រាជធានីភ្នំពេញ ៖ ប្រភពព័ត៌មានពីមន្ត្រីសាលាដំបូងរាជធានីភ្នំពេញឱ្យដឹងថា នៅវេលាម៉ោង៩ព្រឹក ថ្ងៃទី១៤ មិថុនា ជាថ្ងៃកំណត់ឱ្យលោក ឃុន ដូរ៉េ កូនប្រុសលោកប្រធានសាខាគយនិងរដ្ឋាករខេត្តកំពង់ចាមចូលបំភ្លឺលើពាក្យបណ្តឹងមួយ ពាក់ព័ន្ធនឹងសំណុំរឿងប្រើអំពើហិង្សាលើអតីតសង្សារ ដែលសំណុំរឿងនោះមាន៣បទល្មើសគឺ ១-ហិង្សាដោយចេតនា ២-ធ្វើឱ្យខូចខាតដោយចេតនា ៣-អំពើលួច ។ ប៉ុន្តែការកំណត់ឱ្យចូលខ្លួនពីសំណាក់ស្ថាប័នអយ្យការដែលមានលោកស្រី ស៊ឺ វណ្ណនី ព្រះរាជអាជ្ញារងកាន់សំណុំរឿងនេះគឺ លោក ឃុន ដូរ៉េ មិនបានចូលខ្លួនទេ ។
មន្ត្រីសាលាដំបូងរាជធានីភ្នំពេញឱ្យដឹងទៀតថា លោកស្រី ស៊ឺ វណ្ណនី ព្រះរាជអាជ្ញារងអមសាលាដំបូង បានចេញដីកាកោះឱ្យលោក ឃុន ដូរ៉េ ចូលខ្លួនទៅបំភ្លឺលើពាក្យបណ្តឹងរបស់អតីតសង្សារកាលពីថ្ងៃទី១៣ មិថុនា តែសាមីខ្លួនបានសុំពន្យារពេលចូលទៅថ្ងៃទី១៤ មិថុនា វេលាម៉ោង៩ព្រឹក ។ លុះដល់ថ្ងៃនិងពេលវេលាកំណត់ គេបានឃើញលោកមេធាវីទៅមើលផ្លូវមុន ហើយឮថា លោកមេធាវីនោះបានទូរស័ព្ទប្រាប់ទៅកូនក្តី គឺលោក ឃុន ដូរ៉េ ថា មានអ្នកកាសែតច្រើននៅចាំស្វាគមន៍ ។ អាចចាត់ទុកថា ពេលទទួលបានព័ត៌មាននោះ លោក ឃុន ដូរ៉េ លែងហ៊ានចូលតុលាការតែម្តង ឬអាចរកពេលក្រោយទៀតជាយុទ្ធសាស្ត្របង្វែងដានចំពោះអ្នកកាសែត ។
មន្ត្រីសាលាដំបូងបានបន្តថា ការមិនចូលខ្លួនតាមដីកាកោះរបស់ព្រះរាជអាជ្ញាដោយសំអាងលើហេតុផលពីនេះពីនោះយ៉ាងដូច្នេះ គឺបុគ្គលរូបនេះតំណាងអយ្យការនឹងមិនរួញរាបញ្ជូនសំណុំរឿងដាក់ទៅចៅក្រមស៊ើបសួរ ដើម្បីចាត់ការបន្ត ឡើយ ដោយមិនត្រូវទុក ឬពន្យារពេលលើសំណុំរឿងនេះទេ ចៀសវាងប៉ះពាល់ដល់ប្រយោជន៍ភាគីដើមបណ្តឹង ។ គួររំលឹកថា កាលពីព្រឹកថ្ងៃទី៤ មិថុនាកន្លងមក កងរាជអាវុធហត្ថរាជធានីភ្នំពេញ បានចាត់បញ្ជូនសំណុំរឿងកូនប្រុសលោកប្រធានសាខាគយខេត្តកំពង់ចាមរូបនេះ ទៅកាន់សាលាដំបូងរាជធានីភ្នំពេញជាផ្លូវការ ។
តាមពាក្យបណ្តឹងរបស់ឈ្មោះ ជៀប អូឡែន ភេទប្រុស អាយុ៤៨ឆ្នាំ ជាអ្នកបើកបររថយន្ត និងឈ្មោះ ជា គឹមឡាយ (ត្រូវជាកូនស្រី) ស្នាក់នៅផ្ទះលេខ២០២ មហាវិថីម៉ៅសេទុង សង្កាត់ទំនប់ទឹក ខណ្ឌចំការមន បានឱ្យដឹងថា កាលពីវេលាម៉ោងប្រហែល១០យប់ ថ្ងៃទី២៨ មេសា កូនស្រីឈ្មោះ ជា គឹមឡាយ បានទូរស័ព្ទប្រាប់លោកថា ឈ្មោះ ឃុន ដូរ៉េ បានវាយធ្វើបាប