ខេត្តបន្ទាយមានជ័យ ៖ ឈើគ្រញូងចំនួន២៣ដុំ មានមុខកាត់មូលនិងជ្រុង ត្រូវបានសមត្ថកិច្ចចម្រុះមួយក្រុមចុះធ្វើកំណត់ហេតុរួមគ្នានៅខ្សែបន្ទាត់ព្រំដេនចំណុចបង្គោលសីមាព្រំដែនលេខ៣២ ក្នុងភូមិអូរកំបុត ឃុំគោករមៀត ស្រុកថ្មពួក ទល់មុខភូមិរុំសៃ ឃុំទ័ពស្តេច ស្រុកតាបប្រាយ៉ា ខេត្តស្រះកែវ ប្រទេសថៃ ។ ការចុះធ្វើកំណត់ហេតុនេះគឺបន្ទាប់ពីនគរបាលការពារព្រំដែនគោកវរសេនាតូចលេខ៨០៧ កម្លាំងស៊ើបការណ៍ទ័ពជើងគោក និងកម្លាំងប្រតិបត្តិការសឹករងខេត្តដែលប្រចាំការនៅចំណុចនោះ ចុះល្បាតរួមគ្នាប្រទះឃើញ ខណៈឈ្មួញយកមកលាក់ទុកដើម្បីនាំឆ្លងដែន ។
នៅកន្លែងកើតហេតុ គេឃើញមានរទេះសម្រាប់រុញឈើគ្រញូងមួយចំនួនផងដែរ ដែលសង្ស័យកម្មករអូសរទេះដឹកឈើនោះដឹងខ្លួនមុនថា សមត្ថកិច្ចចុះល្បាត ក៏រត់ចោលទាំងរទេះនិងឈើគ្រញូងតែម្តង ។ លោក ប្រាក់ សាំ មេបញ្ជា ការនគរបាលការពារព្រំដែនគោកវរសេនាតូចលេខ៨០៧ បានប្រាប់តាមទូរស័ព្ទថា ឈើគ្រញូងទាំង២៣ដុំនេះត្រូវបានកងកម្លាំងចម្រុះប្រទះឃើញនៅពេលល្បាតតាមខ្សែបន្ទាត់ព្រំដែននាវេលាម៉ោងជាង៩ព្រឹកថ្ងៃទី១៦ មិថុនា។ ក្រោយពីធ្វើកំណត់ហេតុរួមគ្នារួច ក៏ទទួលបទបញ្ជាពីលោកស្នងការ-ស្នងការរងទទួលបន្ទុកព្រំដែនពិសេសការសម្របសម្រួលបញ្ជាពីលោក ផាន់ ភីរម្យ ព្រះរាជអាជ្ញាអមសាលាដំបូងខេត្តឱ្យបញ្ជូនឈើគ្រញូងទាំងនេះមកទីបញ្ជាការវរៈដើម្បីសហការជាមួយស្ថាប័នជំនាញធ្វើការថ្លឹង និងវាស់វែង ។
លោកមេបញ្ជាការរូបនេះបន្តថា ក្រោយពីការថ្លឹង និងវាស់វែងរួច ឈើគ្រញូងទាំងនេះនឹងប្រគល់ទៅឱ្យមន្ត្រីរដ្ឋបាលព្រៃឈើយកទៅបន្តតាមនីតិវិធី ។ ទោះបីជាបែបណា មកទល់ម៉ោង៣រសៀលថ្ងៃដដែលនោះ លោក ប្រាក់ សាំ មិន ទាន់ប្រាប់លម្អិតថា ឈើគ្រញូងទាំង២៣ដុំនោះមានទម្ងន់ប៉ុន្មានគីឡូក្រាម ឬមានចំនួនប៉ុន្មានម៉ែត្រគូបនៅឡើយទេ ដោយលោកប្រាប់ថាកំពុងធ្វើការនៅឡើយ ។ តាមប្រភពព័ត៌មានប្រាប់ថា បញ្ហាទប់ស្កាត់ការលួចកាប់និងធ្វើជំនួញឈើគ្រញូង សមត្ថកិច្ចមានការលំបាកខ្លាំងណាស់ ព្រោះអ្នករកស៊ីឈើគ្រញូងប្រើប្រាស់រថយន្តសុទ្ធតែទំនើបៗ ហើយមានពេលខ្លះឈ្មួញមានទាំងអាវុធទៀតផង ម្យ៉ាងគេសង្ស័យថា មានអ្នកមានអំណាចនៅពីក្រោយខ្នងក៏ថាបាន ៕
ចែករំលែកព័តមាននេះ