ខេត្តតាកែវ ៖ មជ្ឈមណ្ឌលនិងសាលាកីឡាបាល់ទាត់ជាតិ ស្ថិតនៅក្នុងភូមិថ្នល់ទក្សិណ ឃុំក្រាំងធ្នង់ ស្រុកបាទី ត្រូវបានប្រារព្ធពិធីសម្ពោធដាក់ឱ្យប្រើប្រាស់ជាផ្លូវការក្រោមអធិបតីភាពដ៏ខ្ពង់ខ្ពស់សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នាព្រឹកថ្ងៃទី១៨ មិថុនា ។ អញ្ជើញចូលរួមកុ្នុងឱកាសនោះមានមន្ត្រីថ្នាក់ដឹកនាំស្ថាប័ននានាថ្នាក់ជាតិ និងភ្ញៀវអន្តរជាតិ ដែលរួមមានប្រធានសហព័ន្ធបាល់ទាត់ទ្វីបអាស៊ី និងជាតំណាង FIFA ប្រធានសហព័ន្ធបាល់ទាត់អាសា៊ន និងគ្រូកីឡាបាល់ទាត់នៃបណ្តាប្រទេសជាមិត្ត ព្រមទាំងលោកគ្រូ អ្នកគ្រូ និងសិស្សានុសិស្សយ៉ាងច្រើនកុះករ ។
សម្តេចអគ្គមហាសេនាបតីតេជោ ហ៊ុន សែន មានប្រសាសន៍ថា ច្រើនឆ្នាំកន្លងទៅដែលកម្ពុជាបានឆ្លងកាត់សង្គ្រាមធ្វើឱ្យវិស័យកីឡាកម្ពុជាធ្លាក់ចុះយ៉ាងខ្លាំង ។ បន្ទាប់ពីថ្ងៃរំដោះ៧មករា ១៩៧៩មក យើងបានក្រោកឈរឡើងរហូតមកដល់ពេលនេះ កម្ពុជាបានបញ្ជូនកីឡាករទៅចូលរួមជាច្រើនក្នុងឆាកអន្តរជាតិ ។ ថ្វីដ្បិតតែកម្ពុជាមិនទទួលបានជោគជ័យត្រចះត្រចង់យ៉ាងណាក្តី ក៏ប៉ុន្តែនៅក្នុងប្រទេសយើងបច្ចុប្បន្នមានក្លិបកីឡាបាល់ទាត់ជាច្រើន ។ សម្តេចតេជោមានប្រសាសន៍បន្តថា សំណង់ទាំងឡាយនៅទីនេះបានកកើតឡើងតាមរយៈការរួមបញ្ចូលគ្នា រវាងការខិតខំរបស់សហព័ន្ធកីឡាបាល់ទាត់កម្ពុជាផ្ទាល់ក៏ដូចជាសប្បុរសជននានា បានចូលរួមប្រឹងប្រែងនៅទីនេះ និងមានការចូលរួមពីសហព័ន្ធកីឡាបាល់ទាត់ពិភពលោក សហព័ន្ធកីឡាបាល់ទាត់ទ្វីបអាស៊ី ក៏ដូចជាក្រុមវិនិយោគរបស់វៀតណាម Hoang Anh Gia Lai ផងដែរ ។
ការសាងសង់សាលាកីឡាបាល់ទាត់ជាតិនេះ នឹងអាចផ្តល់លទ្ធភាពបន្ថែមទៀតក្នុងការសម្រាំងជ្រើសរើសយុវជនដែលមាននិស្ស័យក្នុងវិស័យកីឡាបាល់ទាត់មកធ្វើការហ្វឹកហាត់ ដើម្បីបង្កើនសមត្ថភាពឱ្យបានខ្លាំងក្លា ឈានទៅក្លាយជាកីឡាករបាល់ទាត់ជម្រើសជាតិ ។ សម្តេចមានជំនឿថា សាលានេះនឹងក្លាយជាថ្នាលកីឡាបាល់ទាត់ប្រកបដោយឯកទេសកម្មមួយរបស់កម្ពុជា ដែលមានលក្ខណៈមិនចាប់ឆាយដូចពេលមុននោះទេ ។ ការសាងសង់សាលានេះវាមានការលំបាក ម្យ៉ាងហើយ ប៉ុន្តែអ្វីដែលជាការលំបាកថែមទៀតនោះ គឺការថែរក្សានូវនិរន្តរភាពនៃដំណើរការសាលានេះឱ្យស្ថិតស្ថេរគង់វង្សបន្តទៀត។