និងចាប់នាងដាក់ក្នុងរថយន្តរ៉ង់រ៉ូវែរ ។ ពេលទទួលបានដំណឹងនោះភ្លាម លោកនិងក្រុមគ្រួសារបានម្នីម្នាប្រញាប់ប្រញាល់ធ្វើដំណើរទៅកាន់កន្លែងកើតហេតុ ក៏ឃើញជនសង្ស័យ ឈ្មោះ ឃុន ដូរ៉េ នៅទីនោះមែនរួមជាមួយបក្សពួកច្រើននាក់ទៀត ដែលខ្លះនៅអង្គុយក្នុងរថយន្តម៉ាកហ្វដ១គ្រឿង និងខ្លះចេញមកឈរខាងក្រៅកំពុងគំរាមកូនស្រីលោក ។
ពាក្យបណ្តឹងបន្តថា ពេលនោះកូនប្រុសរបស់លោកឈ្មោះ ឡែន ង៉ែត ក៏ទៅដល់ដែរ ហើយលោកបានសួរទៅឈ្មោះ ឃុន ដូរ៉េ ថា ហេតុអ្វីបានជាធ្វើបាបនាង ជា គឹមឡាយ កូនស្រីរបស់លោក ? គ្រាន់តែសួរប៉ុណ្ណឹង ស្រាប់តែឈ្មោះ ឃុន ដូរ៉េ និងបក្សពួកបានស្ទុះមកចាប់លោក និងកូនប្រុសវាយដំ បណ្តាលឱ្យរបួសដៃ និងក្បាល ។ លុះពេលឃើញលោក និងកូនទ្រុឌទ្រោម ឈ្មោះ ឃុន ដូរ៉េ បានលូកហោប៉ៅខោលោកយកអស់ប្រាក់ចំនួន១.៦០០ដុល្លារ ថែមទាំងយកដុំថ្មវាយកម្ទេចកញ្ចក់រថយន្តកូនប្រុសលោកទៀត រួចនាំគ្នាគេចខ្លួនបាត់ ។ ប៉ុន្តែទោះជាយ៉ាងណា មនុស្សទាំងអស់នោះ និងរថយន្តត្រូវបានកត់ចំណាំអស់ហើយ ដូចជារថយន្តម៉ាករ៉ង់រ៉ូវែររបស់ឈ្មោះ ឃុន ដូរ៉េ ពណ៌ស ពាក់ស្លាកលេខភ្នំពេញ 2T-3277 និងរថយន្តម៉ាកហ្វដពណ៌ស ពាក់ស្លាកលេខ ភ្នំពេញ 2W-3277 ។
លោក ជៀប អូឡែន បានបញ្ជាក់ក្នុងពាក្យបណ្តឹងទៀតថា កូនស្រីលោកធ្លាប់មានទំនាក់ទំនងស្នេហាជាមួយឈ្មោះ ឃុន ដូរ៉េ ជាង៥ឆ្នាំហើយ តែក្រោយមកឈ្មោះ ឃុន ដូរ៉េ បានទៅរៀបការជាមួយអ្នកផ្សេង ដែលធ្វើឱ្យកូនស្រីលោកមានតែការឈឺចាប់ ។ ម្យ៉ាងទៀតឈ្មោះ ឃុន ដូរ៉េ តែងតែគំរាមកំហែងមិនឱ្យកូនស្រីលោករៀបការជាមួយប្រុសដទៃឡើយ ។ របាយការណ៍របស់សមត្ថកិច្ចបានបន្តថា ឈ្មោះ ឃុន ដូរ៉េ ធ្លាប់មានទំនាស់ជាមួយនាង ជា គឹមឡាយ ២លើកមកហើយ ដែលលើកទី១-សំណុំរឿង នៅកងរាជអាវុធហត្ថស្រុកអង្គស្នួល ខេត្តកណ្តាល និងលើកទី២-សំណុំរឿងនៅកងរាជអាវុធហត្ថលើផ្ទៃប្រទេស ប៉ុន្តែសំណុំរឿងទាំង២នេះត្រូវបានសម្រុះសម្រួលបញ្ចប់អស់ហើយ ដោយមានកិច្ចសន្យាទាំងសងខាង ។
មន្ត្រីកងរាជអាវុធហត្ថបានឱ្យដឹងថា បានជាការិយាល័យជំនាញបង្ខំចិត្តបញ្ជូនសំណុំរឿងនេះទៅកាន់សាលាដំបូងរាជធានីភ្នំពេញ មូលហេតុមកពីអស់សមត្ថភាពនិងកោះហៅ និងស្វែងរកឈ្មោះ ឃុន ដូរ៉េ ដើម្បីសាកសួរ ឬមកសម្រុះសម្រួលគ្នាជាមួយដើមបណ្តឹង ដូច្នេះទុកពេលឱ្យសមត្ថកិច្ចតុលាការចាត់ការតាមផ្លូវច្បាប់តែម្តង ៕
ចែករំលែកព័តមាននេះ