លោកហ៊ួ ខួច អាយុ៤១ឆ្នាំ មានភរិយាឈ្មោះយេន ហាក់លី អាយុ៣៨ឆ្នាំ ជាអាជីវករនៅផ្សារទួលសង្កែថ្មី (ផ្សារសាំហាន់) បានចូលរួមចែករំលែកបទពិសោធន៍ ឬរំលឹកនូវកត្តាសំខាន់ៗខ្លះៗដែលមានប្រសិទ្ធភាពជួយឱ្យការរស់នៅមានការចុះសម្រុងគ្នា និងប្រកបដោយសេចក្តីសុខ តាមរយៈមហាគ្រួសារដល់ប្រិយមិត្តអ្នកអាន និងបងប្អូនប្រជាពលរដ្ឋទូទៅដែលចង់ស្វែងយល់ថា
លោកហ៊ួ ខួច អាយុ៤១ឆ្នាំ មានភរិយាឈ្មោះយេន ហាក់លី អាយុ៣៨ឆ្នាំ ជាអាជីវករនៅផ្សារទួលសង្កែថ្មី (ផ្សារសាំហាន់) បានចូលរួមចែករំលែកបទពិសោធន៍ ឬរំលឹកនូវកត្តាសំខាន់ៗខ្លះៗដែលមានប្រសិទ្ធភាពជួយឱ្យការរស់នៅមានការចុះសម្រុងគ្នា និងប្រកបដោយសេចក្តីសុខ តាមរយៈមហាគ្រួសារដល់ប្រិយមិត្តអ្នកអាន និងបងប្អូនប្រជាពលរដ្ឋទូទៅដែលចង់ស្វែងយល់ថា តើគ្រួសារអ្នកដទៃអាចរស់នៅប្រកបដោយសុភមង្គលតាមវិធីណាខ្លះ? ហើយគ្រួសារយើងខ្វះចំណុចណា? ទើបមិនសូវទទួលបានភាពរីករាយដូចគេ ។
លោកហ៊ួ ខួច បានមានប្រសាសន៍ថា ខ្ញុំ និងភរិយារៀបការ៥ឆ្នាំហើយក៏កំពុងមានកូនទី២ដែរ ។ លោកបន្តទៀតថា យើងធ្លាប់ដឹងធ្លាប់ឮរួចមកហើយថា គ្រួសារមួយអាចមានសុភមង្គលទៅបាន លុះត្រាតែមានការយល់ចិត្តគ្នាឱ្យបានស៊ីជម្រៅជាទីបំផុត ។ ប៉ុន្តែដោយឡែកមួយទៀតខ្ញុំបានសង្កេតឃើញថា ការតស៊ូរស់នៅជាមួយគ្នាគ្រប់កាលៈទេសៈក៏ជាចំណែកមួយដ៏សំខាន់ក្នុងការលើកតម្កើងភាពស្និទ្ធស្នាល ក៏ដូចជាទំនាក់ទំនងក្នុងគ្រួសារឱ្យកាន់តែមានភាពល្អប្រសើរឡើង ហើយនឹងនាំមកនូវសុភមង្គលដ៏ត្រចេះត្រចង់ ទោះជាគ្រួសារនោះកើតឡើងដោយចិត្តនឹងចិត្ត ឬការរៀបចំពីអាណាព្យាបាលក្តី ។ ព្រោះការរួមសុខរួមទុក្ខបានរំលេចនូវលក្ខណៈពិសេសនៃបុគ្គលម្នាក់ៗឱ្យផុសឡើងជាបន្តបន្ទាប់ និងជ្រាបចូលទៅក្នុងបេះដូងនៃបុគ្គលដទៃនៅក្នុងគ្រួសារ បង្កើតបានជាទំនុកចិត្តយ៉ាងមុតមាំចំពោះគ្នា ។
លោកខួច បញ្ជាក់ថា ការតស៊ូរស់នៅជាមួយគ្នា គឺឆ្លុះបញ្ចាំងឱ្យឃើញពីការយកចិត្តទុកដាក់ និងលើកទឹកចិត្តគ្នាទៅវិញទៅមកគ្រប់ពេលវេលា ។ កត្តាទាំងនេះបានជួយជំរុញឱ្យជីវិតគ្រួសាររឹតតែមានន័យ ហើយបញ្ជាក់យ៉ាងច្បាស់ថា គ្មានឧបសគ្គណាមួយមកជ្រៀតជ្រែក ឬធ្វើឱ្យភាគីណាម្នាក់អាចបោះបង់គ្នាបានឡើយ ។ លទ្ធផលនៃការរួមគ្នាឆ្លងកាត់ និងជម្នះឧបសគ្គជាច្រើនកន្លងមកបានធ្វើឱ្យការយល់ចិត្តកើតឡើងដោយឯកឯង ហើយរឹតតែមានជំនឿថា គ្មានអ្វីអាចបំបែកសម្ព័ន្ធភាពប្តី-ប្រពន្ធ ឬគ្រួសារនេះបានឡើយ បើទោះជាមានបញ្ហាកើតឡើងក៏គង់នឹងដោះស្រាយបានដោយងាយ ពីព្រោះតែពួកគេ (ប្តី-ប្រពន្ធ) ចាក់គ្រឹះនៅជាមួយគ្នាយ៉ាងជ្រៅ៕
ចែករំលែកព័តមាននេះ