវិស័យមួយ ដោយបានបង្កើតឱ្យមានជាក្របខ័ណ្ឌមួយ ដែលគ្រប់ភាគីពាក់ព័ន្ធ រួមមាន ម្ចាស់ម៉ាក និងអាជីវករលក់រាយ សហជីព រោងចក្រ សហគ្រាស និងរាជរដ្ឋាភិបាល អាចអនុវត្តទំនួលខុសត្រូវ និងតួនាទីរបស់ខ្លួន ក្នុងការសម្រេចឱ្យបានប្រាក់ឈ្នួលសមរម្យ ។
យោងតាមសមាគមកាត់ដេរសម្លៀកបំពាក់ និងស្បែកជើងកម្ពុជា បច្ចុប្បន្ននេះសមាគមមានរោងចក្រជាសមាជិកប្រមាណ៦០០រោងចក្រដែលបានផ្ដល់ការងារដល់កម្មករនិយោជិតទាំងពេញម៉ោង និងក្រៅម៉ោងប្រមាណ៩០ម៉ឺននាក់ ដោយក្នុង១ខែ ត្រូវចំណាយប្រមាណ២០០លានដុល្លារអាមេរិកសម្រាប់បើកប្រាក់ខែ ។ គិតត្រឹមរយៈពេល៧ខែដើមឆ្នាំនេះ វិស័យនេះបាននាំចេញមានទំហំទឹកប្រាក់ប្រមាណជាង៤ពាន់លានដុល្លារ ក្នុងនោះសហភាពអឺរ៉ុប និងសហរដ្ឋអាមេរិកគឺជាទីផ្សារធំជាងគេ ៕
ចែករំលែកព័តមាននេះ