រាជធានីភ្នំពេញ ៖ នៅសណ្ឋាគារណាហ្គាវើល កាលពីថ្ងៃទី១១ មិថុនាកន្លងមកនេះ ក្រុមហ៊ុនស្រាបៀរលីអូប្រកាសថា ខ្លួនបានសហការជាមួយសហព័ន្ធកីឡាបាល់ទះកម្ពុជា បើកការប្រកួតបាល់ទះដណ្តើមពានរង្វាន់លីអូបៀរជ្រើសរើសជើងឯក ដែលមានប្រាក់រង្វាន់ជាង៦០លានរៀល ។ ការប្រកួតនេះធ្វើឡើងក្នុងគោលបំណង៖
រាជធានីភ្នំពេញ ៖ នៅសណ្ឋាគារណាហ្គាវើល កាលពីថ្ងៃទី១១ មិថុនាកន្លងមកនេះ ក្រុមហ៊ុនស្រាបៀរលីអូប្រកាសថា ខ្លួនបានសហការជាមួយសហព័ន្ធកីឡាបាល់ទះកម្ពុជា បើកការប្រកួតបាល់ទះដណ្តើមពានរង្វាន់លីអូបៀរជ្រើសរើសជើងឯក ដែលមានប្រាក់រង្វាន់ជាង៦០លានរៀល ។ ការប្រកួតនេះធ្វើឡើងក្នុងគោលបំណង៖
១.ពង្រឹង និងអភិវឌ្ឍន៍វិស័យកីឡាបាល់ទះពីលំដាប់ថ្នាក់ជាតិទៅកាន់លំដាប់ថ្នាក់អន្តរជាតិ
២.ផ្តល់ឱកាសដល់ក្រុមកីឡាករផ្លាស់ប្តូរបច្ចេកទេស និងបទពិសោធន៍ល្អៗរវាងកីឡាករនីមួយៗដែលមកពីរាជធានី-ខេត្តទូទាំងប្រទេស
៣.បណ្តុះកីឡាករថ្មីៗឈានចូលលំដាប់ថ្នាក់ជម្រើសជាតិ
៤.ជំរុញ និងបំផុសឱ្យយុវជនចូលរួមក្នុងសកម្មភាពដែលមានតម្លៃសម្រាប់សង្គមជាតិតាមរយៈកីឡាបាល់ទះ ។
ការដាក់ពាក្យចូលរួមប្រកួតត្រូវធ្វើនៅតាមមណ្ឌលនីមួយៗដូចខាងក្រោម ៖
-រាជធានីភ្នំពេញ ៖ (រាជធានីភ្នំពេញ ខេត្តកណ្តាល ខេត្តកំពង់ស្ពឺ ខេត្តព្រៃវែង និងខេត្តស្វាយរៀង)
-ខេត្តកំពង់ចាម ៖ (ខេត្តកំពង់ចាម ខេត្តស្ទឹងត្រែង ខេត្តរតនៈគិរី ខេត្តមណ្ឌលគិរី និងខេត្តក្រចេះ)
-ខេត្តបាត់ដំបង ៖ (ខេត្តបាត់ដំបង ខេត្តប៉ៃលិន ខេត្តបន្ទាយមានជ័យ ខេត្តពោធិ៍សាត់ និងខេត្តកំពង់ឆ្នាំង)
-ខេត្តសៀមរាប ៖ (ខេត្តសៀមរាប ខេត្តកំពង់ធំ ខេត្តព្រះវិហារ និងខេត្តឧត្តរមានជ័យ)
-ខេត្តព្រះសីហនុ ៖ (ខេត្តព្រះសីហនុ ខេត្តកោះកុង ខេត្តតាកែវ ខេត្តកែប និងខេត្តកំពត)
