រាជធានីភ្នំពេញ ៖ ក្រុមហ៊ុន AirAsia និង Visa សហការជាមួយអាជ្ញាធរថៃ បានអញ្ជើញអ្នកសារព័ត៌មានកម្ពុជាជាច្រើននាក់ និងអ្នកសារព័ត៌មានមកពីបណ្តាប្រទេសផ្សេងៗទៀតសរុបជាង៥០នាក់ទៅចូលរួមក្នុងសន្និសីទកាសែតធំមួយនៅប្រទេសថៃ កាលពីថ្ងៃទី១២ មិថុនា ២០១៣ ស្តីពីការលក់បញ្ចុះតម្លៃដ៏អស្ចារ្យសម្រាប់ជើងហោះហើរ ក្នុងគោលបំណងជំរុញកំណើនវិស័យទេស
រាជធានីភ្នំពេញ ៖ ក្រុមហ៊ុន AirAsia និង Visa សហការជាមួយអាជ្ញាធរថៃ បានអញ្ជើញអ្នកសារព័ត៌មានកម្ពុជាជាច្រើននាក់ និងអ្នកសារព័ត៌មានមកពីបណ្តាប្រទេសផ្សេងៗទៀតសរុបជាង៥០នាក់ទៅចូលរួមក្នុងសន្និសីទកាសែតធំមួយនៅប្រទេសថៃ កាលពីថ្ងៃទី១២ មិថុនា ២០១៣ ស្តីពីការលក់បញ្ចុះតម្លៃដ៏អស្ចារ្យសម្រាប់ជើងហោះហើរ ក្នុងគោលបំណងជំរុញកំណើនវិស័យទេសចរណ៍ក្នុងឆ្នាំនេះ ក៏ដូចជាការផ្សព្វផ្សាយអំពីព្រឹត្តិការណ៍ Sky dance របស់ខ្លួន ដែលត្រូវបានកំណត់រៀបចំនៅលើជើងហោះហើរមួយរបស់ AirAsia ។
អាជ្ញាធរទេសចរណ៍ថៃបានពន្យល់ថា ព្រឹត្តិការណ៍លក់បញ្ចុះតម្លៃនេះត្រូវបានបង្កើតឡើងដើម្បីបន្តជំរុញកំណើនទេសចរពីថ្ងៃទី១៥ មិថុនា ដល់ថ្ងៃទី១៥ សីហាជារៀងរាល់ឆ្នាំ ។ សម្រាប់រយៈពេល២ខែពេញនេះ ក្រុមហ៊ុនឈានមុខនានា និងបណ្តាក្រុមហ៊ុនលក់រាយជាង១៥.០០០ បានចាប់ដៃគ្នា ដើម្បីផ្តល់ជូនការបញ្ចុះតម្លៃរហូតដល់ ៨០% សម្រាប់អ្នកធ្វើដំណើរនៅតំបន់ចំនួន៧រួមមាន បាងកក ឈៀងម៉ៃ ហាត់យ៉ៃ ភូកេត ប៉ាតាយ៉ា ហួសុិន និងកោះសាមុយ ។
អាជ្ញាធរថៃក៏បានរៀបចំយុទ្ធនាការ៣០ថ្ងៃដ៏អស្ចារ្យនៅក្នុងប្រទេសថៃផងដែរ ដោយផ្តល់ជូនអ្នកដំណើរបរទេសនូវឱកាសធ្វើដំណើរកម្សាន្តរយៈពេលរហូតដល់៣០ថ្ងៃនៅក្នុងប្រទេសថៃ និងឱកាសទទួលបានរង្វាន់ដែលមានតម្លៃសរុបប្រមាណ៣,៥លានបាត ។ អ្នកដំណើរជនជាតិថៃក៏មានឱកាសទទួលបានប័ណ្ណដែលមានតម្លៃសរុបជាង១លានបាតផងដែរ ដោយគ្រាន់តែចំណាយ៥០០បាតនៅហាងណាមួយក៏បាន ដែលចូលរួមក្នុងព្រឹត្តិការណ៍នេះ រួចបំពេញឈ្មោះ និងលេខទូរស័ព្ទនៅលើកាតយុទ្ធនាការនេះជាការស្រេច ។
លោក Tassapon Bijleveld នាយកប្រតិបត្តិក្រុមហ៊ុនទេសចរណ៍ Thai AirAsia បានឱ្យដឹងថា ក្រុមហ៊ុនមានសេចក្តីសោមនស្សរីករាយណាស់ ដែលបានក្លាយជាចំណែកមួយនៃការលក់បញ្ចុះតម្លៃដ៏ធំក្នុងប្រទេសថៃនេះ ។ នេះដោយសារតែវាបានក្លាយជាផ្នែកមួយយ៉ាងចម្បងក្នុងការស្វាគមន៍ភ្ញៀវទេសចរដែលមានចំនួនច្រើនលើសលប់មកកាន់ប្រទេសជាតិ ។ កាលពីឆ្នាំ២០០២ AirAsia បានដឹកជញ្ជូនអ្នកដំណើរប្រមាណជាង៨,៣លាននាក់ ហើយក្រុមហ៊ុនក៏រំពឹងទុកផងដែរថា តួលេខនេះនឹងកើនឡើងថែមទៀតនៅឆ្នាំនេះជាមួយការបង្កើនចំនួននៃជើងហោះហើរ និងផ្លូវហោះហើររបស់ខ្លួន ។
