រាជធានីភ្នំពេញ ៖ ប្រតិកម្មទៅនឹងព័ត៌មានដែលបានផ្សព្វផ្សាយថា គណបក្សប្រជាជនកម្ពុជា មិនចុះហត្ថលេខាលើសេចក្តីថ្លែងការណ៍ប្រឆាំងអំពើពុករលួយនោះ លោក ខៀវ កាញារីទ្ធ អ្នកនាំពាក្យរាជរដ្ឋាភិបាលកម្ពុជា និងជារដ្ឋមន្ត្រីក្រសួងព័ត៌មាន បានបញ្ជាក់ថា គណបក្សប្រជាជនកម្ពុជាដែលកំពុងកាន់អំណាច បានចុះហត្ថលេខាលើអនុស្សរណៈនៃការយោគយល់គ្នា (MOU) ជាមួយអង្គភាពប្រឆាំងអំពើពុករលួយតាំងពីថ្ងៃទី១៥ ឧសភា ឆ្នាំ២០១២ មកម៉្លេះ ដែលបង្ហាញពីការប្តេជ្ញាចិត្តរបស់គណបក្សក្នុងការទប់ស្កាត់ និងប្រយុទ្ធប្រឆាំងអំពើពុករលួយនៅកម្ពុជា ។
លោក ខៀវ កាញារីទ្ធ បានបញ្ជាក់ថា ការដឹកនាំរបស់រាជរដ្ឋាភិបាលគឺបានដើរតាមគោលនយោបាយរបស់គណបក្សប្រជាជនកម្ពុជា ហើយគោលនយោបាយរបស់គណបក្សក៏បានបញ្ជាក់ច្បាស់ណាស់នូវការប្តេជ្ញាចិត្តទប់ស្កាត់ និងប្រយុទ្ធប្រឆាំងអំពើពុករលួយ ។ ដូច្នេះ រាជរដ្ឋាភិបាលដែលបានអនុវត្តតាមគោលនយោបាយរបស់គណបក្សនោះ បានសម្រេចអនុវត្តច្បាប់ស្តីពីការប្រយុទ្ធប្រឆាំងនឹងអំពើពុករលួយ ដូចជាច្បាប់លាងលុយកខ្វក់នៅឆ្នាំ២០០៧ ច្បាប់ប្រឆាំងអំពើពុករលួយនៅឆ្នាំ២០១០ ហើយត្រូវបានកែសម្រួលបន្ថែមនៅឆ្នាំ២០១១។
យោងតាមនោះ យើងបានបង្កើតអង្គភាពប្រឆាំងអំពើពុករលួយ ហើយបានកំណត់ឱ្យមន្ត្រីជាន់ខ្ពស់របស់ស្ថាប័ននីតីប្រតិបត្តិ និងថ្នាក់ដឹកនាំមួយចំនួននៃអង្គភាពសង្គមស៊ីវិលត្រូវប្រកាសទ្រព្យសម្បត្តិរបស់ខ្លួន ក្នុងនោះមន្ត្រីរាជការត្រូវប្រកាសរយៈពេល២ឆ្នាំម្តង ។ ទាំងអស់នេះបានបង្ហាញអំពីការប្រឹងប្រែងរបស់រាជរដ្ឋាភិបាលក៏ដូចជាគណបក្សប្រជាជនកម្ពុជា ។ ដូច្នេះមានន័យថា គណបក្សប្រជាជនកម្ពុជាបាននិងកំពុងធ្វើយ៉ាងសកម្មរួចហើយ ហើយក៏បានចុះហត្ថលេខាលើ MOU ជាមួយអង្គភាពប្រឆាំងអំពើពុករលួយរួចរាល់ហើយដែរ កាលពីឆ្នាំ២០១២ ។