ក្នុងន័យនេះ សម្តេចតេជោបានស្នើឱ្យសហព័ន្ធកីឡាបាល់ទាត់កម្ពុជា ធ្វើការពិភាក្សាជាមួយក្រសួងអប់រំយុវជននិងកីឡា ក្នុងការដាក់បញ្ចូលជាផ្នែកមួយនៃឧបសម្ព័ន្ធនៃថវិកាជាតិរបស់ក្រសួងអប់រំយុវជននិងកីឡា ដើម្បីទ្រទ្រង់សាលាក្នុងការធ្វើឱ្យដំណើរការសាលាប្រព្រឹត្តទៅប្រកបដោយនិរន្តរភាព ។ សម្តេចតេជោបានផ្តល់អនុសាសន៍ថា បើចង់ឱ្យកីឡាករខ្លាំងគឺត្រូវបណ្តុះបណ្តាលចាប់ផ្តើមហ្វឹកហាត់ពីយុវជនក្មេងៗឡើងទៅនិងធ្វើការជ្រើសរើសយកយុវជនក្មេងៗពីបណ្តារាជធានី-ខេត្ត ដើម្បីសម្រាំងយកមកធ្វើការហ្វឹកហាត់បំពាក់បំប៉នបន្ថែមឱ្យបានខ្លាំងទើបកីឡាបាល់ទាត់កម្ពុជា អាចមានកីឡាករជម្រើសជាតិល្អៗសម្រាប់យកទៅធ្វើការប្រកួតជាលក្ខណៈអន្តរជាតិជាមួយប្រទេសនានាបាន ។
សម្តេចបានអំពាវនាវឱ្យមានការបង្កើតតារាងបាល់ទាត់ឱ្យបានច្រើន និងឱ្យមានបង្កើតក្រុមកីឡាបាល់ទាត់ឱ្យបានច្រើន ព្រមទាំងបង្កលក្ខណៈឱ្យសិស្សានុសិស្សនៅតាមសាលាបឋមសិក្សា មធ្យមសិក្សា និងនៅតាមភូមិ-ឃុំ ដើម្បីធ្វើការជ្រើសរើសអ្នកមានទេពកោសល្យក្នុងវិស័យកីឡា ។ សម្តេចតេជោ បានធ្វើការបញ្ជាក់អំពីយុទ្ធសាស្ត្ររបស់គណបក្សប្រជាជន ដោយធ្វើការប្រដូចទៅនឹងការរៀបចំក្រុមប្រកួតកីឡាបាល់ទាត់ ។ សម្តេចមានប្រសាសន៍ថា បើខ្ញុំចូលទាត់ជាអ្នកនយោបាយខ្ញុំមិនទាត់នៅខ្សែប្រយុទ្ធទេ ហើយក៏មិននៅខ្សែការពារដែរ ខ្ញុំទាត់នៅខ្សែបម្រើ ។
សព្វថ្ងៃនេះគណបក្សប្រជាជនដែលកំពុងរៀបចំប្រកួតទាំងពេលមុននិងពេលនេះ សម្តេចអគ្គមហាធម្មពោធិសាលជា ស៊ីុម ជាគ្រូបង្វឹក សម្តេចអគ្គមហាពញាចក្រី ហេង សំរិន ជាអ្នកចាំទី ឯសម្តេចអគ្គមហាសេនាបតីតេជោ ហ៊ុន សែន ជាមេក្រុមនៅខ្សែបម្រើ ។ បោះឱ្យគេដឹងឱ្យហើយទៅ ជាមេក្រុមឡើងទៅវាយក៏បានថយមកការពារក៏បាន ។ ពិតហើយ ការបោះឆ្នោតពិតជាឈ្នះហើយ មិនចាំបាច់មានការសង្ស័យទេ ការបោះឆ្នោតវាឈ្នះហើយ ២០១៣ -២០១៨ ច្បាស់ជា ហ៊ុន សែន ធ្វើនាយករដ្ឋមន្ត្រី មិនចាំបាច់គិតទេ ។ មិនទាន់ចាស់ឯណា ខ្លះគេអាយុ៧៥ឆ្នាំហើយ គេមានប្រពន្ធក្មេង ម៉េចក៏គេមិនចាស់…។
លោក Sheikh Salman Bin Ebrahim Al Khalifa ប្រធានសហព័ន្ធបាល់ទាត់ទ្វីបអាស៊ី និងជាតំណាងសហព័ន្ធបាល់ទាត់ពិភពលោក FIFA បានថ្លែងថា ចាប់ពីឆ្នាំ២០០៨ មក កម្ពុជាស្ថិតក្នុងចំណោមប្រទេសនៅក្នុងអាស៊ីដែលទទួលបានគម្រោងកម្មវិធីពង្រឹងការគ្រប់គ្រង និងការអនុវត្ត ។ ក្នុងរយៈពេល៥ឆ្នាំចុងក្រោយនេះ សហព័ន្ធកីឡាបាល់ទាត់កម្ពុជាកាន់តែមានកម្រិតវិជ្ជាជីវៈខ្ពស់ខាងផ្នែករចនាសម្ព័ន្ធគ្រប់គ្រង ដោយការពង្រឹងផ្នែកតួនាទី និងការទទួលខុសត្រូវរបស់សមាជិកគណៈកម្មាធិការប្រតិបត្តិ និងអគ្គលេខាធិការ ។
