រាជធានីភ្នំពេញ ៖ ថង់ខ្មៅមួយដែលនៅក្នុងនោះមានសម្លៀកបំពាក់ ស្បែកជើង រូបថតអនុស្សាវរីយ៍ អត្តសញ្ញាណប័ណ្ណ និងប័ណ្ណការងាររបស់ស្ត្រីម្នាក់ ត្រូវបានក្រុមអ្នករើសអេតចាយប្រទះឃើញហើយរាយការណ៍ប្រាប់សមត្ថកិច្ចឱ្យទៅពិនិត្យមើល ។ ក្រោយពីពិនិត្យរួច សមត្ថកិច្ចសង្ស័យថា ជារបស់ស្ត្រីម្នាក់ដែលត្រូវឃាតកររឹត.ក សម្លាប់ច្រកបាវយកទៅទម្លាក់ចោលនៅជិតដីឡូត៍មួយកន្លែងក្នុងភូមិបារគូ សង្កាត់ដង្កោ ខណ្ឌដង្កោ ដែលបង្កឱ្យមានការភ្ញាក់ផ្អើលកាលពីព្រឹកថ្ងៃទី៤ មិថុនា កន្លងមក គឺ១៤ថ្ងៃមុននេះ និងមិនទាន់រកអត្តសញ្ញាណស្រ្តីដែលស្លាប់នោះឃើញនៅឡើយទេ ។
ថង់ខ្មៅសង្ស័យមួយនេះ ត្រូវបានគេប្រទះឃើញកាលពីវេលាម៉ោង៨និង១៥នាទីព្រឹកថ្ងៃទី១៨ មិថុនា នៅជិតកន្លែងដែលឃាតករប្លុងសពចោល ។ តាមប្រភពព័ត៌មានឱ្យដឹងថា នៅក្នុងថង់ខ្មៅនោះមានសម្លៀកបំពាក់ស្បែកជើងស្រ្តី មានរូបថតអនុស្សាវរីយ៍ជាមួយក្រុមគ្រួសារ រូបថតនៅកន្លែងពិធីមង្គលការ ព្រមទាំងអត្តសញ្ញាណប័ណ្ណ និងប័ណ្ណការងារជាសន្តិសុខក្រុមហ៊ុន CSC ។ តាមការសន្និដ្ឋាន សមត្ថកិច្ចបានដាក់ការសង្ស័យថា ជារបស់ស្ត្រីម្នាក់ដែលត្រូវគេសម្លាប់ច្រកការុងយកទៅទម្លាក់ចោលនៅត្រង់ចំណុចខាងលើនោះ ។
តាមប្រភពព័ត៌មានបានឱ្យដឹងថា មានស្ត្រីអ្នករើសអេតចាយមួយក្រុមបានដើររើសអេតចាយនៅចំណុចខាងលើហើយប្រទះឃើញថង់ខ្មៅមួយនេះ ក៏ចូលទៅរើស និងស្រាយមើលស្រាប់តែឃើញមានសម្លៀកបំពាក់ និងរបស់របរមួយចំនួនទៀត ទើបប្តឹងសមត្ថកិច្ចមូលដ្ឋានឱ្យចុះទៅពិនិត្យមើល ។ មន្ត្រីសមត្ថកិច្ចឱ្យដឹងថា ពេលចុះទៅដល់ក៏ប្រទះឃើញដូចដែលអ្នករើសអេតចាយបានរាយការណ៍ប្រាប់មែន ហើយនៅក្នុងអត្តសញ្ញាណប័ណ្ណនោះដាក់ឈ្មោះ អុឹម សុវណ្ណនី ភេទស្រី អាយុ២៧ឆ្នាំ មានទីលំនៅផ្ទះលេខ១៩២ ភូមិព្រែកធំ ឃុំក្បាលកោះ ស្រុកកៀនស្វាយ ខេត្តកណ្តាល ។ ក្រៅពីនេះ បានរកឃើញរូបថតអនុស្សាវរីយ៍ដែលស្ត្រីឈ្មោះ អុឹម សុវណ្ណនី ថតរូបរួមជាមួយនឹងសាច់ញាតិ ព្រមទាំងរូបថតជាច្រើនផ្សេងទៀតនៅក្នុងថង់ពណ៌ខ្មៅនេះ ។
មន្ត្រីសមត្ថកិច្ចបានសន្និដ្ឋានជាជំហានដំបូងថា សម្ភារទាំងនេះ សង្ស័យជារបស់ស្ត្រីដែលឃាតកររឹត.កសម្លាប់ច្រកការុងយកសពមកប្លុងចោល កាលពី១៤ថ្ងៃមុន ។ ទោះបីជាបែបណា ពេលនេះនៅមិនទាន់ច្បាស់លាស់នៅឡើយទេ ព្រោះកំពុងស្ថិតក្នុងការស្រាវជ្រាវ និងរង់ចាំសមត្ថកិច្ចជំនាញបច្ចេកទេសនៃស្នងការដ្ឋាននគរបាលរាជធានីភ្នំពេញពិនិត្យខ្ចៅដៃសិន និងកំពុងទាក់ទងទៅខាងស្រុកកំណើតដែលមាននៅក្នុងអត្តសញ្ញាណប័ណ្ណ និងក្រុមហ៊ុនសន្តិសុខCSC ព្រោះស្ត្រីឈ្មោះ អុឹម សុវណ្ណនី នោះជាគណនេយ្យកររបស់ក្រុមហ៊ុនសន្តិសុខខាងលើ ។
ប្រភពព័ត៌មានចុងក្រោយឱ្យដឹងថា ក្រោយពីនគរបាលធ្វើកោសល្យវិច័យលើខ្ចៅដៃក្នុងអត្តសញ្ញាណប័ណ្ណរួចមក បានទទួលលទ្ធផលថា សពស្រ្តីដែលច្រកក្នុងការុងយកទៅប្លុងចោលកាលពី១៤ថ្ងៃមុន ដែលមានចុះផ្សាយក្នុងសារព័ត៌មានកោះសន្តិភាពនោះ ពិតជាឈ្មោះ អុឹម សុវណ្ណនី ដូចរូបក្នុងអត្តសញ្ញាណប័ណ្ណនេះ ប្រាកដមែន ៕
ចែករំលែកព័តមាននេះ