ខេត្តកណ្តាល ៖ ផ្លូវជាតិលេខ21B ប្របតាមមាត់ទន្លេបាសាក់ ចំណុចខាងជើងផ្សារស្រុកស្អាង ស្ថិតក្នុងភូមិព្រែករុន ឃុំព្រែកគយ ស្រុកស្អាង កំពុងប្រឈមនឹងការបាក់ច្រាំងទាំងផ្ទាំងៗធ្លាក់ចូលក្នុងទន្លេបាសាក់ ដោយសារតែច្រាំងទន្លេចំណុចនេះនៅជាប់នឹងផ្លូវជាតិ កាលពីថ្ងៃទី១៧ មិថុនា ។ ច្រាំងបានបាក់ធ្លាក់ចូលក្នុងទន្លេ មានបណ្តោយប្រមាណ៥០ម៉ែត្រ ដល់ផ្លូវជាតិតែម្តង ធ្វើឱ្យអ្នកបើកបរដល់ចំណុចនេះស្ងើបញញើតគ្រប់ៗគ្នា ស្ទើរតែមិនហ៊ានបើកឆ្លងកាត់ ពិសេសរថយន្តដឹកជញ្ជូននានា។
បើទោះជាមានការបាក់ច្រាំងទន្លេបែបនេះក្តី ពុំទាន់មានបាក់ដល់លំនៅឋានប្រជាពលរដ្ឋឡើយ ព្រោះចំណុចនេះ កាលពីកន្លងមកធ្លាប់បាក់ ហើយត្រូវបានមន្ទីរសាធារណការ និងដឹកជញ្ជូនខេត្ត ធ្វើការរារាំងទប់ស្កាត់ខ្លាចបាក់ដល់ផ្លូវ ។ រីឯប្រជាពលរដ្ឋដែលមានផ្ទះនៅទីនោះបានរុះរើចេញផងដែរ ។
លោក ខឹម ច័ន្ធគីរី អភិបាលស្រុកស្អាង បានឱ្យដឹងថា ទាក់ទិននឹងច្រាំងទន្លេបាក់នៅចំណុចភូមិព្រែករុន ឃុំព្រែកគយ កាលពីពេលថ្មីៗនេះ លោកបានរាយការណ៍ទៅលោកអភិបាលខេត្តហើយដែរ ដើម្បីឱ្យខាងមន្ទីរសាធារណការ និងដឹកជញ្ជូនខេត្ត ចុះមកត្រួតពិនិត្យ និងធ្វើការទប់ស្កាត់កុំឱ្យបន្តបាក់បន្ថែមទៀត ។
ច្រាំងទន្លេដែលបាក់នេះមិនមានផលប៉ះពាល់ដល់លំនៅឋានប្រជាពលរដ្ឋទេ ប៉ុន្តែវាប៉ះពាល់ដល់ការធ្វើចរាចរណ៍តាមផ្លូវនេះ បើសិនវានៅតែបាក់បន្តទៀតនោះ ។ អាជ្ញាធរបានធ្វើការណែនាំដល់ប្រជាពឡរដ្ឋដែលមានផ្ទះនៅជិតកន្លែងបាក់នោះឱ្យមានការប្រុងប្រយ័ត្ន ខ្លាចកើតមានហេតុការណ៍ជាយថាហេតុនៅពេលក្រោយទៀត ។ ចំណុចដែលបាក់ច្រាំងនេះ គឺជាចំណុចដែលរលកទឹកទន្លេបោកបក់បុកចំខ្លាំង ហើយតំបន់នេះមិនមានការបូមខ្សាច់ពីមុនមកនោះទេ ។ ចំណុចនេះធ្លាប់បាក់ជាអន្លើៗពីមុនមក ដល់ក្បែរផ្លូវជាតិម្តងរួចហើយ ។
ក្នុងអំឡុងឆ្នាំ២០០៣ ក្រុមហ៊ុនធ្វើផ្លូវជាតិលេខ 21B បានយកថ្ម និងដីមកចាក់បំពេញ និងរែងសំណាញ់លួសទប់កម្លាំងទឹកដែលបោកបក់ មកដល់ពេលនេះមានរយៈពេល១០ឆ្នាំហើយ ស្រាប់តែកើតរឿងបាក់រអិលច្រាំងចូលក្នុងទន្លេម្តងទៀត ។ ប្រជាពលរដ្ឋដែលមានផ្ទះនៅខាងកើតផ្លូវជាតិ ជាប់ច្រាំងទន្លេនៅក្បែរចំណុចបាក់នោះ កំពុងមានការព្រួយបារម្ភខ្លាំងណាស់ ខ្លាចច្រាំងទន្លេនៅតែបន្តបាក់ដល់ផ្ទះរបស់ពួកគាត់ និងសំណូមពរដល់អាជ្ញាធរឱ្យមានវិធានការទប់ស្កាត់ជាបន្ទាន់ផងដែរ ។
អ្នកស្រុកបានឱ្យដឹងថា បន្ទាប់ពីមានភ្លៀងធ្លាក់ខ្លាំងប៉ុន្មានថ្ងៃកន្លងមកនេះ ចំណុចដែលច្រាំងបាក់រអិលធ្លាក់ចូលក្នុងទន្លេ មានស្នាមប្រេះមកដល់ជាប់នឹងផ្លូវជាតិ គួបផ្សំនឹងមានរថយន្តធំៗដឹកថ្ម ដឹកខ្សាច់ ក្រួស ធ្វើឱ្យរញ្ជួយផង ក៏បណ្តាលឱ្យបាក់ដីទាំងផ្ទាំងៗចូលទៅក្នុងទន្លេប្រវែងចម្ងាយជាង៥០ម៉ែត្រ គឺបាក់មកដល់ជាប់នឹងផ្លូវជាតិតែម្តង និងកំពុងប្រឈមបាក់បន្តទៀត ព្រោះមានស្នាមប្រេះដីតាមបណ្តោយចិញ្ចើមផ្លូវរាប់រយម៉ែត្រ ។ អ្នកស្រុកបានឱ្យដឹងទៀតថា មិនមានផ្ទះបាក់ចូលក្នុងទន្លេទេ ប៉ុន្តែផ្ទះនៅជាប់ច្រាំងទន្លេខាងត្បូង និងខាងជើងចំណុចបាក់នោះ កំពុងមានការព្រួយបារម្ភខ្លាំងណាស់ ខ្លាចច្រាំងបន្តបាក់ទៀតដល់ផ្ទះគាត់ ៕
ចែករំលែកព័តមាននេះ