ខេត្តពោធិ៍សាត់ ៖ ខណៈពេលអញ្ជើញជាអធិបតីក្នុងពិធីបញ្ចុះបឋមសិលាសាងសង់អគារសិក្សាមួយខ្នង មាន៦បន្ទប់ ជាអំណោយរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា តាមរយៈលោករដ្ឋមន្ត្រី ស៊ុយ សែម នៅសាលាបឋមសិក្សាត្រាង ស្ថិតក្នុងឃុំមេទឹក ស្រុកបាកាន កាលពីថ្ងៃទី១៧ មិថុនា លោកជំទាវ ជា ខេង ស៊ុយ សែម បាន
ខេត្តពោធិ៍សាត់ ៖ ខណៈពេលអញ្ជើញជាអធិបតីក្នុងពិធីបញ្ចុះបឋមសិលាសាងសង់អគារសិក្សាមួយខ្នង មាន៦បន្ទប់ ជាអំណោយរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា តាមរយៈលោករដ្ឋមន្ត្រី ស៊ុយ សែម នៅសាលាបឋមសិក្សាត្រាង ស្ថិតក្នុងឃុំមេទឹក ស្រុកបាកាន កាលពីថ្ងៃទី១៧ មិថុនា លោកជំទាវ ជា ខេង ស៊ុយ សែម បានប្រទះឃើញបុរសពិការម្នាក់និងមានការអាណិតអាសូរយ៉ាងខ្លាំង ។
នៅពេលសាកសួរ បុរសរូបនេះបានរៀបរាប់ប្រាប់ថា គាត់ឈ្មោះ បេន ខ្លី អាយុ៣៥ឆ្នាំ រស់នៅក្នុងភូមិអង្កាញ់ ឃុំមេទឹក ស្រុកបាកាន មានប្រពន្ធនិងកូន៣នាក់ កូនប្រុសបង អាយុ១៣ឆ្នាំ ។ សព្វថ្ងៃគាត់ពុំមានដីស្រែ និងដីលំនៅឋានទេ គឺសុំដីអ្នកស្គាល់គ្នារស់នៅបណ្តោះអាសន្នដោយប្រកបមុខរបរជាជាងប៉ះកង់ ។ គាត់មានបងប្រុសម្នាក់ពិការដែរ គឺពិការតាំងពីកំណើតដូចគ្នា ។ ពិការភាពរបស់គាត់ គឺជើងស្តាំងត្រឹមជង្គង់ត្រង់ទៅមុខ ហើយបាតជើង និងក្រញាំជើងផ្ងារឡើងលើមើលទៅដូចម្រាមដៃ ឯជើងឆ្វេងបត់ទៅក្រោយដើរនឹងជង្គង់ ។ សព្វថ្ងៃ គាត់មានជីវភាពលំបាកយ៉ាងខ្លាំង បើថ្ងៃណាពុំមានអ្នកចូលប៉ះកង់ ឬប្រពន្ធមិនបានដើរបេះបន្លែលក់ទេ ស្ទើរតែរកអង្ករច្រកឆ្នាំងពុំបាន ។
បន្ទាប់ពីស្តាប់ការរៀបរាប់របស់គ្រួសារជនពិការក្រីក្រខាងលើភ្លាម លោកជំទាវ ជា ខេង ស៊ុយ សែម ដែលតែងតែមានចិត្តធម៌បានសម្តែងការអាណិតអាសូរយ៉ាងខ្លាំង ។ លោកជំទាវបានទិញដីស្រែចំនួនមួយហិកតាសង់ផ្ទះតៀមឈើមួយខ្នងទំហំ៥មែ៉ត្រគុណ៦មែ៉ត្រ និងទិញប្រដាប់ប្រដាប៉ះកង់មួយឈុតទៀតជូន ដើម្បីបន្តជីវិតរស់នៅឱ្យមានភាពសមរម្យនឹងគេ ។
លោកជំទាវ ជា ខេង ស៊ុយ សែម បានប្រគល់ការងារនេះជូនលោក សៅ ដារឿន អភិបាលស្រុកបាកាន ដើម្បីដើររកទិញដី និងទិញឈើធ្វើផ្ទះឱ្យបានឆាប់បំផុត ។ លោកជំទាវបានបញ្ជាក់យ៉ាងច្បាស់ថា ដីស្រែនិងផ្ទះដែលធ្វើជូននេះជាកម្មសិទ្ធិលើប្តី បើថ្ងៃក្រោយលែងលះគ្នា ប្រពន្ធពុំមានសិទ្ធិទាមទារទេ ហើយប្តីដែលជាជនពិការនេះ ក៏មិនអាចលក់ដីនេះបានដែរ ។អ្នកទៅចូលរួមក្នុងពិធីបានលាន់មាត់ថា មិនចាំបាច់ទេវតានៅលើមេឃទេ លោកជំទាវ ជា ខេង ស៊ុយ សែម ក៏ជាទេវតាដែរ ព្រោះលោកជំទាវបានជួយសង្គ្រោះប្រជាពលរដ្ឋ និងកសាងសមិទ្ធផលច្រើនណាស់នៅខេត្តពោធិ៍សាត់នេះ ៕
ចែករំលែកព័តមាននេះ