លោករដ្ឋមន្ត្រីបញ្ជាក់ថា អង្គភាពប្រឆាំងអំពើពុករលួយ គឺជាអង្គភាពដែលស្ថាប័នរដ្ឋសភាបានអនុម័ត និងជាអង្គភាពយុត្តិធម៌ធំជាងគេក្នុងប្រទេស ដូច្នេះយើងមិនចាំបាច់ទៅចុះហត្ថលេខាលើអនុស្សរណៈជាមួយអង្គការសង្គមស៊ីវិលទៀតទេ ។ ទន្ទឹមនេះ កម្ពុជាយើងក៏បានចូលក្នុងអនុសញ្ញាអង្គការសហប្រជាជាតិប្រឆាំងអំពើពុករលួយដែរ ហើយក៏ធ្លាប់ទទួលបាននូវការកោតសរសើរពីអតីតឯកអគ្គរដ្ឋទូតសហរដ្ឋអាមេរិកប្រចាំកម្ពុជាទៀតផង ។
លោក ខៀវ កាញារីទ្ធ បានសម្តែងនូវការសោកស្តាយយ៉ាងខ្លាំងចំពោះការចុះផ្សាយតាមរយៈសារព័ត៌មានខ្លះថា គណបក្សប្រជាជនកម្ពុជាមិនព្រមចុះហត្ថលេខាលើសេចក្តីថ្លែងការណ៍ប្រឆាំងអំពើពុករលួយ ដែលរៀបចំដោយអង្គការសង្គមស៊ីវិលមួយនោះ ។
លោករដ្ឋមន្ត្រីចាត់ទុកថា ការចុះផ្សាយនោះជាការយល់ច្រឡំ ខណៈរាជរដ្ឋាភិបាលកម្ពុជា ដែលដឹកនាំដោយគណបក្សប្រជាជនកម្ពុជា មិនគ្រាន់តែបានចុះហត្ថលេខាលើសេចក្តីថ្លែងការណ៍ប្រឆាំងអំពើពុករលួយប៉ុណ្ណោះទេ ប៉ុន្តែយើងបានប្តេជ្ញាចិត្ត និងបានអនុវត្តលើគ្រប់យន្តការទាំងអស់ដើម្បីប្រឆាំងអំពើពុករលួយ និងទទួលបានលទ្ធផលល្អប្រសើរទៀតផង ។
យោងតាមខ្លឹមសារអនុស្សរណៈនៃការយោគយល់គ្នា (MOU) រវាងគណបក្សប្រជាជនកម្ពុជា និងអង្គភាពប្រឆាំងអំពើពុករលួយចុះថ្ងៃទី១៥ ឧសភា ឆ្នាំ២០១២ ដែលចុះហត្ថលេខាដោយលោក សាយ ឈុំ ប្រធានគណៈប្រចាំការគណៈអចិន្ត្រៃយ៍គណៈកម្មាធិការកណ្តាលគណបក្សប្រជាជនកម្ពុជា និងលោក ឱម យ៉ិនទៀង ប្រធានអង្គភាពប្រឆាំងអំពើពុករលួយមានខ្លឹមសារជាអាទិ៍ថា អនុវត្តតាមយុទ្ធសាស្ត្រចតុកោណរបស់រាជរដ្ឋាភិបាល សម្តេចអគ្គមហាសេនាបតីតេជោ ហ៊ុន សែន និងដើម្បីចូលរួមពង្រឹងអនុវត្តច្បាប់ស្តីពីការប្រឆាំងអំពើពុករលួយ ព្រមទាំងក្នុងគោលបំណងលើកស្ទួយសេវាសាធារណៈតាមឃុំ-សង្កាត់ ភាគីទាំង២ ឯកភាពសហការជាមួយគ្នាសម្រាប់រយៈពេល៦ខែ នៅពេលចប់យុទ្ធនាការផ្សព្វផ្សាយ៦ខែ ដើម្បីផ្សព្វផ្សាយ អប់រំ បង្ការ និងទប់ស្កាត់នៅតាមឃុំ-សង្កាត់ទូទាំងប្រទេស ។ ភាគីទាំង២ប្រជុំបូកសរុបវាយតម្លៃ និងដកបទពិសោធន៍កិច្ចសហការនេះលើស្មារតីភាតរភាព ៕
ចែករំលែកព័តមាននេះ