គណៈកម្មការរៀបចំការប្រកួតនឹងពិនិត្យជ្រើសរើសយកក្រុមកីឡាបាល់ទះចំនួន៨ក្រុម ដែលបានដាក់ពាក្យនៅតាមមណ្ឌលនីមួយៗមុនគេ និងព្រមទាំងបានបំពេញគ្រប់លក្ខខណ្ឌនៅក្នុងពាក្យស្នើសុំចូលរួមប្រកួត ។ ចំពោះលក្ខខណ្ឌនៃការដាក់ពាក្យចូលរួមប្រកួតគឺ ៖
-ត្រូវមានកីឡាករក្នុងក្រុមចាប់ពី១០ ទៅ១២នាក់
-ត្រូវបង់សិទ្ធិចូលរួមប្រកួតចំនួន១២.០០០០រៀល នឹងទទួលបានស្រាបៀរលីអូចំនួន២កេស
-កីឡាករត្រូវមានសញ្ជាតិជាខ្មែរ
-កីឡាករត្រូវមានអាយុចាប់ពី១៨ឆ្នាំឡើងទៅ
-កីឡាករត្រូវគោរពតាមបទបញ្ជាការប្រកួត។
ចំណែកប្រាក់រង្វាន់ដែលត្រូវផ្តល់ជូនក្នុងវគ្គជម្រុះគឺ ៖
-ចំណាត់ថ្នាក់លេខ១ ទទួលបាន១.៨០០.០០០រៀល
-ចំណាត់ថ្នាក់លេខ២ ទទួលបាន១.០០០.០០០រៀល
-ចំណាត់ថ្នាក់លេខ៣ ទទួលបាន៨០០.០០០រៀល និង
-ចំណាត់ថ្នាក់លេខ៤ ទទួលបាន៤០០.០០០រៀល ។ ក្រុមកីឡាដែលទទួលបានចំណាត់ថ្នាក់លេខ១ និងលេខ២ នឹងត្រូវចូលរួមប្រកួតផ្តាច់ព្រ័ត្រ (Final Phase) នៅរាជធានីភ្នំពេញ ។
សូមបញ្ជាក់ផងដែរថា ចំពោះក្រុមកីឡាបាល់ទះទទួលបានចំណាត់ថ្នាក់ពីលេខ១ ដល់លេខ៦ នាឆ្នាំ២០១២ មិនត្រូវបានអនុញ្ញាតឱ្យចូលរួមប្រកួតក្នុងវគ្គជម្រុះនៅតាមមណ្ឌលទាំង៥រួមមាន ៖ ១.ក្រសួងមហាផ្ទៃ ២.បញ្ជាការដ្ឋានអង្គរក្ស ៣.កងពលធំអន្តរាគមន៍លេខ៣ ៤.ខេត្តកំពង់ចាម ៥.ស្នងការដ្ឋាននគរបាលខេត្តបាត់ដំបង ៦.នាគសមុទ្របញ្ជាការដ្ឋានកងទ័ពជើងទឹក (ខេត្តព្រះសីហនុ) ។ ក្រុមទាំង៦ដែលមានឈ្មោះខាងលើ ត្រូវដាក់ពាក្យចូលរួមប្រកួតផ្តាច់ព្រ័ត្រ (Final Phase) នៅរាជធានីភ្នំពេញតាមកាលបរិច្ឆេទកំណត់ ដែលគ្រោងនឹងធ្វើឡើងនៅទីលានប្រកួត Beeline Arena ចាប់ពីថ្ងៃទី១៨ ដល់ ២៦ តុលាខាងមុខនេះ ។
សម្រាប់រង្វាន់ជ័យលាភីដែលត្រូវប្រគល់ជូនមានដូចខាងក្រោម ៖
-ចំណាត់ថ្នាក់លេខ១ ទទួលបាន៤០.០០០.០០០រៀល
-ចំណាត់ថ្នាក់លេខ២ ទទួលបាន៨.០០០.០០០រៀល
-ចំណាត់ថ្នាក់លេខ៣ ទទួលបាន៦.០០០.០០០រៀល និង
-ចំណាត់ថ្នាក់លេខ៤ ទទួលបាន៤.០០០.០០០រៀល ៕
ចែករំលែកព័តមាននេះ