លោកបន្តថា យើងកំពុងបង្កើនជើងហោះហើរឆ្ពោះទៅកាន់ទិសដៅពេញនិយមនានាក្នុងឆ្នាំនេះ ដើម្បីឱ្យការធ្វើដំណើរមានការចំណាយកាន់តែតិច និងកាន់តែងាយស្រួលសម្រាប់អ្នកដំណើររបស់យើង ។ AirAsia បានបង្កើនជើងហោះហើររួចមកហើយទៅកាន់ទិសដៅពេញនិយមនានានៅភូកេត ឈៀងម៉ៃ ក្រាក់ប៊ី ហាត់យ៉ៃ និងឈៀងរ៉ៃក្នុងឆ្នាំនេះ ហើយក៏បានដាក់ឱ្យប្រើប្រាស់នូវសេវាកម្ម South Sea Easy Island Transfer រួចមកហើយដែរ ដែលអនុញ្ញាតឱ្យអ្នកដំណើរជ្រើសរើសកោះណាមួយក្នុងចំណោមកោះទាំង៧ រួមមាន កោះសាមុយ ផាង៉ាន ឡានតា លីប៉េ ង៉ៃ យ៉ៅ និងណយ និងមានជើងហោះហើរដែលចុះចតនៅជិតទូកចម្លងឆ្ពោះទៅកាន់ទិសដៅ ។ សេវាកម្មនានាត្រូវបន្តផ្តល់ជូនទាំងស្រុងដោយបុគ្គលិកក្នុងតំបន់ ដែលបង្កើតដោយ AirAsia និងនាំមកជូនអតិថិជននូវសេវាកម្មល្អឥតខ្ចោះរួមជាមួយការសន្សំសំចៃផងដែរ។
អ្វីដែលសំខាន់ជាងនេះទៅទៀត AirAsia បានចូលរួមផ្តល់ការបញ្ចុះតម្លៃពិសេសរបស់ខ្លួននៅក្នុងកម្មវិធីនេះ ដោយអញ្ជើញភ្ញៀវបរទេសពីរាជធានីភ្នំពេញធ្វើដំណើរទៅទីក្រុងបាងកក ក្នុងតម្លៃចាប់ពី៥០ដុល្លារប៉ុណ្ណោះក្នុងមួយជើង ។ ចំណែកអ្នកដំណើរពីគូឡាឡាំពួរ ប៉េណាង ហុងកុង សិង្ហបុរី ស៊ីអាន វូហាន ឆុងស៊ីង ម៉ាកាវ សិុនឈិន ក្វាងចូវ ហូជីមិញ ហាណូយ រ៉ង់ហ្គូន ម៉ាន់ដាឡៃ កុលកាតា និងឆិនណៃ ក៏អាចទទួលបានអត្ថប្រយោជន៍សម្រាប់ដំណើរឆ្ពោះទៅកាន់ទីក្រុងបាងកកនេះដែរ ។
គួរបញ្ជាក់ថា នៅឆ្នាំ២០១២ ប្រទេសថៃបានស្វាគមន៍ភ្ញៀវទេសចរសរុបជាង២២លាននាក់ ជាពិសេសក្នុងអំឡុងពីខែមិថុនាដល់ខែសីហា ដែលស្របគ្នានឹងព្រឹត្តិការណ៍ការលក់បញ្ចុះតម្លៃដ៏អស្ចារ្យនៅប្រទេសថៃនេះ ។ ជាមួយនឹងអ្នកដំណើរជាង៣,៦លាននាក់មកកាន់ប្រទេសថៃដែលមានកំណើនប្រមាណជាង១៦% រៀងរាល់ឆ្នាំ ការលក់ផលិតផលពីការចូលរួមរបស់ក្រុមហ៊ុននានានេះមានចំណូលសរុបប្រមាណ២៥ពាន់លានបាត ដែលបានបង្ហាញពីជោគជ័យដ៏ត្រចេះត្រចង់មួយសម្រាប់គម្រោងនេះ ។
ចំពោះការហោះហើរពីភ្នំពេញទៅបាងកកប្រទេសថៃ មាន២ជើងរៀងរាល់ថ្ងៃ និងមានជើងហោះហើរពីភ្នំពេញទៅគូឡាឡាំពួរ ពីសៀមរាបទៅគូឡាឡាំពួរ ដែលនឹងធ្វើការហោះហើររៀងរាល់ថ្ងៃ ហើយជើងហោះហើរទាំងអស់នេះនឹងចាប់ផ្តើមដំណើរការពីថ្ងៃទី១ សីហា ឆ្នាំ២០១៣ តទៅ ៕
ចែករំលែកព័តមាននេះ