ផ្លែផ្ញៀវ គឺជាផ្លែឈើមួយប្រភេទដែលមានរសជាតិជូរអែម ហើយអាចទទួលទានបានទាំងឆៅ និងទាំងសម្បកតែម្ដង ។ មនុស្សភាគច្រើនយកផ្លែផ្ញៀវមកទទួលទានលេង ដោយមិនបានចាប់អារម្មណ៍ដឹងថា ផ្លែឈើនេះអាចផ្ដល់នូវអត្ថប្រយោជន៍អស្ចារ្យជាច្រើនចំពោះសុខភាពរបស់ពួកគេឡើយ ។
១. ជួយពង្រឹងប្រព័ន្ធភាពស៊ាំនៃរាងកាយ ៖ សារធាតុចិញ្ចឹមចាំបាច់មួយដែលមានផ្ទុកនៅក្នុងផ្លែផ្ញៀវ គឺវីតាមីន C ដែលដើរតួនាទីយ៉ាងសំខាន់ក្នុងការធ្វើឲ្យប្រព័ន្ធភាពស៊ាំមានភាពប្រសើរឡើង ។ ការរក្សាបាននូវប្រព័ន្ធភាពស៊ាំរឹងមាំ គឺសំខាន់ណាស់ដើម្បីទប់ស្កាត់បញ្ហាជំងឺផ្សេងៗ ។ ប្រព័ន្ធភាពស៊ាំរឹងមាំ ក៏ជួយអ្នកឲ្យចៀសឆ្ងាយពីមេរោគឆ្លងដូចជា ជំងឺផ្ដាសាយ ឬគ្រុនផ្ដាសាយ ជាដើមផងដែរ ។
២.ជួយឲ្យស្បែករឹងមាំស្រស់ស្អាត ៖ វីតាមីនC គឺមិនត្រឹមតែសំខាន់ ដើម្បីរក្សាបាននូវប្រព័ន្ធភាពស៊ាំរឹងមាំប៉ុណ្ណោះទេ ប៉ុន្តែក៏ចាំបាច់សម្រាប់សុខភាពស្បែកល្អរឹងមាំស្រស់ស្អាតក្មេងជាងវ័យដែរ ។ នេះក៏ព្រោះតែវីតាមីន C ជួយព្យាបាលជួសជុលស្បែកដែលខូចខាត ក៏ដូចជាសំយោគកូឡាជែនដែលជួយធ្វើឲ្យស្បែកមិនងាយចាស់ ឬឆាប់ជ្រីវជ្រួញទៀតផង ។
៣. ពង្រឹងសុខភាពអញ្ចាញធ្មេញ ៖ លើសពីនេះទៅទៀត វីតាមីន C ដែលមានផ្ទុកក្នុងផ្លែផ្ញៀវ គឺសំខាន់ណាស់សម្រាប់សុខភាពអញ្ចាញធ្មេញរឹងមាំ ។
៤. ទប់ស្កាត់ហានិភ័យនៃជំងឺខ្វះជាតិដែក ៖ កង្វះជាតិដែកក្នុងរាងកាយ ឬបញ្ហាខ្វះគ្រាប់ឈាមក្រហម គឺជាបញ្ហាមួយទាក់ទងនឹងឈាម ។ កង្វះនៃគ្រាប់ឈាមក្រហមនឹងបង្អាក់ការផ្គត់ផ្គង់អុកស៊ីសែនគ្រប់គ្រាន់ក្នុងរាងកាយ ហើយបង្កបញ្ហាសុខភាពគួរឲ្យព្រួយបារម្ភ ។ ទោះជាយ៉ាងណា ផ្លែផ្ញៀវ គឺមានផ្ទុកសម្បូរទៅដោយជាតិដែក ហើយនេះមានន័យថា អ្នកគួររួមបញ្ចូលវាក្នុងរបបអាហារប្រចាំថ្ងៃ ដើម្បីចៀសផុតពីបញ្ហាខ្វះជាតិដែក ឬកង្វះគ្រាប់ឈាមក្រហមក្នុងរាងកាយ ។
៥. កាត់បន្ថយសម្ពាធឈាមដែលឡើងខ្ពស់ ៖ នេះគឺជាមូលហេតុមួយទៀតដែលបញ្ជាក់ឲ្យឃើញថា ផ្លែផ្ញៀវ គឺល្អសម្រាប់សុខភាពឈាមរបស់អ្នក ដោយវាមានផ្ទុកនូវជាតិប៉ូតាស្យូម។ ផ្លែឈើនេះ គឺល្អដូចទៅនឹងផ្លែចេកដែរក្នុងការបង្ការការឡើងខ្ពស់នៃសម្ពាធឈាម ក៏ដូចជាកាត់បន្ថយសម្ពាធឈាមដែលឡើងខ្ពស់ ។ ផ្លែផ្ញៀវ ក៏ជួយរក្សាកម្រិតធម្មតានៃសម្ពាធឈាមដែលជួយឲ្យអ្នកចៀសផុតពីបញ្ហានៃជំងឺលើសសម្ពាធឈាម និងជំងឺបេះដូងផងដែរ ។
៦.ទប់ស្កាត់ជំងឺពុកឆ្អឹង ៖ សារធាតុរ៉ែដ៏សំខាន់មួយទៀតដែលមានផ្ទុកក្នុងផ្លែផ្ញៀវ គឺកាល់ស្យូម ។ ភាគច្រើននៃពួកយើងសុទ្ធតែបានដឹងហើយថា កាល់ស្យូម គឺជាសារធាតុចាំបាច់ជួយធ្វើឲ្យឆ្អឹងមានសុខភាពរឹងមាំ។ ដូច្នេះការទទួលទានផ្លែផ្ញៀវជាប្រចាំ រួមផ្សំជាមួយការធ្វើលំហាត់ប្រាណទៀងទាត់ទៀតនោះ នឹងធ្វើឲ្យអ្នកចៀសឆ្ងាយពីជំងឺពុកឆ្អឹងប្រកបដោយប្រសិទ្ធភាព ។
៧.សម្រួលដល់ការរំលាយអាហារ ៖ ការទទួលទានផ្លែផ្ញៀវជាប្រចាំ ជួយសម្រួលដល់ដំណើរការនៃការរំលាយអាហារ ដោយសារផ្លែឈើនេះមានផ្ទុកនូវជាតិសរសៃខ្ពស់ដែលជំរុញការផលិតទឹកក្រពះរំលាយអាហារ ។ លើសពីនេះទៅទៀតជាតិសរសៃ ក៏ជួយសម្រួលដល់ចលនានៃពោះវៀនដែលជួយកាត់បន្ថយហានិភ័យនៃជំងឺមហារីកពោះវៀន និងជំងឺឫសដូងបាតផងដែរ (ប្រភពពី៖ Health.com.kh) ៕
ចែករំលែកព័តមាននេះ