តាមពិតជនបង្កធ្វើឲ្យស្លា.ប់មួយគ្រួសារជាមន្ត្រីនគរបាលសោះ
- កំពង់ស្ពឺ
កំពង់ស្ពឺ ៖ មន្ត្រីនគរបាលផ្នែកព្រហ្មទណ្ឌម្នាក់បានក្លាយជាជនសង្ស័យ ក្រោយពេលខ្លួនបានបើករថយន្តបុកម៉ូតូ១គ្រឿង ជិះគ្នា៣នាក់ និងទារកក្នុងផ្ទៃម្នាក់ទៀតបណ្តាលឲ្យម៉ូតូ និងជនរងគ្រោះខ្ទាតធ្លាក់ចូលប្រឡាយទឹកស្លាប់ទាំងអស់គ្នា ស្រាប់តែជនបង្ករត់គេចខ្លួនពីកន្លែងកើតហេតុ ហើយមិនព្រមចូលខ្លួនទៀតអស់រយៈ៥ថ្ងៃហើយ តែសំណុំរឿងសមត្ថកិច្ចបានកសាងចប់សព្វគ្រប់ត្រៀមបញ្ជូនចូលតុលាការថ្ងៃទី១៦…
យោងតាមប្រភពព័ត៌មានពីសមត្ថកិច្ចបានឲ្យដឹងថា គ្រោះថ្នាក់ចរាចរណ៍មួយបានកើតឡើងនៅម៉ោង៤រសៀល ថ្ងៃទី១០ ខែវិច្ឆិកា ឆ្នាំ២០១៨ ស្ថិតតាមផ្លូវជាតិលេខ៤ ចន្លោះគីឡូម៉ែត្រលេខ៣៥-៣៦ ក្នុងភូមិកែវឧត្តម ឃុំត្រពាំងគង ស្រុកសំរោងទង មានរថយន្ត១គ្រឿងម៉ាកកាមរីឆ្លាមពណ៌ស្ករ ស្លាកលេខភ្នំពេញ 2A-6528 បើកបរដោយឈ្មោះ ថុនា ឋានន្តរសក្តិអនុសេនីយ៍ឯក ជាមន្ត្រីនគរបាលផ្នែកព្រហ្មទណ្ឌនៃអធិការដ្ឋាននគរបាលស្រុកសំរោងទង បុកជាមួយម៉ូតូ១គ្រឿង ម៉ាកហុងដាឌ្រីមសេ១២៥ ពណ៌ខ្មៅ ពាក់ស្លាកលេខ បាត់ដំបង 1J-5377 បើកបរពីកើតទៅលិចជិះឌុបគ្នា៣នាក់ ។
របាយការណ៍សមត្ថកិច្ចបានឲ្យដឹងថា ជនរងគ្រោះទី១- ឈ្មោះ សន ព្រាន ភេទប្រុស អាយុ២៨ឆ្នាំ ជាប្តី ទី២- ឈ្មោះ ហម នឿន ភេទស្រី អាយុ២៥ឆ្នាំ ជាភរិយា ទី៣ – ឈ្មោះ អៀន កណ្ណិកា ភេទស្រី អាយុ៩ឆ្នាំ ជាកូន និងទារកម្នាក់ទៀត អាយុ៨ខែ នៅក្នុងផ្ទៃម្តាយ។ ជនរងគ្រោះ រស់នៅភូមិតារ័ត្ន ឃុំព្នាយ ស្រុកសំរោងទង ខេត្តកំពង់ស្ពឺ ។
ប្រភពដដែលបានបន្តថា នៅមុនពេលកើតហេតុជនសង្ស័យជាមន្ត្រីនគរបាលបានបើករថយន្តតាមផ្លូវជាតិលេខ៤ ពីលិចទៅកើតដោយល្បឿនលឿន ។ លុះដល់កន្លែងកើតហេតុបានបួងចង្កូតវ៉ារថយន្តកុងតឺន័រ១គ្រឿង ស្រាប់តែជ្រុលចង្កូតបុកម៉ូតូរងគ្រោះកំពុងបើកបរបញ្ច្រាសទិសចំពីមុខពេញទំហឹង បណ្តាលឲ្យទាំងម៉ូតូ និងជនរងគ្រោះប៉ើងទៅលើ ហើយធ្លាក់ចូលប្រឡាយមានទឹក នៅអែបចិញ្ចើមថ្នល់ ស្លាប់យ៉ាងអាណោចអាធម៌១គ្រួសារបែបនេះ ។ ចំណែកជនសង្ស័យក្រោយបង្កបានរត់ចោលរថយន្តបាត់សម្រោលឈឹង ។
លោកឧត្តមសេនីយ៍ទោ សម សាមួន ស្នងការនគរបាលខេត្តបានឲ្យដឹងថា ជនសង្ស័យឈ្មោះ ថុនា បានរត់គេចពីផ្ទះ ហើយក៏មិនបានចូលធ្វើការអស់រយៈពេល៦ថ្ងៃហើយ មិនដឹងលាក់ខ្លួនពួនសម្ងំនៅកន្លែងណាទេ តែលោកទទួលបានព័ត៌មានសម្ងាត់ថា ភាគីបង្កបានលួចណាត់ជួបសម្របសម្រួលចរចាសងសំណង់ជាមួយគ្រួសារជនរងគ្រោះ ។ លោកបញ្ជាក់ថា ទោះបីភាគីទាំង២យល់ព្រមយ៉ាងណា តែសម្រាប់សមត្ថកិច្ចរបស់លោកបានកសាងសំណុំរឿងចប់ ហើយ បើមិនថ្ងៃទី១៦ ក៏ថ្ងៃទី១៧ វិច្ឆកានេះនឹងបញ្ជូនសំណុំរឿងនេះចូលដល់តុលាការហើយ ។
ចែករំលែកព័តមាននេះ