រាជធានីភ្នំពេញ ៖ បុរសជាមន្ត្រីនគរបាលម្នាក់បានចេញពីហាងផឹកស៊ីស្រវឹងស្រា ស្របពេលខឹងម្តាយដែលទៅតាមដល់ហាង ស្រាប់តែក៏ដកកាំភ្លើងបាញ់រះអស់មួយបង់ ហើយរត់ចោលរថយន្តឡើងជិះកង់បីគេចខ្លួនទៅបាត់ផ្អើលអស់បុគ្គលិកក្នុងហាងរត់ជាន់ជើងគ្នា បង្កឲ្យមានការភ្ញាក់ផ្អើលកាលពីម៉ោង១១យប់ ថ្ងៃទី១៦ ខែវិច្ឆិកា ឆ្នាំ២០១៨…
រាជធានីភ្នំពេញ ៖ បុរសជាមន្ត្រីនគរបាលម្នាក់បានចេញពីហាងផឹកស៊ីស្រវឹងស្រា ស្របពេលខឹងម្តាយដែលទៅតាមដល់ហាង ស្រាប់តែក៏ដកកាំភ្លើងបាញ់រះអស់មួយបង់ ហើយរត់ចោលរថយន្តឡើងជិះកង់បីគេចខ្លួនទៅបាត់ផ្អើលអស់បុគ្គលិកក្នុងហាងរត់ជាន់ជើងគ្នា បង្កឲ្យមានការភ្ញាក់ផ្អើលកាលពីម៉ោង១១យប់ ថ្ងៃទី១៦ ខែវិច្ឆិកា ឆ្នាំ២០១៨ នៅមុខហាងពិភពរាត្រី ផ្លូវ១៧៨ ស្ថិតក្នុងសង្កាត់ទួលស្វាយព្រៃ១ ខណ្ឌចំការមន។
ប្រភពពីកន្លែងកើតហេតុបានបង្ហើបប្រាប់ឱ្យដឹងថា ជនដែលបាញ់បោះសេរីនោះឈ្មោះ ឌិន វណ្ណណូរ៉ា ភេទប្រុស ជាមន្ត្រីនគរបាល មានតួនាទីជានាយការិយាល័យភស្តុភា អគ្គនាយយកដ្ឋានអត្តសញ្ញាណកម្ម ជិះរថយន្តម៉ាកហាយឡេនឌ័រ ពណ៌ស្លែ ពាក់ស្លាកលេខ ភ្នំពេញ 2U 3913 ។
តាមសាក្សីនៅកន្លែងកើតហេតុបញ្ជាក់ថា មុនមានការភ្ញាក់ផ្អើល គឺជនបង្កនោះបានចូលទៅញ៉ាំអាហារនៅក្នុងហាងពិភពរាត្រីតែម្នាក់ឯងទេ លុះផឹកស៊ីស្រវឹងតែមិនបានឈ្លោះប្រកែកនៅក្នុងហាងទេ គ្រាន់តែដឹងថា ឃើញម្តាយទៅតាមដល់ហាងធ្វើឲ្យបុរសខាងលើខឹងក៏ដើរចេញមកក្រៅហាងឡើងរថយន្តបើកថយក្រោយយ៉ាងលឿនទៅកណ្តាលផ្លូវ រួចឈប់ធ្វើឲ្យស្ទះចរាចរណ៍អ្នកធ្វើដំណើរឆ្លងកាត់ទីនោះពេញផ្លូវ។
សាក្សីបន្តទៀតថា ភ្លាមៗនោះជនបង្កបានចេញពីក្នុងរថយន្តទាំងក្នុងដៃមានកាន់កាំភ្លើង ដើរមកឈរពីមុខរថយន្ត ហើយដកកាំភ្លើងបាញ់ទម្លាយកញ្ចក់ខាងមុខរថយន្តរបស់ខ្លួនអស់មួយបង់ជាង១០គ្រាប់ លាន់ស្នូរដូចរន្ទះធ្វើឲ្យបុគ្គលិកនៅក្នុងហាងភ័យស្លន់ស្លោព្រលឹងចុងសក់រត់ជាន់ជើងគ្នា ចំណែកជនបង្កបាញ់បោះសេរីហើយ ក៏ ឡើងជិះម៉ូតូកង់បីនៅជិតកន្លែងកើតហេតុនោះគេចខ្លួនបាត់ស្រមោល បន្សល់រថយន្តនៅកន្លែងកើតហេតុ ត្រូវបានថៅកែហាងប្រាប់ឲ្យសន្តិសុខរុញចេញពីកន្លែងកើតហេតុ ។ បន្ទាប់មកស្រាប់តែម្ចាស់រថយន្តហៅរថយន្តស្ទូចឱ្យមកស្ទូចរថយន្តយកទៅផ្ទះ ប៉ុន្តែត្រូវសមត្ថកិច្ចមកដល់ប្រាប់ឲ្យស្ទួចយកទៅរក្សាទុកនៅប៉ុស្តិ៍នគរបាលទួលស្វាយព្រៃទី១ ដើម្បីធ្វើការស្រាវជ្រាវចាប់ខ្លួនជនបាញ់បោះសេរី ។
បន្ទាប់ពីកើតហេតុថៅកែហាងកើតហេតុខាងលើមិនបានផ្តល់ព័ត៌មានអ្វីទាំងអស់ ហើយជុំវិញករណីខាងលើនេះ ប្រជាពលរដ្ឋកំពុងតែតាមដានមើលចំណាត់ការរបស់សមត្ថកិច្ចដែលពាក់ព័ន្ធថា តើពួកគាត់មានវិធានការបែបណាចំពោះជនដែលបាញ់បោះសេរី ហាក់ដូចជាមិនញញើតនឹងច្បាប់ទាល់តែសោះ ៕
ចែករំលែកព័តមាននេះ