ខេត្តសៀមរាប ៖ លោក វណ្ណ ផាណ្ណា អ្នកមើលការខុសត្រូវ និងជាអ្នកស្ថាបនា និងអភិវឌ្ឍន៍វត្ដរាជបូព៌ លោកមានប្រសាសន៍ថា វិចិត្រករនៅខេត្តសៀមរាប នៃអង្គការសិល្បៈខ្មែរអមតៈ បានច្នៃប្រឌិត ដោយយកដបទឹកសុទ្ធចំនួន៦០០០ដប និងទុយោចំនួន១៦០០០ដើម មកច្នៃចេញជាចាប៉ីដងវែង មានប្រវែង៦ម៉ែត្រ ដើម្បីយកទៅដាក់តាំងនៅមហោស្រពចាប៉ីដងវែងនៅក្នុងបរិវេណវត្តរាជបូព៌ ក្នុងសៀមរាប ពីថ្ងៃទី៣០ ខែវិច្ឆិកា ដល់ថ្ងៃទី២ ខែធ្នូ ឆ្នាំ២០១៨ ខាងមខនេះ ។
ការច្នៃប្រឌិតចាប៉ីដងវែងពីដបទឹកសុទ្ធ និងទុយោនេះឡើងគឺដើម្បីលើកស្ទួយដល់សិល្បៈចាប៉ី ដែលប្រឈមនឹងបាត់បង់ ខណៈកាលពីថ្ងៃទី២២ ខែវិច្ឆិកា ឆ្នាំ២០១៨ កន្លងមកនេះបានដឹកតាមរយៈរទេះគោដោយមានកង់ធាក់ បង្ហាញជាសាធារណៈ ក្នុងឱកាសនៃព្រះរាជពិធីបុណ្យអុំទូក នៅខេត្តសៀមរាបផងដែរ ។
លោក វណ្ណ ផាណ្ណា បានបញ្ជាក់ទៀតថា ការច្នៃជាចាប៉ីដងវែងពីដបទឹកសុទ្ធនេះគឺក្នុងគោលបំណងបង្ហាញដល់ពលរដ្ឋខ្មែរឲ្យចេះរក្សាទុកសំរាម និងបោះចោលសំរាមឲ្យមានរបៀប និងត្រឹមត្រូវ ដើម្បីកុំឲ្យមានកាកសំណល់ប៉ះពាល់ដល់សុខភាពមនុស្ស និងបង្ហាញពីសំរាមក៏មានអត្ថប្រយោជន៍ផងដែរ ។
ជាពិសេសចង់ឲ្យកូនខ្មែរ កាត់បន្ថយការប្រើប្រាស់ថង់ប្លាស្ទីកផងដែរ ព្រោះវាបានជះឥទ្ធពលពីបរិស្ថានមិនល្អផងដែរ ដែលធ្វើប៉ះពាល់ទីក្រុងទេសចរណ៍អង្គរ ខណៈខេត្ដនេះមានភ្ញៀវទេសចរណ៍រាប់លាននាក់មកទស្សនាក្នុងមួយឆ្នាំៗ ៕
ចែករំលែកព័តមាននេះ