លោកប្រធានសហព័ន្ធបាល់ទាត់ទ្វីបអាស៊ីបញ្ជាក់ថា ខ្ញុំសូមធ្វើការធានាថា សហព័ន្ធកីឡាបាល់ទាត់អន្តរជាតិ ព្រមទាំងសហព័ន្ធបាល់ទាត់ទ្វីបអាស៊ី ប្តេជ្ញាបន្តការគាំទ្រសហព័ន្ធបាល់ទាត់កម្ពុជានៅក្នុងការខិតខំប្រឹងប្រែងរបស់ខ្លួន ដើម្បីអភិវឌ្ឍបាល់ទាត់កម្ពុជាឱ្យកាន់តែមានកម្រិតខ្ពស់ឡើង ។ លោក ទ្រឹង បាក់ហា ប្រធានសមាគមវិនិយោគវៀតណាមនៅកម្ពុជា (AVIC) ថ្លែងថា វត្តមានរបស់សមាគមបានរួមចំណែកជំរុញ និងបង្កើតឱ្យមានទំនាក់ទំនងយ៉ាងខ្លាំងក្លា នៃសកម្មភាពវិនិយោគរបស់វៀតណាមនៅកម្ពុជា ។ លោកបន្តថា ការសាងសង់មជ្ឈមណ្ឌល និងសាលាកីឡាបាល់ទាត់ជាតិនេះ តាមប្រសាសន៍របស់លោកប្រធានសហព័ន្ធកីឡាបាល់ទាត់កម្ពុជានៅជំពាក់ថ្លៃសាងសង់ចំនួន១០២.០៨២ដុល្លារអាមេរិក ។
ក្នុងនាមជាប្រធានសមាគមវិនិយោគរៀតណាមនៅប្រទេសកម្ពុជា (AVIC) និងជាប្រធានក្រុមប្រឹក្សាភិបាលធនាគារវិនិយោគ និងអភិវឌ្ឍន៍វៀតណាម បានសម្រេចឯកភាពឧបត្ថម្ភទឹកប្រាក់ដែលជំពាក់នោះទូទាត់សងឱ្យស្រេចរួចការជំពាក់ ។ លោក សៅ សុខា ប្រធានសហព័ន្ធកីឡាបាល់ទាត់កម្ពុជា មានប្រសាសន៍ថា មជ្ឈមណ្ឌល និងសាលាបាល់ទាត់ជាតិ ត្រូវបានសាងសង់ឡើងលើផ្ទៃដីទំហំ១៥ហិកតា ស្ថិតនៅក្នុងភូមិថ្នល់ទក្សិណ ឃុំក្រាំងធ្នង់ ស្រុកបាទី ខេត្តតាកែវ ដោយចំណាយថវិកាអស់២.២៣៤.៩០០ដុល្លារអាមេរិក ក្រោមជំនួយរបស់សហព័ន្ធបាល់ទាត់អន្តរជាតិ ។
ជាចក្ខុវិស័យ និងផែនការយុទ្ធសាស្រ្ដរយៈពេលវែងរបស់សហព័ន្ធកីឡាបាល់ទាត់កម្ពុជា ដែលជាអាទិភាពរួមមាន ការអភិវឌ្ឍថ្នាល និងយុវជន ការអភិវឌ្ឍក្លិប និងសមាគមជាសមាជិក ការអភិវឌ្ឍការប្រកួត ការអភិវឌ្ឍការគ្រប់គ្រង និងច្បាប់ ការអភិវឌ្ឍក្រុមជម្រើសជាតិ ការអភិវឌ្ឍហេដ្ឋារចនាសម្ព័ន្ធ ការអភិវឌ្ឍគ្រូបង្ហាត់ អាជ្ញាកណ្ដាលបាល់ទាត់ស្រ្ដី បាល់ទាត់ក្នុងសាល លើឆ្នេរខ្សាច់ ការអភិវឌ្ឍប្រកួតជាលក្ខណៈអន្ដរជាតិ និងការអភិវឌ្ឍវិទ្យាសាស្រ្ដ និងវេជ្ជសាស្រ្ដ។ លោកប្រធានសហព័ន្ធកីឡាបាល់ទាត់កម្ពុជា បញ្ជាក់ថា ទីលានបាល់ទាត់នេះនឹងជំរុញឱ្យចក្ខុវិស័យដែលរៀបរាប់ខាងលើសម្រេចបាននាពេលខាងមុខ ។
មជ្ឈមណ្ឌល និងសាលាបាល់ទាត់ជាតិនេះមានគ្រប់ហេដ្ឋារចនាសម្ព័ន្ធ និងតាមលក្ខណៈវិទ្យាសាស្រ្ដជឿនលឿន ព្រមទាំងរៀនសូត្រចំណេះទូទៅនិងអាចប្រែក្លាយកីឡាករជាកីឡាករជម្រើសជាតិដ៏ខ្លាំងក្លានាពេលអនាគតក្នុងការត្រៀមប្រកួតលើឆាកអន្ដរជាតិ ពិសេសត្រៀមខ្លួនសម្រាប់ការប្រកួតកីឡាស៊ីហ្គេមក្នុងឆ្នាំ២០២៣ ដែលកម្ពុជាធ្វើម្ចាស់ផ្ទះ ៕
ចែករំលែកព័តមាននេះ